Mateo 7 - Amazwi Yakwe Leza 2013

Mutapingula auzo

¹ “Mutapingula auzo, kuti namwe Leza atakamupingule.

² Pano vino mukapingula auzo avino namwe mulapingulwa. Pelini namwe mulapelwa. Mulapelwa cilingilo cisuma cisindelwe, pano cilingilo cino mukalingila auzo, acino namwe Leza alamulingila.

³ Pacani ukulolekesya akakona akali mwi linso lya munyonko, lelo utasakamile mulando uli mwi linso lyako?

⁴ Uzye ungavwanga uli ku munyonko uti, ‘Mwinane, leka nkusisizye akakona mwi linso lyako,’ lino wemwisikulu uli nu mulando mwi linso lyako?

⁵ We musomvi we! Utale usisye mulando uli mwi linso lyako, alino umalola ningo pa kufumya akakona akali mwi linso lya munyonko.

⁶ “Mutapela yasimbwa vintu vyamuzilo, pano yalaseleukila kunomuli yamulume. Mutapela yakapoli vintu vicindame wa mawe yamutengo, pano yene yalavilyatola.

Ukulonda nu kukonkonsya

⁷ “Caleka namunena nati, lengini nga mumapelwa, londini nga mumazana, konkonsyini nga mumayulilwa.

⁸ Pano wensi akalenga akapelwa, na wino akalonda akazana, nga na wino akakonkonsya akayulilwa.

⁹ Uzye umwi muli mwe yaisi, mwana ndi wamulenga umukate ungamupeela iwe?

¹⁰ Nanti ndi walenga inswi uzye ungamupeela inzoka?

¹¹ Mwe yaipe mwamanya kupeela vintu visuma ku yana yinu. Uzye So uwa mwiyulu atalalusya kupeela vintu visuma kuli yao akamulenga?

¹² “Acino vintu vyonsi vino mukasi kuti antu yamucitile namwe kwene avino mwayacitila. Pano avino Masunde yakwe Mose nu usambilizyo wakwe yakasema vikalanda.

Mpongolo ifyenkane

¹³ “Ingililini pa mpongolo ifyenkane, pano mpongolo yakwingilila ku ononesi iisalale. Nu museo wakuilamo uusalale, nga na antu aingi yakaingila nu kupitamo.

¹⁴ Lelo mpongolo yakwingilila ku umi iifyenkane. Nu museo wakuilamo wene watala kulondela, cakuti antu akauzana anono sile.

Umuti ni vizao vyauko

¹⁵ “Cenjelini na yakasema yaufi, yano akaiza kunomuli mu ufuke kwati umwana wa mfwele, lelo mukasi kao yakoline wa mimbulu ikali.

¹⁶ Mulayamanyila ku milimo yao. Uzye antu yakakulula matingi ku munga, nanti masamvu kuli nkololwe?

¹⁷ Mu musango uli onga kwene, umuti onsi usuma ukaseeka vizao visuma, lelo umuti uwipe ukaseeka vizao viipe.

¹⁸ Umuti usuma utangaseeka vizao viipe, nu muti uwipe utangaseeka vizao visuma.

¹⁹ Umuti onsi uno usyaseeka vizao visuma ukakomwa, nu kusumbwa mu moto.

²⁰ Caleka mulayamanyila ku milimo yao.

Uwanda wa upinguzi

²¹ “Asi muntu wensi akangama ati, ‘Mwene, Mwene’ alingila mu Wene wa mwiyulu, suka sile yao akacita kulonda kwakwe Tata uwa mwiyulu.

²² Pa wanda ulya uwa upinguzi, aingi yalavwanga kunondi yati, ‘Mwene, Mwene uzye asi mwi zina lyako amuno twakosololelanga? Uzye asi mwi zina lyako amuno twafumizizye mipasi yankota, nu kucita ivinjelengwe?’

²³ Lyene nani ndayanena paswe inti, ‘Ntamumanyile, fumini pano, mwe yakacita ya viipe.’

Yakakuula ya Ng'anda Yaili

²⁴ “Caleka wino wensi akauvwa mazwi yane nu kuyayela, wene wakolana wa muntu wa mano, wino wakuuzile ng'anda yakwe pa lwala.

²⁵ Lyene imvula itonya, mulamba aiiza nu mukuku ni cipupu ciiza cipuma pa ng'anda iyo, lelo itaponyile, pano yakuuzilwe pa lwala.

²⁶ “Lelo wensi akauvwa mazwi yane nu kuntayela, wene wakolana wa muntu muwelewele wino wakuuzile ng'anda yakwe pa lusenga.

²⁷ Lyene imvula itonya, mulamba nawe aiiza ni cipupu ciza cipuma pa ng'anda iyo, nga nayo ipona, kupona kukulu cuze.”

Yesu wasambilizya na maka

²⁸ Lino Yesu wamala kuvwanga vintu vii, maumba yazunguka misambilizizye yakwe.

²⁹ Wene atasambilizyanga wakwe yakasambilizya ya Masunde, lelo wa muntu akweti maka.