Milimo 16 - Amazwi Yakwe Leza 2013

¹ Paulo waile ku Debe nu ku Lisitala, kuno wenga pa ataile uwizina lyakwe Timoti wikalanga. Nyina wakwe Timoti nawe kwene wali wenga pa ataile nupya wali u Muyuda. Lelo Isi wene wali u Mugiliki.

² Onsi aina ali mu Lisitala nu mu Ikoniamu yatasyanga milimo yakwe Timoti.

³ Paulo walondanga kuti Timoti amusukilile, caleka wamusilamwile. Wacisile cii pano Ayuda yonsi atenzi mu vifulo vivi yamanyile vino isi wakwe Timoti wali u Mugiliki.

⁴ Lino yapitanga mu misumba, yanenanga ataile masunde yano cilye ca atumwa na ikolo amu Yelusalemu yapingwile, yayakonkomezya ukuyasunga.

⁵ Caleka amauvi yakomeleka mu utailo, yavulilako cila wanda.

Icilolwa cakwe Paulo ku Tuloa

⁶ Yapisile mu mpanga ya Fulugiya na Galatiya pano Mupasi Wamuzilo atayazumilizye ukukosola ilandwe mu muputule wa mpanga ya Asiya.

⁷ Lino yafisile mu mupaka wa Misiya, yezizye ukuya kumuputule wa mpanga ya Bitiniya, lelo Umupasi wakwe Yesu utayazumilizye.

⁸ Yapita yasalala mu Misiya yaya ku Tuloa.

⁹ Mu usiku kwene ulya Paulo waweni cilolwa muno waweni umwina Makedoniya ala aimi akumupapatila ati, “Lamba wize ku Makedoniya utwazwe.”

¹⁰ Zuwazuwa lino Paulo walola cilolwa, tuiteyanya kuya ku Makedoniya, pano twiluka ukuti Leza watwama kuya kosola Ilandwe Lisuma ku antu ya kuku.

Lidya muli Klistu ku Filipi

¹¹ Lino twafuma ku Tuloa mu wato tulungama ku cilila ca Samotilake, nga uca katondo tuya ku muzi wa Neapoli.

¹² Kufuma kuku twapisile pa mulundu tuya ku Filipi, musumba wankolelo mu mpanga ya Makedoniya, nayo kwene yali mpanga ya ulasi wa Ciloma. Twatenzimo manda aingi.

¹³ Pa Sabata tuya ukunzi ya musumba nu kwiza ku mbali ya luzi, pano twelenginye vino kwali cifulo cino Ayuda yakonganangako ku kupepa. Lyene twikala pansi tuvwanga na anaci yamwi akongineko.

¹⁴ Wenga wamuli yao atuvwile wali a Lidya uwafumile ku Tiatila, kakazya wa nsalu zyakwe cikuwe. Wali umwanaci uwapepanga Leza, nu Mwene wayuzile amano yakwe kuti auvwe kuli vino Paulo wavwanganga.

¹⁵ Wene pamwi na amu ng'anda yakwe yawatiziwa, nga atwama ati, “Izini mwikale mu ng'anda yane ndi mwati mulola ukuti icumi nataila mu Mwene.” Alino atupapatila kuti twingile.

Paulo na Sailasi mu ng'anda yaminyololo yaku Filipi

¹⁶ Uwanda umwi lino twayanga ku cifulo ca mapepo, tukomenkana nu mukazyana uwali nu mupasi wankota uwamulenganga kuti alande ivilacitika. Wazanilanga yakateeka yakwe ulupiya ulwingi apa kusema kwakwe.

¹⁷ Wene walondelanga Paulo naswe ala akupunda ati, “Antu yaa, aomvi yakwe Leza wa papelapela! Yakumunena vino mungatuulwa!”

¹⁸ Wacisile vii pa manda aingi, asuka Paulo aaziwa cuze mu mano nga aseleuka anena mupasi wankota ati, “Mwi zina lyakwe Yesu Klistu nakunena ukuti ufume mu muntu wii!” Alino pa kasita kwene kaka mupasi wankota ufuma munoli.

¹⁹ Lino yakateeka yakwe yamanya vino isyuko lyao lyakupanga ulupiya lyasila, yalema Paulo na Sailasi yayakunkizya ku cilye ca alasi.

