Milimo 14 - Amazwi Yakwe Leza 2013

¹ Ivyacitike ku Antioki ivyacitike nu ku Ikoniamu kwene. Paulo na Banaba ingila mu ng'anda ya mapepo ya Ayuda, yene yakosola na maka cakuti Ayuda na Akulukuwa aingi yataila muli Yesu.

² Lelo Ayuda atakasi kutaila yatunka Akulukuwa kuti yapate aina Klistu.

³ Paulo na Banaba yatenzi kweneko pa nsita ntali, ala aingi yakuvwanga nu kupama pamulandu wa Mwene. Mwene nawe ayapeela maka akucita vinjelengwe ni vizungusyo kuti apeele umboni vino kuvwanga kwao pamulandu wa cikuku cakwe ukwa cumi.

⁴ Lyene antu amu musumba yapaatukana paili. Iumba limwi liwila ku atumwa ni lyuze ku Ayuda.

⁵ Lyene Akulukuwa na Ayuda pamwi ni ntunguluzi zyao, yuvwana kuti yayakatukile nu kuyatama na mawe.

⁶ Lino atumwa yacimanya, yutukila ku Lisitala na Debe, misumba yaku Likoniya alino nu ku mpanga zyazingulwikeko.

⁷ Kuku nako yakosola Ilandwe Lisuma.

Vyacitike mu Lisitala na Debe

⁸ Mu Lisitala mwikalanga umuntu uwali icite. Kufuma ku kuvyalwa kwakwe atatazile aye na maka ya kupita.

⁹ Muntu wi watenzi ala akuuvwa ku mazwi yakwe Paulo. Paulo alola vino akweti utailo na vino angapoziwa. Caleka amulolekesya,

¹⁰ alaizya ni zwi likulu ati, “Katuka imilila!” Alino umuntu wiyo akatuka, atandika kupita.

¹¹ Lino antu yaya yonsi yalola vino Paulo wacita, yatandika kulaizya mu cilimi cao Cilikoniya yati, “Yaleza yati yakolana na antu nu kwiza kunotuli!”

¹² Yatemile Banaba izina lyakuti Zeusi, na Paulo izina lyakuti Helemesi, pano aliwe wavwanzile.

¹³ Lyene simapepo wakwe Zeusi wino ng'anda yakwe yamapepo yali pipi nu musumba, aleta cipambasi na maluwa ku mpongolo. Aliwe na antu yakasi kupeela impolelwa kuli Paulo na Banaba.

¹⁴ Lino Banaba na Paulo yuvwa vino yakulonda kucita cii, yalepola malaya yao yasimula yaya mukasi ki umba, yalaizya yati,

¹⁵ “Uzye pacani mukucita cii mwe antu? Swemo sweswe antunze sile wakwe vino muli! Tuli kuno kuti tukosole Ilandwe Lisuma, kuti mufume ku vintu vyasile sile mutandike kupepa Leza wa umi, uwaumvile iyulu, insi, yemba ni vyayamo.

¹⁶ Ku mpiti walesile antu kucita vyonsi vino yakulonda.

¹⁷ Lelo Leza asita kupeela umboni uwa pali aliwe umwisikulu kupitila mu vintu visuma vino akacita. Wene akamupeela imvula kufuma mwiyulu nu kuleka kuti vilimwa vikule pa nsita isuma. Wene akamupeela ivyakulya nu kuzuzya myenzo inu nu luzango.”

¹⁸ Lelo nanti angala atumwa yavwanzile vii, kwasile panono kuti yaposiwe kulesya antu kupeela impolelwa kunoyali.

¹⁹ Lelo Ayuda yamwi aizile kufuma ku Antioki wa Pisidiya nu ku Ikoniamu yatonsya maumba ku lusansa lwao, nga yatama Paulo na mawe, yamukulila nu kunzi yamusumba, yelenganya vino watafwa.

²⁰ Lelo lino ataila iiza yamuunganila, Paulo akatuka aswilila mu musumba. Uwanda walondelela wene pamwi na Banaba yafumako yaya ku Debe.

Paulo na Banaba yaswilila ku Antioki mu Silya

²¹ Paulo na Banaba yakosola Ilandwe Lisuma mu Debe yalonka antu aingi yataila muli Yesu. Lyene yaswilila ku Lisitala, ku Ikoniamu, nu ku Antioki mu Pisidiya.

²² Yakomelezya yano ataile nu kuyakonkomezya kuti yatwalilile kuya acumi mu utailo. Yayasambilizya yati, “Pakuti tukingile mu Wene wa mwiyulu, tulinzile kupita mu ntazi zingi.”

²³ Muli cila uvi yasontamo aikolo yi uvi. Alino yaizilizya ukulya, yapepa, yaika mu makasa ya Mwene, wino yatailamo.

²⁴ Pacisila lino yapita kusalala mpanga ya Pisidiya, iiza ku Pamfuliya.

²⁵ Alino yakosola ilandwe mu Pelige nga yaya ku Ataliya.

²⁶ Kuku akuno yapatama mu wato yaswilila ku Antioki, kuno yapilwe cikuku cakwe Leza pamilimo ino yatiyamala kuomba.

²⁷ Lino yafika mu Antioki, yakonganika iuvi lyonsi, yayalandila vyonsi vino Leza wayacitile, na vino wapile Akulukuwa isyuko kuti yataile.

²⁸ Alino oili iikala na ataile pa manda aingi.