Milimo 15 - Amazwi Yakwe Leza 2013

¹ Antu yamwi afumile ku Yudeya iiza ku Antioki, yasambilizya ataile yati, “Mutalatuulwa ndi mutasilamwilwe kulingana nu lutambi luno Mose watusilile.”

² Lyene Paulo na Banaba yapusana na antu yaa, yaikana ni vikanza cuze pamulandu uu, alino iuvi lipingula kuti Paulo na Banaba nayauze mwi uvi yaye ku Yelusalemu yakalole atumwa na ikolo pamulandu uu.

³ Amwi uvi yayasukilila pa lwendo, yasalala mu Fonisya na Samaliya ala yakulandila ataile vino Akulukuwa yataile muli Leza, ilandwe lii lizanzya ataile.

⁴ Lino yafika mu Yelusalemu, iuvi, atumwa na ikolo yayazengela. Paulo na Banaba yayalandila vyonsi vino Leza wacisile munoyali.

⁵ Lelo ataile yamwi ali mu kaungwe ka Afaliseo, iimilila yavwanga yati, “Akulukuwa yalinzile kusilamulwa nu kunenwa kuti yayela Masunde yakwe Mose.”

⁶ Alino atumwa na ikolo yakongana pamwi kuti yelenganye pamulandu uu.

⁷ Pacisila cakulanzyanya pa nsita ntali Petulo akatuka avwanga ati, “Inane, mwamanya vino kufuma mpiti Leza wansozile kufuma munomuli kuti nkakosole Ilandwe Lisuma ku Akulukuwa, pakuti yanguvwa nu kutaila.

⁸ Lyene Leza, wino uwamanya vyaya mu myenzo ya antu, walanzile vino watazengela Akulukuwa pa kuyapela Mupasi Wamuzilo, wakwe vino naswe watupile.

⁹ Atapusinye pakasi kakwe sweswe na alio, lelo wasangulwile myenzo yao pano yataile.

¹⁰ Caleka, uzye pacani mukwezya Leza pa kutwika cisendo pa nsizi zya ina Klistu Akulukuwa, cino vikolwe vitu nanti sweswe twaposiwa kusenda?

¹¹ Awe! Twataila nga nu kutuulwa kupitila mu cikuku ca Mwene Yesu, ndi vino yene yakutuulwa.”

¹² Onsi akongine yaya cele lino yakuuvwa kuli vino Banaba na Paulo yalandanga, pamulandu wa vilangililo nga ni vizungusyo vino Leza wacisile pakasi ka Akulukuwa kupitila munoyali.

¹³ Lino yamala kulanda, Yakobo aimilila, avwanga ati, “Uvwini kunondi, mwe inane!

¹⁴ Simoni watalondolola vino inkolelo Leza watandike kusolola yamwi mu Akulukuwa kuti yaye antu yakwe.

¹⁵ Mazwi yakwe yakasema yazumilizya ningo pali cii. Wakwe vino malembelo yati,

¹⁶ ‘Pacisila ca vintu vii ndawela, Nu kukuula ing'anda yakwe Davidi iyawa. Ndakuululula citalang'anda nu kukuula ing'anda nupya.

¹⁷ Alino na antu yauze yonsi yalalonda Mwene, pamwi na Akulukuwa yonsi yano nama kuya antu yane.

¹⁸ Vii avino Mwene wavwanga, wino walenzile kuti vii vimanyike kufuma ku mpiti.’”

¹⁹ Yakobo atwalilila kuvwanga ati, “Ukwelenganya kwane ukwakuti, tutalinzile kwanola Akulukuwa yano akusenukila kuli Leza.

²⁰ Mu cifulo cakwe cico, tulinzile kuyalembela kalata wa kuyanena kuti yatalya ivyakulya vikowele pano vyapeelwa ku tuluwi. Yaisunge ku ulenzyo, nga nu kuntalya inyama zino yanyonga, nanti kulya uwazi.

