Mateo 28 - Amazwi Yakwe Leza 2013

Yesu wazyukuka kufuma ku Afwe

¹ Lino Sabata lyapita, lyene ku macaca pa wanda walondelela wakutandika mulungu, Maliya uwaku Magadala nga na Maliya muze yaya kukulola ilindi.

² Awe lilyo kwene kuya ni cilundumusi cikulu, pano mungeli wa Mwene wika mwiyulu, aiiza akunkulusya iwe, alifumya nga aikalapo.

³ Kuloleka kwakwe kwakoline wa nkuwa, ni vizwalo vyakwe vyali vitiswe kuluta umula.

⁴ Yakalinda yuvwa intete, yazakaza nu kufwa mutombo.

⁵ Alino mungeli anena anaci yaya ati, “Mutoopa, pano manyile vino mukulonda Yesu, wino watanyilwe pa lupanda.

⁶ Asimo muno, watazyukuka wakwe vino wavwanzile. Izini mulole pano wala izi.

⁷ Lyene yangini zuwazuwa mukanene alondezi yakwe muti, ‘Watazyukuka kufuma ku afwe, nupya amamukolelela kuya ku Galile. Kuku akuno mumaya mukamulole.’ Acino nati niza kuti imunene.”

⁸ Caleka anaci yakumpeka kufuma kwi lindi, ala yakuuvwa intete, mbali yali nu luzango cuze, yasimula kuti yakanene alondezi yakwe.

⁹ Mukupumikizya Yesu ayakomanya, ayanena ati, “Mutende uye namwe.” Alino nao yamupalamila, yalemelela ngazo zyakwe, yamupepa.

¹⁰ Lyene Yesu ayanena ati, “Mutoopa! Yangini mukanene aina yane yaye ku Galile. Kuku akuno yalandola.”

Ilandwe kufuma kuli yakalinda

¹¹ Lino anaci yacili yakupita, yakalinda nao yaya ku musumba nu kulandila yasimapepo akalamba vyonsi vino angeli yacisile kwi lindi.

¹² Lino yasimapepo akalamba yakongana na aikolo yumana kapi nga yapela asilika cipendo ca mpiya cikulu.

¹³ Alino yayanena yati, “Mukalande muti, alondezi yakwe yali iiza iiya icala usiku ala swemo twati tukasula.

¹⁴ Mulasi ndi uvwa cii, tulasininkizya kunoli ukuti mwemwe yakaele. Acino mwemo mutakwata nanti masakamiko yamwi.”

¹⁵ Caleka asilika yatoola impiya nu kucita vino yasimapepo akalamba yayanenyile, nga ni landwe lii lisalangana monsi mu Ayuda, kufika ni lelo kwene.

Yesu waloleka ku alondezi yakwe

¹⁶ Alondezi ikumi na wenga yapita ku Galile ku mwamba uno Yesu wayanenyile kuyako.

¹⁷ Lyene lino yamulola, yamupepa. Lelo yamwi yene yatwisika.

¹⁸ Yesu nawe ayanena ati, “Napelwa maka pa viumbwa vyonsi mwiyulu na pano nsi.

¹⁹ Caleka yangini konsi mu nsi mucite antu amu nko zyonsi kuya alondezi yane. Mwayawatizya mwi zina lyakwe Tata, nu Mwana, nu Mupasi Wamuzilo,

²⁰ nu kuyasambilizya kucita vyonsi vino namunenanga. Lyene nani namayanga pamwi namwe lyonsi kufika na pa wanda wa mpelelekezyo ya nsi.”