Mika 7 - Amazwi Yakwe Leza 2013

Imiyele iipe ya ina Izlaeli

¹ Ala ncule mwe! Nemo indi wa muntu ali ni nzala wino afumile akusokota amatingi umu calo lelo ukwaula kuzana nanti cimwi cakulya. Nupya kutasile nanti amasamvu yano watemilwe.

² Antu acumi yatacilipo pa mpanga ya pano pansi, kusi nanti wenga akacita ivilungame. Yonsi kwene yakateyamila auze kuti yayakome. Cila muntu akateya ulukose lwakulemyamo umwina.

³ Yene a yafundi apakucita iviipe. Intunguluzi zikalenga amawila, na yakapingula nayo yakalonda amafukakanwa. Antu yamaka nayo yanena antu iviipe vino yakasi. Avili vino yene yakaumana akapi.

⁴ Umuntu umusuma ukuluta auze ali ungati ivikona, uwacumi nawe akoline cimpinda ca myunga. Uwanda uno Leza alavunuka antu watiufika, ndi vino wayacewile ukupitila muli yakalinda yao, yakasema. Lyene ndakai yatiyavulunganyiziwa.

⁵ Utataila mu mwinipamba, nanti ukusintilila muli cuza wako. Utekele pa mazwi yano ungavwanga nanti alilyo lino ukuvwanga ku wako.

⁶ Pano ndakai ana aonsi yasikucindika yaisi, na ana anaci yakukatukila yanyina. Na ana yakaci nayo yakukatukila yanyinavyala. Amu ng'anda ya muntu ali anisi yakwe aipisye.

⁷ Lelo nemo namapempukilwa kuli Yawe. Namalolelanga Leza Katuula wane. Leza wane amanguvwa.

Yawe watuula antu yakwe

⁸ Mwe anisi yitu mutatuseka. Nanti angala twatitupona, lelo tumakatuka. Nanti angala twatitwikala mu mfinzi, Yawe ali luswepo lwitu.

⁹ Twifya kuli Yawe, acino lyene tulinzile kuzizimizya ukali wakwe, mpaka ace atuvwangile nu kuzifya umulandu witu. Wene alatwingizya mu luswepo, alino tulalola kuno akututuula.

¹⁰ Lyene anisi itu yalalola ivintu vii, nga insonyi zilayalema antu yano yakauzya sweswe yati, “Uzye Yawe Leza winu ali kwi?” Ndalola ukucimviwa kwao, yalalyatolwa wa matipa mu museo.

¹¹ Mwe antu aku Yelusalemu, insita iliza ya kukuula amalinga inu, insita ino yanande inu yalavungululwa.

¹² Mu wanda ulya antu yako yalawela kunuli ukufuma ku Asilya ukufika nu ku Eguputo kwene, ukufuma ku Eguputo ukufika nu ku Luzi lwa Yufulate kwene, nu kufuma kuli yemba wenga ukufika nu ku muze kwene, ukufuma ku mwamba onga ukufika nu ku uze kwene.

¹³ Insi ilasanguka iye ulwanga pamulandu wa vicitwa viipe vya aikazi ya mwenemo.

Yawe waya na mizu pa ina Izlaeli

¹⁴ We Yawe sungala wacema antu yako uku nsonzo yakuyakumbilizya, utungulule ufyo wa mfwele zyako zino waisolwela. Ndakai zitenzi zyonga mu mutengo, mu mpanga yamulemvwe yakucemelamo ivunde. Lelo zitini ziye zikalye mu mpanga yamulemvwe, yakucemelamo yaku Basyani nu ku Gileadi, ndi vino cali mu manda ampiti.

¹⁵ Yawe akuti, “Ndayalanga ivizungusyo vyane, wakwe vino cali mu manda yano yafumile mu Eguputo.”

¹⁶ Antu amu nko zyuze lino yalalola ivintu vivyo yaluvwa insonyi, nanti angala yakwata amaka uli. Yalalemelela apa milomo, nu kufundika amakutwi apa kupelembekela.

¹⁷ Yalaakulika mu lukungu wa nzoka, wa viumbwa vino vikasela pansi. Yalafuma mu misumba yao yamalinga ala yakuzakaza uku ntete. Yalawela ni coopo kunuli we Yawe Leza witu, nu kuvwa intete pali wewe.

¹⁸ Uzye a Leza cii akoline nawe, wino angelela amaifyo, nu kwelela amaifyo ya antu yakwe asyala? Wemo usisoka mpaka umuyayaya, lelo ukaya nu kutemwa kwa muntaputuka.

¹⁹ Nupya kwene ulaya ni nkunkunsi kunotuli. Ulalyatola amaifyo itu, nu kuvwintila ukakasi witu mu maziya pali yemba.

²⁰ Ulalanga uluse ku amu mupanda wakwe Yakobo, nu kutemwa kwako kwa muntaputuka ku amu mupanda wakwe Abulaamu, ndi muno walaile ivikolwe vitu uku mpiti.