Mika 2 - Amazwi Yakwe Leza 2013

Ukufululwa kwakwe yayo akazunya apina

¹ Kalanda ku antu akapanga ukucita inkota, na kuli yao yano usiku onsi yakaelenganya ukucita iviipe. Lino yazyuka akatondo iyatandika ukucita iviipe, pano ala yakweti amaka.

² Yene yakakumbwa ivyalo nga yavipokolola. Lino yakwata ulwiswa lwa ng'anda, iyaipoka. Kusi umuntu na ang'anda yakwe nanti vino yakwata ivyacingililwa.

³ Caleka Yawe wavwanga wati, “Inkwelenganya ukumuponyezya imipamba, nupya mutalutuka awe. Muliukila sile ukuti muli umu ntazi, nupya mutalatala mupite cilumba cilumba, pano ilaya insita ya viipe.

⁴ Mu wanda ulya antu yalamutumfya. Yene yalamusoweka, mu lwimbo luu ulwa ndosya yati, ‘Twatitononwa ukumalilika. Impanga ino Yawe watwankanya, nayo kwene yatiyaipoka! Ivyalo vitu wavyankanya kuli yao atusenzile mu uzya.’

⁵ Acino lyene lino insita ilafika, iyakuti impanga ilya ipelwe ku antu yakwe Yawe, kutalaya icipande cimwi cino cilaankanyiziwa kuli wensi uwa munomuli.”

Yakasema yaufi

⁶ Antu iyavwanga kunondi yati, “Utasema, Utasema pa vintu vii. Ala swemo tutamazewana awe.

⁷ Uzye ukwelenganya ukuti amu mupanda wakwe Yakobo yalinzile ukunenwa vii vyonsi? Uzye Yawe camufulila ukuteeka umwenzo? Uzye icumi kwene wene alacita ivyamusango uu? Uzye wene asilanda amazwi yamutembo ku antu akacita ivisuma?”

⁸ Yawe akuti, “Lelo mwemo mukakatukila antu yane wa mwanisi. Antu yakufuma ku nkondo, ala yakwelenganya ukuti kumwao kuli umutende. Lelo mwemo mukayafisamila, imwelenganya ukuyapoka imingila yao ino yazwite.

⁹ Mukazinga aci ya antu yane mu ng'anda zyao zino yatemwa, nupya mwapokolola ana yao upolelelo uno nayapeela uwamuyayaya.

¹⁰ Katukini, mwapita! Pano pa cifulo ci patacili umutende. Amaifyo inu yatiyaletelela icifulo cii ku ononesi.

¹¹ Umuntu umwi uwantumpu ndi wapita konsi konsi afuma akusema vyantumpu ala akuti, ‘Endi, mulakwata waini nu wengwa nyanya,’ kasema wamusango uu awino antu yatemwa!”

Ulayo wa kutuulwa

¹² “Lelo mwe amu mupanda wakwe Yakobo, ndamukonganika pamwi mwensi. Mwensi mwe ina Izlaeli asyala ndamukonganika pamwi ungati mfwele mu citata, ungati ufyo umu ncende ya uko iyakucemelamo. Nupya kwene antu yalazuula wakwe cimwi mu mpanga inu.

¹³ “Leza alacingula inzila nu kuyatungulula ukufuma mu uzya. Yene yalapangula impongolo zya musumba nga yafume antungwa. Umwene wao aliwe alayatungulula pa kufuma, Yawe aliwe alayakolelela.”