Mika 5 - Amazwi Yakwe Leza 2013

Leza walaya kupeela kateeka ukufuma ku Betelemu

¹ Lyene konganikini impuka zya vita, mwe ikazi yaku Yelusalemu, pano anisi yatiyatuteyamila. Yene yakupoola intunguluzi ya ina Izlaeli umunzekete ni mbuungo.

² Yawe akuti, “Lelo we Betelemu waku Efulata, nanti angala wewe munono mu misumba yakwe Yuda, lelo munuli ndafumya umuntu wino alateeka aina Izlaeli. Intuntuko yakwe wiyo iya mpiti mpiti, kutandikila sile uku katalili.”

³ Caleka Yawe alatazyela Izlaeli, mpaka ukufika na pa nsita ilya, lino mangu wilya wino ali pipi nu kupapa alalela umwana. Lyene asyala amu mutundu wakwe yalaswilila ku ina Izlaeli yauze.

⁴ Lino aliza, wene alaposya nupya alacema imfwele zyakwe mu maka yakwe Yawe, nu mu ucindami wi zina lyakwe Yawe Leza wakwe. Alino yene yalikala mu mutende, pano ukulu wakwe ulafika nu kumpela ya nsi kwene.

⁵ Aliwe kwene alaleta umutende. Lino aina Asilya yalingila mu mpanga itu nu kutandika ukutuponyezya inkondo, tulatuma yamusika ya vita cinimbali, nanti intunguluzi zyamaka cinani ku kuyalwisya.

Ukukululwa nu kuvunukwa

⁶ Yene yalacimvizya aina Asilya ku lupanga, ni mpanga yakwe Nimulodi yalaicimvya umu nkondo. Yene yalatukulula ku ina Asilya, lilyo lino yalingila mu mpanga itu, ku kutuponyezya inkondo.

⁷ Lyene antu yakwe Yakobo asyala yonsi yalaya pakasi ka mitundu ingi ya antu, wa lumi ulwafuma kuli Yawe. Yalaya wa mvula ino ikutonya pa mulemvwe, ino isilolela ukunenwa nu muntu, nanti umuntu aipeele ilamulo.

⁸ Antu yakwe Yakobo asyala yonsi yalalulumba umu antu amu nko zyuze, pakasi ka antu aingi, wakwe cisama wino akulunga cakuti angalya. Yalaya wa mwana wakwe cisama, pakasi ka ufyo wa mfwele, wino ndi wazingilila, azivwantukila nu kuzilepola. Nga lelo kusi umwi wakuzipususya.

⁹ Mwe ina Izlaeli mulalwa na anisi inu, nga anisi inu yonsi yalononwa.

¹⁰ Lelo Yawe wavwanga wati, “Mu wanda kwene ulya ndonona imfwalasi zinu yonsi, nu kuvunola amaceleta inu.

¹¹ Ndonona imisumba yamu mpanga inu nu kuwisya amalinga inu.

¹² Ndonona amalele inu yonsi, nga pakasi kinu patalaya yakasapoola.

¹³ Ndonona amaunkolanya inu yonsi kumwi ni vipilala vya mawe vino mukapepela penepo mu mpanga inu. Mutalatala mufukamile vintu vivyo nupya, vino mwapanzile na makasa inu.

¹⁴ Ndawisya amaunkolanya inu yakwe Asyela umu mpanga inu, nu konona imisumba inu.

¹⁵ Mu ukali ni cipyu ndacita icilanduzi apa antu amu nko zyonsi yano yatanjezile.”