Mateo 9 - Amazwi Yakwe Leza 2013

Yesu wapozya cite

¹ Yesu apatama mu wato, alambila ku mbalama yuze yakwe yemba, nga aya ku musumba kuno wikalanga.

² Lyene lilyo kwene aonsi yamwi yamuletela umuntu wino uwali cite, ala aizi pa cintamba. Lino Yesu walola utailo wao, anena icite ati, “Mwanane utasakamala! Maifyo yako yelelwa.”

³ Lyene yakasambilizya ya Masunde yamwi yaivwanzya aisikulu mu myenzo yao yati, “Umuntu wii akuvwanga mazwi ya misuli kuli Leza!”

⁴ Lino Yesu wamanya vino yakwelenganya mu myenzo yao ayauzya ati, “Uzye pacani mukwelenganya viipe mu myenzo inu?

⁵ Uzye icangupala icani, kunena umulwale ukuti, ‘Maifyo yako yelelwa,’ nanti ukuti, ‘Katuka utandike nu kupita?’

⁶ Nkasi musininkizye ukuti Mwana wa Muntu ali na maka muno nsi akwelela amaifyo.” Lyene avwanga ku cite ati, “Katuka, nyemula icintamba cako pitanga ukwako.”

⁷ Umuntu nawe akatuka apita ukwakwe.

⁸ Lelo lino maumba yacilola yuvwa intete, yalumbanya Leza, pa kupeela antu amaka ali ndi yaa.

Yesu waama mateo

⁹ Lino Yesu wafumanga kuku, alola kasonkisya izina lyakwe a Mateo, ala atenzi mu ng'anda ya musonko. Alino Yesu amunena ati, “Ndondela.” Mateo nawe akatuka amulondela.

¹⁰ Lino Yesu na alondezi yakwe yali pa cakulya mu ng'anda yakwe Mateo, yakasonkesya aingi na yakaifya kwene, iiza yalya pamwi nawe.

¹¹ Lino Afaliseo yacilola, yuzya alondezi yakwe yati, “Uzye pacani cino kasambilizya winu akalila pamwi na yakasonkesya na yakaifya?”

¹² Pa kuvwa cii, Yesu nawe ayanena ati, “Antu apuma yasilonda sing'anga, suka sile alwale.

¹³ Acino kasambililini mazwi mu malembelo vino yakusenula, yano akati, ‘Nkulonda kuti mwalanga uluse ku antu yauzo kuluta kundetela impolelwa.’ Ntiza kukwama aololoke, lelo nizila yakaifya.”

Kuizilizya ukulya

¹⁴ Lyene alondezi yakwe Yoane kawatizya iiza kuli Yesu yamuzya yati, “Uzye pacani cino swemo pamwi na Afaliseo tukaizilizya ukulya, lelo alondezi yako yene yasyaizilizya ukulya?”

¹⁵ Yesu aasuka ati, “Uzye asukilizi ali pa cimulo ca winga yangikala akungumale lino yali pamwi na siwinga? Citangaya vivyo! Lelo manda yaliza lino siwinga alasendwa kufuma pano yali, lyene alino yalaizilizya ukulya.

¹⁶ Kusi umuntu akakampika cikampa cipya pa nsalu yampiti, pano cikampa cipya cilakambatuka ku nsalu yampiti nu kukuzya icipongo penepo.

¹⁷ Nanti uzye antu yangitulwila waini mupya mu nyambi zyampiti? Ndi yacita vivyo, nyambi zingalepuka, na waini angitika, nga ni nyambi zyononeke. Lelo waini mupya alinzile kwitulwilwa mu nyambi zipya, kuti inyambi na waini vitononeka.”

Yesu wapozya mwana yailo nu mwanaci umwi

¹⁸ Lino acili akuvwanga amazwi yaa kunoyali, umwi uwali intunguluzi iyamu cifulo cii, aiiza kunoli. Alino amufukamila, amunena ati, “Mwanane kaci wafwa likwene. Lelo tuye ukamwikepo ikasa lyako, nga amaya umumi.”

¹⁹ Alino Yesu pamwi na alondezi yakwe yakatuka, yapita nawe.

²⁰ Umwanaci umwi uwalwile cendamongo pa myaka ikumi na iili aiiza kucisila cakwe Yesu. Alino akumya kwi sempele lya nsalu yakwe,

²¹ ala akwelenganya ati, “Ndi ningakumya nanti ku nsalu yakwe sile, namapola.”

²² Lelo Yesu aseleuka amulola, amunena ati, “Kaciwe, teku mwenzo utasakamala! Utailo wako wakupozya.” Pa kasita kwene kako mwanaci apola.

²³ Lyene Yesu aingila mu ng'anda ya ntunguluzi yamu cifulo cici. Alino alola antu alizyanga mitolilo, nga ni umba lya antu ilyalosyanga.

²⁴ Lyene avwanga ati, “Fumini! Umukazyana atafwile, lelo watakasula sile.” Lelo yene yamuseka.

²⁵ Pacisila ca kufumya iumba panzi, Yesu aingilamo, alemelela umukazyana ikasa, nga nawe akatuka.

²⁶ Awe mpwelo ya cintu cii isalangana mu mpanga yonsi.

Yesu wapozya impafu ziili

²⁷ Lino Yesu wafumanga kuku, impafu ziili zimulondela zilaizya ziti, “We Mwana wakwe Davidi, ya na mizu kunotuli!”

²⁸ Lino wingila mu ng'anda, impafu ziya kunoli, nga Yesu azyuzya ati, “Uzye mukutaila vino ningamupozya?” Alino nazyo zimwasuka ziti, “Endi Mwene.”

²⁹ Lyene azikumya mu manso ati, “Pamulandu wa utailo winu, ciye vivyo kwene.”

³⁰ Alino yatandika kulola. Lyene Yesu ayapeela ilamulo kuti yatanena umuntu nanti umwi.

³¹ Lelo yene yapita nu kusalanganya ilandwe mu mpanga ilya yonsi.

Yesu wapozya ciulu

³² Lino antu yaa yaili apoziwa yakufuma, antu yamwi yaletela Yesu umuntu uwali nu mupasi wankota, nupya wali a ciulu.

³³ Lyene lino Yesu wafumya mupasi wankota, umuntu atandika kuvwanga. Iumba nalyo lizunguka cuze, liti, “Cintu ca musango uu citatala caloleka mu Izlaeli.”

³⁴ Lelo Afaliseo yavwanga yati, “Mu maka ya mwanangwa wa mipasi yankota amuno akafumizya mipasi yankota.”

Yesu waya ni nkunkunsi pa antu

³⁵ Lyene Yesu apitana mu misumba nu mu mizi yonsi kwene, ino yali pipi na yemba uwaku Galile. Wene asambilizya mu mang'anda ya mapepo nu kukosola Ilandwe Lisuma lya Wene wakwe Leza, nu kupozya indwala zya misango yonsi, ni ndema.

³⁶ Walanga walola maumba, aya ni nkunkunsi pano yali apelelwe nupya aculisye, kwati imfwele izitakweti kacema.

³⁷ Alino anena alondezi yakwe ati, “Uzombozi uukulu cuze, lelo aomvi yati yacepa.

³⁸ Caleka pepini ku mwine wa uzombozi kuti atume aomvi nayauze ku uzombozi wakwe.”