²¹ Pano kufuma ku mpiti Masunde yakwe Mose yawelengwa pa manda aingi mu mang'anda ya mapepo cila Sabata, nga na mazwi yakwe yakakosolwa mu misumba yonsi.”

Kalata kufuma ku cilye kuya ku Akulukuwa ataile

²² Lyene atumwa na aikolo, pali pamwi ni iuvi lyonsi yelenganya kusolola aomvi yamwi kufuma mwi umba nu kuyatuma ku Antioki pamwi na Paulo na Banaba. Lyene yasola Yuda, wino yamanga Basabasi nga na Sailasi, antu yaa oili yano acindikwe cuze mu ina.

²³ Alino yayatumilizya kalata uwatangi, “Swe atumwa na aikolo, swe ina inu, twatuma ulau kuno muli mwe ina itu amu Akulukuwa, akaikala mu Antioki, Silya na Kilikya.

²⁴ Tuvwa vino antu yamwi apisile kufuma umwi umba litu yati yamwanola nu kuvulunganya kampingu winu pali vino yavwanzile. Swemo tutayatumile kuti yacite vivyo.

²⁵ Caleka swemo twati tukomenkana swensi pali pamwi nu kuzumilizyanya kuti tusolole inkombe zimwi nu kuzituma kunomuli. Zyene ziliza na yacuza itu akundwe, Banaba na Paulo.

²⁶ Yene yapela umi wao ku kuombela Mwene witu Yesu Klistu.

²⁷ Lyene twamutumila Yuda na Sailasi, yao alamunena pa manso inu vintu vili vimwi na vino tukulemba.

²⁸ Mupasi Wamuzilo pamwi naswe twati tuzumilizyanya ukuti tutalinzile kumutwika cisendo nacuze kuluta pali vii vikalondekwa,

²⁹ mutalya vyakulya ivyapeelwa ku tuluwi, mutalya uwazi. Mutalya inyama zinyongwe. Muisunge ku ulalelale. Muli nu kucita ningo ndi cakuti mwaisunga ku kuntacita vintu vii. Mwikale ulumi.”

³⁰ Inkombe zikatuka ulendo zipita, zifika ku Antioki. Lino zyafika zikonganika iuvi nu kulipela kalata.

³¹ Lino antu yawelenzile kalata, myenzo yao izuziwa nu luzango cuze pa kuvwa mazwi yaa aukomelezyo.

³² Yuda, na Sailasi, yano ali akakosola yavwanga mazwi akuyakomelezya nu kuyatekezya.

³³ Lino ikalako pa nsita imwi, aina yauze yayapakasya yayanena yati, “Pitini ulumi.” Nao yaswilila kuli yao ayatumile. [

³⁴ Lelo Sailasi wene alola vino camuzipila kuti asyale ku Antioki.]

³⁵ Paulo na Banaba yalengile mu Antioki. Yene pamwi nayauze aingi yasambilizyanga nu kukosola mazwi ya Mwene.

Paulo na Banaba yapalukana

³⁶ Pacisila ca manda yamwi Paulo anena Banaba ati, “Katuswilile tukatandalile aina itu mu mizi yonsi muno twakosozile mazwi ya Mwene, nu kulola miyele yao vino ili.”

³⁷ Banaba walondanga Yoane Mako kuti yapite nawe,

³⁸ lelo Paulo aelenganya vino citalingine kuti yamusende pano waswilile ayasya pa Pamfuliya, aposiwa kuti amalile milimo pamwi nao.

³⁹ Alino Paulo na Banaba yapazyanya pali cii yakana kuvwana nga yapalukana. Lyene Banaba asenda Yoane Mako yapatama mu wato yaya ku Kupulo.

⁴⁰ Paulo nawe asolola kupita na Sailasi, lino aina Klistu yauze yaika mu makasa ya Mwene.

⁴¹ Alino nao yapita mu Silya nu mu Kilikya, ala yakukomelezya mauvi.