Mateo 3 - Amazwi Yakwe Leza 2013

Kukosola kwakwe Yoane Kawatizya

¹ Mu manda yalya Yoane Kawatizya aloleka, ala akukosola mu lwanga lwamu Yudeya,

² akuti, “Zenzukini, pano Wene wa mwiyulu wati upalama pipi.”

³ Pano Yoane ali wino kasema Ezaya wavwanzile ati, “Umwi akulaizya mu lwanga ati, ‘Zifini museo mwakupita Mwene, olololini inzila mwakupita aliwe.’ ”

⁴ Vizwalo vyakwe Yoane vyapanzilwe ku mavumbu ya ngamila, nupya wazwalanga musipi wa mpapa mu musana. Vyakulya vyakwe vyali a makanta nu uci uwamu mpanga.

⁵ Lyene antu amu Yelusalemu, na amu muputule wa mpanga ya Yudeya yonsi na amu mpanga yapalime na Yodani yaya kunoli.

⁶ Yene yailongwelanga maifyo yao, nga nawe ayawatizya mu luzi lwa Yodani.

⁷ Lelo lino walola Afaliseo na Asaduki aingi yakwiza kuno wawatizyanga, ayanena ati, “Mwe ana ya nzoka mwe! Uzye aweni uwamucelula kuti muutuke ukali wakwe Leza uno ukwiza?

⁸ Mwaomba imilimo isuma yakulanga vino mwati muzenzuka.

⁹ Nupya mutaelenganya ukuti muluutuka kuvunukwa kuno kukwiza, apa kulanda ukuti Abulaamu ali cikolwe cinu. Nkumunena vino Leza angasenula amawe yaa ukuya ana yakwe Abulaamu.

¹⁰ Na ndakai kwene impasa iteyanyiziwe kusinda imiti pa visinte. Umuti onsi uno usiseeka vizao visuma ulakomwa nu kusumbwa mu moto.

¹¹ Nemo nkumuwatizya na manzi kulanga ukuti mwati muzenzuka, lelo wino akwiza pacisila cane wene uwa maka kunduta. Ntaine kusenda ndyatu zyakwe. Wene alamuwatizya na Mupasi Wamuzilo nu moto.

¹² Akweti ulupe ulwakwelela kuti aele ingano zyakwe zyonsi, azikolonganike nu kuzisezya mu nkoma. Lelo mapumbu alayoca mu moto usyazimiwa.”

Kuwatiziwa kwakwe Yesu

¹³ Lyene Yesu afuma mu Galile aiiza ku Yodani, kuti Yoane amuwatizye.

¹⁴ Lelo Yoane alonda akane ati, “Wewe ulinzile kuwatizya nene. Uzye pacani wanena kuti nkuwatizye?”

¹⁵ Lelo Yesu amunena ati, “Ndakai leka cicitike vikwene, pano catuzipila kuti tucite ivyawololoke vyonsi vino Leza akalonda.” Alino Yoane azumila.

¹⁶ Lyene lino Yesu wawatiziwa, lilyo kwene afuma mu manzi. Lyene iyulu lilekuka, nga alola Mupasi Wamuzilo akwika panoli mu musango wa nkunda.

¹⁷ Ni zwi lyuvwika kufuma mwiyulu liti, “Wii Umwanane mukundwe, munoli nkuzanga cuze.”