Milimo 11 - Amazwi Yakwe Leza 2013

¹ Atumwa pamwi na ataile yano ali mu Yudeya yuvwa ukuti na Akulukuwa kwene yati yapokelela izwi lyakwe Leza.

² Lino Petulo wiza ku Yelusalemu, yao alondanga ukuti Akulukuwa yasilamulwe yapazyanya nawe yati,

³ “Wemo waile ufikila ku mang'anda ya Akulukuwa yano atasilamulwa nu kulya pamwi nao!”

⁴ Lelo Petulo ayalondolwela vyonsi kufuma sile vino cali pa kutandika.

⁵ “Lino napepanga mu musumba wa Yopa, naweni cilolwa. Naweni cintu cimwi cikoline wa cisalu cikulu cikwika pansi ku masempele yakweco yani, ala cikufuma mwiyulu, nga cifika panondi.

⁶ Nceceta mukasi kaciko, nga ndola inyama zya muzi ni zya mpanga, ni visela nga ni vyunyi vya mpanga.

⁷ Lyene nuvwa izwi likuti, ‘Petulo, katuka koma ulye!’

⁸ Lelo nemo inti, ‘Awe, Mwene! Cumi kusi cintu cimwi citasanguluka nanti cikowele catala cingila mu mulomo wane.’

⁹ Nupya izwi livwanga kufuma mwiyulu liti, ‘Vino Leza wasangulula utataka ukuti vikowele.’

¹⁰ Cii cacitike amaila yatatu, na pakusyalikizya cintu cii consi cikweziwa kwiyulu.

¹¹ Pa kasita kwene kaka, antu yatatu atumilwe kunondi kufuma ku Kesaliya yafika pa ng'anda pano nikalanga.

¹² Mupasi Wamuzilo anena kuti tupite nao kwaula kuzingota. Na inane mutanda, ataile aku Yopa, yansukilile ku Kesaliya, swensi twingile mu ng'anda yakwe Konelio.

¹³ Nawe atunena vino waweni mungeli aimi mu ng'anda mwakwe, amunena ati, ‘Tuma umuntu umwi ku Yopa kuya aama umuntu izina lyakwe Simoni Petulo.

¹⁴ Ali nu kuvwanga amazwi kunuli yano wewe na amu ng'anda yako muli nu kutuulilwamo.’

¹⁵ Lyene lino natandike kuvwanga, Mupasi Wamuzilo wikila pano yali wakwe vino wikile na pali sweswe kwene kufuma pa kutandika.

¹⁶ Lyene nani niwisye vino Mwene wavwanzile ati, ‘Yoane wawatizyanga na manzi, lelo mwemo mulawatiziwa na Mupasi Wamuzilo.’

¹⁷ Cintu cii cili paswe, cino Leza wapile Akulukuwa uwila uli umwi na uno wapile kunotuli lino twataile mu Mwene Yesu Klistu. Caleka, nali nene weni wakuti nkanye Leza!”

¹⁸ Lyene lino yuvwa vintu vii, yata kupazyanya nawe, lelo yati, “Lyene Leza watapela Akulukuwa isyuko lya kuzenzuka kuti yaye nu umi!”

Iuvi lyamu Antioki

¹⁹ Yao ataile yasalangine pamulandu wakuzunyiwa ukwatandike lino yakomile Sitivini. Yamwi yafisile ku Fonisya, ku Kupulo mpaka nu ku Antioki, ala yakukosola ilandwe ku Ayuda yatupu.

²⁰ Lelo yamwi muli yao ataile, aonsi afumile ku Kupulo nu ku Kuleni, yaile ku Antioki yakukosola ilandwe nu ku Akulukuwa kwene, yayanena Ilandwe Lisuma lya Mwene Yesu.

²¹ Amaka ya Mwene yali nao, na antu aingi cuze yataila yaseleukila ku Mwene.

²² Impwelo pali cii yafisile nu kwi iuvi lyaku Yelusalemu, caleka yatumile Banaba ku Antioki.

²³ Lino wafisile nu kulola vino Leza wapolelile antu, aya nu luzango nga ayanena yonsi kuti mu myenzo yao yatwalilile mu utailo ni cumi ku Mwene.

²⁴ Banaba wali umuntu musuma, uwazuziwe na Mupasi Wamuzilo, nga nu utailo. Antu aingi yataile mu Mwene.

²⁵ Alino Banaba aya ku Taliso kukulonda Saulo.

²⁶ Lino wamuzana, amuleta ku Antioki. Lyene mwaka uwa onsi upuma oili kwene yakongana pamwi ni iuvi nu kusambilizya ali mwenemo. Ku Antioki akuno alondezi yatandike ukwamwa aina Klistu.

²⁷ Mu manda yalya yakasema yamwi yafumile ku Yelusalemu iiza ku Antioki.

²⁸ Wenga uwa munoyali uwizina lyakwe Agabasi, aimilila, nga mu maka ya Mupasi Wamuzilo asema pa cipowe icali nu kwiza umu nsi yonsi. (Cii, icizile lino Kalaudio wali a kateeka).

²⁹ Lyene alondezi yonsi yuvwana ukusangula vya kutuma ku kwazwa aina Klistu yauze aku Yudeya, nga cila muntu asangula kulingana na pano akwatile.

³⁰ Vii, avino yacisile nga yapela Saulo na Banaba musangulo uwo kuti yatwale.