Mateo 6 - Amazwi Yakwe Leza 2013

Ukupeela ku alanda

¹ “Mutacita milimo isuma kuti mwalolwa na antu. Pano ndi mumacita vivyo ale musi ni cilambu kuli So winu uwa mwiyulu.

² “Caleka lino mukupeela uwila kuli umwi, mutaleka yauze yamanye, wakwe vino asomvi yakacita mu mang'anda ya mapepo nu mu misolo kuti antu yayalumbanye. Cumi namunena vino yene yapokelela cilambu cao.

³ Lelo lino ukupeela uwila kuli umwi, utaleka umuntu umwi amanye cino ukucita,

⁴ pakuti uwila upelwe mu nkama. Na So wino akalola vino ukacita mu nkama alakupeela cilambu.

Ukupepa

⁵ “Na lino mukupepa, mutakolana wa asomvi! Yene yatemwa kwimilila nu kupepa mu mang'anda ya mapepo nu mu masansa ya miseo, kuti yalolwe na antu. Cumi namunena vino, yene yapokelela cilambu cao.

⁶ Lelo mwemo, lino mukupepa, ingilini mu muputule winu uwa mukasi, nga lino mwayala cisasa, mupepe kuli So asyaloleka. Na So akalola vino mukacita mu nkama alamupeela cilambu.

⁷ “Lino mukupepa, mutaswililoka mu mazwi wakwe vino antu atataila Leza yakacita, pano yene yakaelenganya ukuti Leza alaasuka mapepo yao atali.

⁸ Caleka lino mukupepa mutakolana nao. Pano So wene wamanya vino mukulonda lino mutali mumulenge.

⁹ Acino mwemo mwapepa mukuti, ‘Tata witu uwa mwiyulu, Izina lyako licindikwe,

¹⁰ Uwene wako wize, kulonda kwako kucitike pansi vino kukacitika mwiyulu.

¹¹ Utupeele vyakulya vitu vya manda pe.

¹² Utwelele maifyo itu vino naswe tukaelela yano akatwifya.

¹³ Utaleka tuponele mukweziwa kukome lelo ututuule ku Mwipe wilya.’

¹⁴ “Pano ndi mwemo mwelela antu lino yaifya kunomuli, So uwa mwiyulu nawe kwene alamwelela.

¹⁵ Lelo ndi musyakwelela antu maifyo yao, So nawe kwene atalamwelela maifyo inu.

Kusambilizya kwa pa kuizilizya ukulya

¹⁶ “Nupya lino mukuizilizya ukulya mutaya wa asomvi, akanyomeka mausyu yao pakuti antu yamanye vino yati yaizilizya ukulya. Cumi namunena nati, yene yapokelela cilambu cao.

¹⁷ Lelo wemo lino ukuizilizya ukulya, ufulale pa manso. Paka umutwe wako na mafuta,

¹⁸ kuti yauze yatamanya ukuti ukuizilizya ukulya suka sile So asyaloleka. Lyene So, wino akalola vino ukacita mu nkama alakupeela cilambu.

Kwika vyuma mwiyulu

¹⁹ “Mutaika vyuma vinu muno nsi, umwaya uwonyi ni ngalawa, muno aiivi yakatama nu kwiya.

²⁰ Lelo ikini vyuma vinu mwiyulu, mumo muno uwonyi ni ngalawa vitangalya, na muno aiivi yatangatama nu kwiya.

²¹ Pano ukuli vyuma vinu, ukuli ni myenzo inu kwene.

Manso ilampi lya kukozezya mwili

²² “Manso yakoline wi lampi lya kukozezya mwili. Caleka manso inu ndi yali ningo, mili inu nayo kwene ilazulamo luswepo.

²³ Lelo manso inu ndi yasi ningo, mili inu ilazulamo mfinzi. Caleka luswepo ululi munomuli ndi lwasenuka lwaya mfinzi, mfinzi iyo imaya ikulu cuze.

Leza ni vyuma

²⁴ “Pasi umuntu angaombela aene yaili; pano angapata wenga nu kutemwa umuze, nupya angayela wenga nu kusula umuze. Mutangaombela Leza nga ni vyuma.

²⁵ Caleka namunena ukuti mutasakamala pali vino mumalya pakuti muye nu umi, nanti pa vizwalo vyakuzwika imili inu. Uzye umi utalusile ivyakulya, nu mwili utalusile vizwalo?

²⁶ Lolini vyunyi vya mulwelele! Vyene visyakomela imbezu nanti kuzombola. Vyene vitakwata incende nanti inkoma mwakusezya vilyo. Lelo So uwa mwiyulu akavilisya. Uzye mwemo mutavilusile?

²⁷ Uzye aweni uwa munomuli, pa kusakamikwa kwakwe, angalundako wanda ku umi wakwe?

²⁸ “Pacani cino mungasakamikwa pali vino mumazwala? Lolini vino maluwa yakakula. Yene yasyaomba nanti kupikula vizwalo.

²⁹ Lelo namunena vino mwene Solomoni mukuyemba kwa kuzwala kwakwe konsi, wene atafisile nanti kukuyemba kwi luwa lyonga wakwe yaa.

³⁰ Leza akazwika isote lyamu mpanga, ililipo ilelo na mutondo lisontekwa umoto. Uzye wene atalalusya kuzwika mwemwe, mwe ya utailo unono?

³¹ “Caleka mutasakamala muti, ‘Tumalya cani? Nanti tumamwa cani? Nanti tumazwala cani?’

³² Suka sile antu atataila Leza alio yakasakamala pa vintu vii vyonsi. So uwa mwiyulu wene wamanya vino mukalonda vintu vii vyonsi.

³³ Mu cifulo cakwe cii mutale mulonde Uwene wakwe Leza nga nu wololoke wakwe, nga nawe alamupeela vintu vii vyonsi.

³⁴ Caleka mutasakamala pa vintu vya mutondo, pano uwa mutondo wene ulaisakamala uwisikulu. Amanda yasyacela mumwi.