Mateo 8 - Amazwi Yakwe Leza 2013

Yesu wapozya umuntu uwalwile tembwe

¹ Lyene lino watentemuka mwamba, maumba akulu cuze yamulondela.

² Lyene umuntu uwalwile tembwe aiiza kuli Yesu, afukama ati, “Mwene, ndu kasi ungampozya.”

³ Yesu atambalika ikasa lyakwe amulemelela, nga amunena ati, “Nkasi, pola!” Lilyo kwene umuntu apoziwa kuli tembwe,

⁴ Yesu amunena ati, “Utanena umuntu nanti umwi pali cii. Lelo yanga kuli simapepo kuti akakulole, upele impolelwa ino Mose wamunenyile, pakuti yonsi yasininkizye vino watupoziwa.”

Yesu wapozya muomvi wakwe musika wa mpuka ya vita umwanda onga

⁵ Lino Yesu wingila mu Kapenaumu, musika wa mpuka ya vita umwanda onga vya Ciloma aiiza kunoli amupapata

⁶ ati, “Mwene, muomvi wane umulwale nupya ali ku ng'anda pa musanzi. Wene atangapita nupya akuwaika cuze.”

⁷ Yesu nawe amunena ati, “Namaiza mupozye.”

⁸ Lelo musika wa vita amunena ati, “Mwene nemo ntalinzile kuti wize mu ng'anda yane. Lelo vwanga sile izwi, nu muomvi wane amapola.

⁹ Pano nani kwene, nene muntu uwalasikwa na maka ku uteko pi sika lya ntunguluzi zikulu. Nani kwene nakwata asilika yano nkaangalila. Ndi nanena wenga nati, ‘Pita!’ Nawe apita, nu ku muze inti, ‘Iza!’ Nawe aiiza, nupya ndi nanena muzya wane nati, ‘Cita cii!’ Nawe acita.”

¹⁰ Lino Yesu uvwa cii, azunguka cuze, anena yano amusukilile ati, “Namunena vino ntatala nalola umuntu wa utailo wakwe uu.

¹¹ Cumi namunena nati, nayauze aingi yalafuma mu nsi yonsi nu kwikala pali pamwi na Abulaamu na Isaki na Yakobo mu Wene wa mwiyulu.

¹² Lelo antu yano yange yaye mu wene yene yalasumbwa kunzi mu mfinzi, mumo muno yalalila nu kulumanya ncecete pamulandu wa kuwaika.”

¹³ Lyene Yesu anena musika ati, “Pitanga, cimacitika ndi vino watutaila.” Nu muomvi wakwe apoziwa kasita kwene kako.

Yesu wapozya antu aingi

¹⁴ Alino Yesu aingila mu ng'anda yakwe Petulo, nga azana nyinavyala Petulo aizi pa musanzi ala umulwale impepo.

¹⁵ Lyene amukumya pi kasa ni mpepo nayo isila, nga umulwale akatuka atandika nu kumupeela ivyakulya.

¹⁶ Lyene manguzi yamuletela antu aingi ali ni mipasi yankota, nawe aifumya kwi zwi nga apozya na alwale onsi.

¹⁷ Cii cacitike kuti cifikiliziwe cino kasema Ezaya wavwanzile ati, “Wene watozile indema zitu, asenda ni ndwala zitu.”

Antu alinzile kulondela Yesu

¹⁸ Lino Yesu walola maumba yamuzinguluka anena alondezi yakwe kuti yalambe ku mbalama yuze.

¹⁹ Kasambilizya wa Masunde umwi aiiza, amunena ati, “Namakulondela konsi kuno umaya.”

²⁰ Yesu amunena ati, “Yankusa yakwata ininga umwa kulala, ni vyunyi vyakwata ivinsanzo, lelo Mwana wa Muntu atakwata pa kusamila mutwe wakwe.”

²¹ Nu mulondezi muze ati, “Mwene, leka ntale mpite kuti nkazike tata.”

²² Lelo Yesu amunena ati, “Ndondela, leka afwe yazike afwe yao.”

Yesu walesya cipupu

²³ Yesu apatama mu wato pamwi na alondezi yakwe nga yapita nawe.

²⁴ Mukupumikizya cipupu cikatuka pali yemba, cakuti maimbi yaapuma ku wato na manzi yaasempukila mukasi kauko. Yesu wene ala akaswile.

²⁵ Lyene alondezi yakwe yaya kunoli, yamuzyula yati, “Mwene tutuule, pano tuli pipi nu kuundwa!”

²⁶ Yesu ayanena ati, “Mwe ya utailo unono! Uzye pacani muvwa intete?” Lyene Yesu akatuka, alesya cipupu na maimbi, nga kuya cele.

²⁷ Na antu yazunguka yati, “Uzye wii umuntu wa musango cii, wino cipupu na maimbi vyamuyela?”

Yesu wafumya mipasi yankota mu antu

²⁸ Lino Yesu wafika ku mbalama yuze yakwe yemba, mu mpanga ya Gadala, antu yaili ali ni mipasi yankota yafuma ku malindi, yamukomanya. Yene yali akali cuze cakuti kutali umuntu wapitanga mu museo ulya.

²⁹ Yakomanya Yesu, nga yapunda yati, “Yesu, we Mwana wakwe Leza, uzye ukulonda cani kunotuli? Uzye wati wiza kuno kuti utucuzye lino kasita katali kafike?”

³⁰ Kwali ufyo wakwe yakapoli ukulu cuze ala ukulya katalamukila kufuma pano yali.

³¹ Caleka mipasi yankota ipapata Yesu iti, “Ndu matufumya, utuzinge tukingile mu ufyo wakwe yakapoli.”

³² Lyene nawe anena mipasi yankota ati, “Pitangini”, nga mipasi yankota ifuma munoyali, iya ingila muli yakapoli. Alino ufyo onsi utantamukila ku lwema, uponela muli yemba, umwela.

³³ Acemanga yakapoli yasimula yaya ku musumba, yaya yalanda vyonsi ni cacitike kuli yano ali ni mipasi yankota.

³⁴ Lyene antu amu musumba yafuma kuya komanya Yesu, nga lino yamulola, yamupapata kuti afume mu mpanga yao.