Mika 6 - Amazwi Yakwe Leza 2013

Yawe wapeela Izlaeli umulandu

¹ Uvwini lyene vino Yawe akuvwanga ati, “Katuka, ulande umulandu wako pa manso ya myamba. Si leka ni milundu yuvwe amazwi yako.

² Mwe myamba, uvwini umulandu uno Yawe wasiika, namwe kwene mwe mifula yamuyayaya ya nsi ii. Pano Yawe akupeela antu yakwe umulandu. Wene akupeela aina Izlaeli umulandu.”

³ Yawe akuti, “Mwe antu yane, uzye icani cino namucita? Uzye namusakamika uli? Njasukini!

⁴ Nemo namufumizye mu mpanga ya Eguputo. Namupuswisye ku uzya umu mpanga muno mwali azya. Alino ntuma Mose, Aloni, na Milyamu kuti yamutungulule.

⁵ Mwe antu yane, iusyini vino Balaki umwene waku Moabu, walondanga kucita kuno muli, nga na vino Balamu umwana umonsi wakwe Beoli wamwaswike. Iusyini ivintu ivyamucitikile, apa lwendo lwinu lwakufuma ku Syitimu nu kuya ku Giligali. Iusyini ivintu vii vyonsi kuti mumanye vino ne Yawe namucitile apa kumutuula.”

⁶ Uzye namatwalila Yawe cani, lilyo lino nkuya ku kukupepa Leza Wapapela? Uzye namamutwalila ana ya ng'ombe amwaka onga kuti nkamutuulile amawila akoca?

⁷ Uzye Yawe alazangila muli yasuuku amazimbi, nu mu nguzi izisikama zya mafuta ya miolivi? Uzye ningapela iyeli lyane kuti nkululwe uku maifyo yane? Uzye umwana wane angaya impolelwa yakulipila apa maifyo yane?

⁸ Awe, Yawe wakulanga mpiti, we muntu we, icintu icisuma. Ivintu vino wene akasi kuti wacita aivi: Uwacita vilungame nu kuya na mizu, nga nu kupita mu ufuke pa manso yakwe Leza wako.

Aina Izlaeli yifya, nga yavunukwa.

⁹ Icintu camano ukoopa izina lyakwe Yawe. Wene akulaizya ku ikazi amu Yelusalemu ati, “Uvwini kuno, mwe ikazi amu Yelusalemu mwensi.

¹⁰ Uzye nemo ningilila uli icuma icili mu mang'anda ya antu aipe, cino yalonka mu ucenjezi, nga nu kuomvya vipimilo vyaufi vino nemo napata?

¹¹ Uzye ningelela uli umuntu wino akaomvya inteko zya ucenjezi, nanti umuse wa usomvi?

¹² Antu akama yakaliila auze pa mutwe. Antu yonsi antumpu, yikalila sile ukusomba.

¹³ Caleka natintandika ukonona mwemwe, ukutanganya mwemwe pamulandu wa maifyo inu.

¹⁴ Mumalyanga lelo ukwaula ukwikuta. Mumauvwanga inzala lyonsi. Mumakoozya vintu lelo vitalasungwa. Pamulandu wakuti vintu vino mulasunga vilononwa umu nkondo.

¹⁵ Mulakomela lelo mutalazombola, muleenga amafuta ya miolivi, lelo mutalayaomvya. Mulafena amatingi lelo mutalamwa waini wayako.

¹⁶ Mwemo mwalondela ivicitwa viipe vyakwe Omuli ni vicitwa vyonsi vya ang'anda yakwe Aabu. Mukasunga ni ntambi zyao zyonsi. Caleka ndamulovya, na antu yonsi yalamusuula, nga na antu amu nko zyuze yalamusoweka.”