Milimo 13 - Amazwi Yakwe Leza 2013

¹ Mwi uvi lyaku Antioki mwali yakasema na yakasambilizya yaa: Banaba, Simeoni (uwamwangwa mutifi), Lukio (uwafumile ku Kuleni), Manaeni (uwakuzile pamwi nu mulasi Helodi), nga na Saulo.

² Uwanda umwi lino yakongine, ala yakupepa Mwene nu kuizilizya ukulya, Mupasi Wamuzilo ayanena ati, “Mu mpalwile Banaba na Saulo, kuti yakaombe mulimo uno nayamila.”

³ Lyene lino yaizilizya ukulya, nu kupepa, iika makasa yao panoyali, yayatuma.

Kukosola mu Kupulo

⁴ Banaba na Saulo pano yatumwa na Mupasi Wamuzilo, ku Seleukia. Kuku akuno yaya yapatama mu wato yaya ku cilila ca Kupulo.

⁵ Lino yafika mu musumba wa Salamisi, yakosola ilandwe lyakwe Leza mu mang'anda ya mapepo ya Ayuda. Yali na Yoane Mako kazwa wao.

⁶ Alino yapita yasalala cilila yafika ku musumba wa Pafosi, yazana umuntu umwi uwa malele, wino izina lyakwe a Ba-Yesu, u Muyuda wino waitakanga vino akasema.

⁷ Muntu wii wali a cuza wakwe Salegio Paulu mulasi wa cilila, umuntu wamano. Mulasi aama Banaba na Saulo pano walondanga ukuvwa izwi lyakwe Leza.

⁸ Lelo Elima, (Elima kuli kuti uwa malele), wene ayalesya ala akwezya ukucicintila mulasi kuti atataila Ilandwe Lisuma.

⁹ Lyene Saulo, zina lyuze a Paulo, azuziwa na Mupasi Wamuzilo, alolekesya pa muntu wa malele amunena ati,

¹⁰ “We mwana wakwe Ciwa! Wewe mwanisi wa wololoke. Mwenzo wako wazulamo misango yonsi ya micitile yankota. Uzye alilaci lino ulata kutumpwila vyawololoke vya Mwene?

¹¹ Lola! Ndakai Leza amakuvunuka. Umaya wewe mpafu nupya utalalola nanti uluswepo lwa kasanya pa kasita kamwi.” Lilyo kwene Elima apafula.

¹² Lino mulasi wiya walola icacitika, ataila. Lyene azunguka cuze pa vintu vino yasambilizyanga ivya Mwene.

Kukosola mu Antioki wa Pisidiya

¹³ Paulo pamwi na auze yapatama mu wato yafuma ku Pafosi, yaya ku Pelige, mu Pamfuliya. Lelo Yoane Mako ayasya kuku, aswilila ku Yelusalemu.

¹⁴ Kufuma ku Pelige yapitilila yafika ku Antioki wa Pisidiya. Pa Sabata yaya iingila mu ng'anda yamapepo, ikala pansi.

¹⁵ Lyene pacisila ca kuwelenga mazwi amu lupapulo lwakwe Mose nga na zyakwe yakasema, intunguluzi zyamu ng'anda yamapepo zituma mazwi kunoyali ziti, “Ina itu, ndi muli na mazwi yamwi akukomelezya antu, vwangini.”

¹⁶ Alino Paulo aimilila, aimika ikasa, atandika kuvwanga ati, “Mwe ina Izlaeli yanji nga na mwe Akulukuwa yonsi ali pano, mwe muno mukapepa Leza, nguvwini!

¹⁷ “Leza wa ina Izlaeli wasolwile vikolwe vitu, nga aleka antu itu yaya luko lukulu lino yali atandazi mu mpanga ya Eguputo. Lyene Leza ayafumya na maka mu Eguputo

¹⁸ na pa myaka makumi yani ala akuyasunga mu lwanga.

¹⁹ Alino aonona mitundu cinimbali ya antu amu mpanga ya Kenani, nga apeela mpanga yao ku ina Izlaeli kuti iye iyakwao.

²⁰ Casenzile namanye imyaka myanda ini na makumi yasano lino vii vyonsi vyacitike. Pacisila, ayapeela yakapingula ya milandu, kufika na pa nsita yakwe kasema Samueli.

²¹ “Lyene lino yuzya ukuti yakwate Mwene, Leza ayapeela Saulo, mwana wakwe Kisi, uwamu luko lwakwe Benjamini, kuti aye umwene wao pa myaka makumi yani.

²² “Pacisila lino wamusisya, Leza acita Davidi kuya mwene wao. Vii avino Leza wavwanzile pamulandu na aliwe, ati, ‘Nati nzana vino Davidi mwana wakwe Yese, ali muntu wino umwenzo wane watemwa, wino alacita vyonsi vino nemo nkalonda kuti acite.’

²³ Leza walavile ukuti mu luko lwakwe Davidi amuno mulafuma Yesu, kuti aye Katuula wa ina Izlaeli.

²⁴ Lino Yesu atali atandike mulimo wakwe, Yoane wakosozile ku ina Izlaeli yonsi kuti yazenzuke nga yawatiziwe.

²⁵ Lyene lino Yoane wali pipi nu kumala mulimo wakwe, avwanga ku antu ati, ‘Uzye mukwelenganya vino nene weni? Ala nemo nsi wiyo wino mukalolela. Lelo akunoli akwiza cisila cane, nani ntaine kusapula ndyatu ku ngazo zyakwe.’

