Mika 1 - Amazwi Yakwe Leza 2013

¹ Mu manda ya kuteeka kwa mwene Yotamu, na kwakwe Aazi nga na kwakwe Hezekiya, ali yamwene aku Yuda, Yawe anena Mika waku Molesyeti amazwi. Nga ivintu vii vili vino wene waweni mu cilolwa ivikumile Samaliya na Yelusalemu.

Aina Samaliya na Yelusalemu yapeelwa imilandu

² Uvwini, mwe antu amu mitundu yonsi, Si tezyini mwe antu mwensi, mwemuno mukaikala pano nsi. Yawe Wamaka yonsi ali mu Ng'anda yakwe ikulu, nga akumusinila pa milandu inu.

³ Lola! Yawe akwiza ukufuma ku Ng'anda yakwe ikulu ya mwiyulu. Wene akwika nga akulyatokela pa tunsonsi twa myamba.

⁴ Imyamba iyo ikusunguluka pano walyata ungati ipula mu moto, nga ni vyati visunguluka ivikonkolokela mu vifoloma, wa manzi akukonkolokela ku mikonko.

⁵ Vyonsi vii vilacitika pamulandu wa kwifya kwakwe Yakobo, pamulandu wa maifyo ya amu mupanda wakwe Izlaeli. Uzye aweni angapeelwa umulandu pa kwifya kwa ina Izlaeli? Uzye asi aina Samaliya? Uzye aweni angapeelwa umulandu pa kwifya kwa ina Yuda? Uzye asi ina Yelusalemu?

⁶ Caleka Yawe akuti, “Ndonona Samaliya wiyo, mpaka aye itongwa, umwakulema amatingi. Amawe yakwe ndayafumfumwila mu cifoloma, nu kufukula imifula yakwe.

⁷ Utuluwi twakwe tonsi tulaputolwa mpaka tusyale utumpilinsya, nga na mawila ya ng'anda zyakwe zikulu zyonsi yalononwa ku moto. Ndatamola vyaunkolanya wakwe vyonsi. Wene wakolonginye amawila ukufuma ku malipilo yakwe yacizelele, caleka yauze yalayaomvya mu mulimo wakulipila yacizelele kuze.”

Ukulilizika nu kulosya Yelusalemu na Yuda

⁸ Alino Mika avwanga ati, “Pamulandu wakwe vii ndalosya nu kupooma. Ndapita ukwaula cimwi ku ngazo nupya ndindizya. Ndawata wakwe nkusa nu kulila wakwe sinsimwe.

⁹ Pano ivilonda vyakwe Samaliya vitangapoziwa awe, nga Yuda nawe wasya acule mu musango uli umwi kwene. Uononesi watiufika pa mpongolo ya musumba wa antu yane, wafika mpaka nu ku Yelusalemu kwene.”

Anisi yapalama ukufika ku Yelusalemu

¹⁰ Mutanena anisi itu aku Gati pa kucimviwa kwitu, nupya mutaleka kuti yalole kuno mukulosya. Mwe ikazi aku Beti Leafula, muivumvunye mu lukungu, pakuti antu yalole ukuti muli nu ulanda.

¹¹ Mwe ikazi aku Safili, mulasendwa ku uzya, ala muli tupu nga muluvwa insonyi. Yao akaikala mu Zaanani yatalafuma mu musumba wao, awe. Lino muluvwa aikazi yaku Beti Ezele yakulosya, ali lino mulamanya ukuti kuku kutacili ukwa kuzina.

¹² Aikazi aku Maloti yakulolela upemwilo ntetentete, pamulandu wakuti Yawe wayaponyezezya uononesi, apipi ni mpongolo zya musumba wa Yelusalemu.

¹³ Mwe ikazi aku Lakisyi, nyepelelini imfwalasi zinu ku maceleta. Mwemwe mweleuzyanga amaifyo ya ina Izlaeli, nga imuleka aikazi aku Yelusalemu yifya.

¹⁴ Caleka mwe ikazi aku Yuda, pakasyini umusumba wa Molesyi Gati. Aikazi aku Akizibu yalasomba yamwene aku Izlaeli.

¹⁵ Namwe mwe ikazi aku Malesya, ndamutumila anisi kuti yamucimvye. Intunguluzi zyamu Izlaeli zilaya zikafisame mwi cele lyaku Adulamu.

¹⁶ Mwe antu aku Yuda, pelini inyele, pakulanga ukuti mukulosya ana inu yano mwatemwa. Mule mupele ulukuzu mpaka muloleke wa makozi, pamulandu wakuti ana inu yalasendwa uku uzya.