²⁰ Lyene yayatwala kuli yakapingula ya milandu a Ciloma, yayanena yati, “Antu ya Ayuda, yakuleta icimvulunganya mu musumba witu.

²¹ Yakusambilizya intambi izitaya mu masunde itu. Swemo sweswe ikazi amu Loma, nupya tutangazumilizya intambi zyao nanti ukuzicita.”

²² Alino iumba likatukila Paulo na Sailasi. Lyene yakapingula ya milandu yalepula insalu zyakwe Paulo na Sailasi, yapela ilamulo kuti yumwe ivikoti.

²³ Pacisila cakumwa ivikoti ivingi, yayasumbila mu ng'anda yaminyololo, nga yanena kalinda uwamu ng'anda yaminyololo kuti ayasungisye.

²⁴ Wene lino uvwa ilamulo lilyo, kalinda wamu ng'anda yaminyololo ayasumbila mu kamuputule ka mukasikasi nu kuyanyepelela makoli ku maulu.

Cizungusyo ca kupususya Paulo na Sailasi

²⁵ Pa nsita imwi, manye usiku pakasi, Paulo na Sailasi yapepanga nu kwimba inyimbo kuli Leza, na anyepwe yauze yakutikanga kunoyali.

²⁶ Mu kupumikizya kwali cilundumusi cikulu, cino catensizye nu mufula wa ng'anda yaminyololo. Lilyo kwene imilyango yonsi iyulika, ni minyololo ipona ku anyepwe onsi.

²⁷ Kalinda uwamu ng'anda yaminyololo akatuka alola ukuti imilyango yonsi yamu ng'anda yati yulika. Lyene aelenganya kuti anyepwe yonsi yati yutuka. Caleka asomola lupanga lwakwe kuti aikome.

²⁸ Lelo Paulo asanzika izwi lyakwe ati, “Utaicisa! Amunotuli swensi!”

²⁹ Kalinda alenga kuti yamuletele ulukozyo nga asimwila mukasi, apona pa ngazo zyakwe Paulo na Sailasi ala akuzakaza.

³⁰ Lyene pa cisila ca kuyafumya panzi, ayauzya ati, “Yasambazi, uzye ncite uli kuti ntuulwe?”

³¹ Nao yaasuka yati, “Taila mu Mwene Yesu, alino ulatuulwa, wewe na amu ng'anda yako.”

³² Lyene yakosola izwi lya Mwene kunoli na kuli yonsi amu ng'anda yakwe.

³³ Lino ucili usiku, kalinda wa ng'anda yaminyololo ayasenda nu kuyafulila ivilonda. Alino wene pamwi na amu ng'anda yakwe yawatiziwa lilyo kwene.

³⁴ Pacisila cakwe vii ayatwala ukwakwe nga ayapeela vyakulya. Aliwe pamwi na amu ng'anda yakwe yali nu luzango, pano ndakai yataila muli Leza.

³⁵ Lino kwaca akatondo ya kapingula ya milandu a Ciloma yatumila asilika ilamulo yati, “Lekini antu yao yapite.”

³⁶ Caleka kalinda uwamu ng'anda yaminyololo anena Paulo ati, “Yakapingula ya milandu yati yatuma ilamulo lyakuti wewe na Sailasi mupite. Caleka fumini, mupite ulumi.”

³⁷ Lelo Paulo anena asilika ati, “Tutazanyilwe nu mulandu nanti umwi, lelo yatumile ivikoti apaswe, nupya sweswe ikazi yamu Loma! Lyene yatusumbila mu ng'anda yaminyololo. Uzye ndakai yakulonda uli kuti yatuleke mu nkama? Awe citangaya vivyo! Yakapingula ya milandu a Ciloma aisikulu yalinzile kwiza tufumya.”

³⁸ Asilika yaya yanena yakapingula ya milandu a Ciloma amazwi yaa. Lyene lino yuvwile ukuti Paulo na Sailasi yali aikazi yamu Loma, yuvwa intete.

³⁹ Caleka yaile yapapata kunoyali. Lyene yayafumya mu ng'anda yaminyololo, yayanena kufuma mu musumba.

⁴⁰ Paulo na Sailasi yafuma mu ng'anda yaminyololo yaya ku ng'anda yakwe Lidya. Yakomanya aina, yayanena amazwi akuyakomelezya nga yapita.