²⁶ “Mwe inane, mwe amu luko lwakwe Abulaamu, nga namwe mwe Akulukuwa ali pano mwensi, mwe muno mukapepa Leza, akuli sweswe kuno Ilandwe lya ufyusi lyatumwa!

²⁷ Antu akaikala mu Yelusalemu, nga ni ntunguluzi zyao, yatamanyile vino Yesu ali Katuula, nanti ukwiluka mazwi yakwe yakasema yano yakawelenga cila Sabata. Lelo pa kuvunuka Yesu ku mfwa, yalenzile kuti mazwi yakwe yakasema yafikiliziwe.

²⁸ Nanti angala yatazanyile mulandu wa kumupingwila ukufwa, yuzya Pilato kuti apeele ilamulo kuti akomwe.

²⁹ Lyene lino yamala kucita vyonsi vino malembelo yakataka pali aliwe, yamwisya pa lupanda, nga yamuzika mwi lindi.

³⁰ Lelo Leza walenzile kuti azyukuke kufuma ku afwe,

³¹ nga na pa manda aingi walolike kuli yao apitanga nawe kufuma ku Galile kuya ku Yelusalemu. Ndakai yakwene ali yakambone yakwe ku ina Izlaeli.

³² Acino tuli kuno ku kuleta Ilandwe Lisuma kunomuli.

³³ Ndi vino Leza walavile vikolwe vitu, avino naswe watatucitila, swe ana yao, pa kulenga Yesu azyukuke kufuma ku afwe. Ndi vino calembwa mu ciputulwa cakwe ciili ca Masamu, cati, ‘Wewe Mwanane, ilelo naya nene ndi so.’

³⁴ Na vii avino Leza wavwanzile pa kulenga kuti azyukuke kufuma ku afwe, kuti atakaole, ati, ‘Ndakupeela upolelelo wamuzilo uwa mpomvu uno nalavile kuli Davidi.’

³⁵ Cumi ndi vino wavwanzile mu ciputulwa cuze ca Masamu ati, ‘Utalazumilizya ukuti muomvi wako uwakutailwa aole.’

³⁶ Pano Davidi wacisile kulonda kwakwe Leza mu manda amu mukulo wakwe, nga lino wafwile yamuzisile pamwi ni vikolwe vyakwe, nu mwili wakwe waozile.

³⁷ Lelo cii citacitikile wiyo wino Leza wazyukwile kufuma ku afwe.

³⁸ Caleka, mwe inane mwensi, mulinzile kumanya vino kupitila sile muli Yesu Klistu amuno ilandwe pamulandu wa kwelelwa maifyo likakosolwa kunomuli.

³⁹ Mulinzile kumanya vino wensi uwataila munoli wene alaya uwakaele kufuma ku maifyo yonsi yano masunde yakwe Mose yatange yamukulule.

⁴⁰ Lyene, cenjelini, pakuti vino yakasema yavwanzile vitakamucitikile, vikati,

⁴¹ ‘Lolini, mwe antu amisowe! Zungukini nu kulowa! Pano lino muli aumi musyakutaila cintu cino nkucita ilelo, nanti angala umwi walondolola kunomuli!’”

⁴² Lino Paulo na Banaba yacili fuma mu ng'anda yamapepo, antu yayapapata kuti yace yakakosole nupya pi Sabata ililalondelela.

⁴³ Lino antu ali pa ukongano yasalangana, Ayuda na Akulukuwa aingi asenusi yalondela Paulo na Banaba. Atumwa yavwanga kunoyali nu kuyakomelezya kuti yatwalilile kwemelela mu cikuku cakwe Leza, wino uwali nu luse panoyali.

⁴⁴ Pa Sabata lyalondelile kweleula umuntu wensi mu muzi wizile ku kuvwa mazwi ya Mwene.

⁴⁵ Lino Ayuda yalola wingi wa antu, yuvwa uzuwa cuze, yalanda mazwi ya miponto akukanya vino Paulo wavwanganga.

⁴⁶ Lelo Paulo na Banaba yavwanga nu kupama yati, “Cali campomvu kuti tutandikile kukosola mazwi yakwe Leza kunomuli. Lelo pakuti mwayakana nu kuipingwila vino mutalingine kuya nu umi wape, swemo tumamusya nu kuya ku Akulukuwa.

⁴⁷ Pano Mwene watupeela ilamulo lii, lyakuti, ‘Namucita kuya wa luswepo pa antu Akulukuwa, pakuti mutwale ilandwe lya ufyusi ku antu amu nko zyonsi.’”

⁴⁸ Lino Akulukuwa yuvwa cii, yazanga nu kutasya ilandwe lya Mwene. Na yao yonsi yano Leza wasolwile kuti yaye nu umi wape, yataila mu Mwene.

⁴⁹ Lyene izwi lyakwe Leza lisalangana konsikonsi mu mpanga ilya.

⁵⁰ Lelo intunguluzi zya Ayuda yatunkola anaci Akulukuwa akama apepanga Leza ni nkombe zyamu musumba izicindame.

⁵¹ Atumwa nao yakunta lukungu lwa ku ngazo zyao kuya umboni kuno yali, yapita ku Ikoniamu.

⁵² Lelo alondezi amu Antioki yazuziwa nu luzango nga na Mupasi Wamuzilo.