Mateo 27 - Amazwi Yakwe Leza 2013

Yatwala Yesu kwakwe Pilato

¹ Lyene katondo, yasimapepo akalamba onsi, nga na aikolo yalanzyanya vya kucita pa kukoma Yesu.

² Alino yamunyepa yamusenda, nu kumupeela kuli Pilato uwali mulasi.

Imfwa yakwe Yuda

³ Lyene lino Yuda, wino uwamukoofile walola vino yavunuka Yesu kuti afwe, auvwa ulanda cuze pali vino watacita, nga awezezya yasimapepo akalamba na aikolo impiya makumi yatatu zyakwe siluva.

⁴ Lyene ayanena ati, “Nati nifya pa kukoopa umuntu uwakaele kuti afwe.” Nao yamunena yati, “Uzye cico cingatusakamika? Wewe umanye vyakucita.”

⁵ Caleka Yuda asya wasumbila impiya zyakwe siluva mu Ng'anda ikulu yakwe Leza. Alino apita aya aikulika.

⁶ Yasimapepo akalamba yasola impiya zizyo, yavwanga yati, “Citaine na masunde ukwika impiya zizyo zyakwe siluva mu cipao ca mpiya camu Ng'anda ikulu yakwe Leza pano izya wazi.”

⁷ Caleka yalanzyanya, yuvwana kuti yaziomvye ukukala calo cakwe kamata wa nyungu, kuti ciye cakuzikamo ainamasi.

⁸ Uli mulandu kufika na pa wanda kwene uu, cikaamwa ukuti, “Calo ca wazi.”

⁹ Lyene cifikiliziwa cino Leza wavwanzile kupitila muli kasema Yelemiya cikati, “Yatozile impiya makumi yatatu, mutengo uno aina Izlaeli yazumilizye pali aliwe.

¹⁰ Yaziomvya ukukala calo cakwe kamata wa nyungu, ndi vino Mwene wanenyile.”

Pilato uzya Yesu Mauzyo

¹¹ Alino yatwala Yesu ku mulasi, yamwimika inkolelo yakwe, nga mulasi uwaku Loma amuuzya ati, “Uzye wewe uli Mwene wa Ayuda?” Yesu nawe aasuka ati, “Watuvwanga.”

¹² Lelo lino yasimapepo akalamba na aikolo yakumulongwela, Yesu wene atavwanzile nanti cimwi.

¹³ Lyene Pilato amuuzya ati, “Uzye utuvwile umboni uno yakukulongwela?”

¹⁴ Lelo Yesu wene ataswike nanti izwi lyonga, nga mulasi azunguka cuze.

Yesu wapingwilwa ukufwa

¹⁵ Pa nsita ya kuzevya Cimulo ca Ucilo lwali ulutambi lwa mulasi kusapwila iumba munyepwe wenga wino yakasi.

¹⁶ Pa kasita kaka yakweti munyepwe wenga mulumbuke cuze, wino zina lyakwe a Balaba.

¹⁷ Caleka lino iumba lyakongana, Pilato ayauzya ati, “Uzye mukulonda kuti musapwile weni? Uzye a Balaba nanti a Yesu wino akaamwa ukuti Klistu?”

¹⁸ Pano wamanyile vino yasimapepo akalamba yapile Yesu kunoli pamulandu sile wa uzuwa wao.

¹⁹ Lelo lino Pilato watenzi pa cilimba ca kuputwila milandu, muci atuma izwi kunoli ati, “Utacita cintu nanti cimwi ku muntu wiyo uwakaele, pano usiku nali nalota vintu vingi pamulandu wakwe.”

²⁰ Alino yasimapepo akalamba na ikolo yatunkola iumba kuti lilenge Pilato kuti ayasapwile Balaba, lelo Yesu wene akomwe.

²¹ Mulasi nawe ayauzya ati, “Uzye pali yaa yaili mukulonda ukuti imusapwile weni?” Nao yaasuka yati, “Balaba.”

²² Pilato ayauzya ati, “Uzye lyene namacita uli pali Yesu wino akaamwa kuti Klistu?” Onsi yaasuka yati, “Atanwe pa lupanda!”

²³ Pilato ayauzya ati, “Uzye wataifya cani?” Nao yapundisya yati, “Atanwe pa lupanda.”

²⁴ Lino Pilato walola vino waposiwa cakucita, lelo kuluta kuti mpanzela ikatuke, atoola manzi afulala minwe pa manso yi umba avwanga ati, “Nemo insi na mulandu wa kukoma umuntu wii uwakaele. Mwemwe mumanye vyakucita.”

²⁵ Antu yonsi yavwanga yati, “Lekini mulandu wa mfwa yakwe wii uye panotuli na ana itu.”

²⁶ Lyene ayasapwila Balaba, lelo apingula kuti yume Yesu vikoti, nga ayapeela kuti yamutane pa lupanda.

Asilika yasoweka Yesu

²⁷ Lyene asilika yatwala Yesu mu kasi ka musolo wi sano lya mulasi, yakonganika mpuka yonsi ya asilika kumuzinguluka.

²⁸ Alino yamuzula vino wazwite, nga yamuzwika mwingila uyenzu,

²⁹ yaluka ingala ya myunga, yamuzwika ku mutwe. Lyene yamufumbatika intuwa mwi kasa lilunji, yafukama nkolelo yakwe, yamusoweka yati, “Kwaita, Mwene wa Ayuda!”

³⁰ Alino yamuswila mati, yatoola intuwa yamupoola pa mutwe.

³¹ Lino yamala kumusoweka, yamuzula mwingila alino yamuzwika vizwalo vyakwe. Lyene yamusenda kunzi kuti yakamutane pa lupanda.

Yesu watanwa pa Lupanda

³² Lino yakufuma yakomanya umuntu uwaku Kuleni, wino zina lyakwe a Simoni, nga yamupatikizya kusenda lupanda lwakwe Yesu.

³³ Alino yafika ku cifulo camwangwa Gologota, cikusenula ukuti, “Pa cifulo ci panga.”

³⁴ Kuku yamupile waini muminkane ni vintu vimwi vilule. Lelo lino wamyanta, akana kumwa.

³⁵ Lyene lino yamutana pa lupanda, yaankana ni vizwalo vyakwe, pacisila ca kupendola.

³⁶ Alino iikala papa kwene iyamulinda.

³⁷ Apapela ya mutwe wakwe iikapo cimpampa icalemvilwepo cimanyisyo ca mulandu uno wapilwe, cakuti, “Wii, ali Yesu, Mwene wa Ayuda.”

³⁸ Lyene yatana vipondo viili pali pamwi na Yesu, conga kwi kasa lilunji ni cuze kwi mani lyakwe.

³⁹ Na antu apitanga mu pipi yapukunya mitwe yao nu kusoweka Yesu yati,

⁴⁰ “We muno ungomoola Ng'anda ikulu yakwe Leza, nu kuikuula mu manda yatatu! Ituule ndi wewe Mwana wakwe Leza! Ika ku lupanda!”

⁴¹ Vivyo kwene yasimapepo akalamba na yakasambilizya ya Masunde nga na aikolo yamuseka yati,

⁴² “Watuulanga auze, lelo wene atangaituule! Ndi cakuti wene Mwene wa Izlaeli, lekini aike ku lupanda ndakai kwene. Lyene tumataila!

⁴³ Wene wataila Leza. Ndakai lekini Leza amutuule nda kasi, pano wavwanzile ukuti wene Mwana wakwe Leza.”

⁴⁴ Vivyo kwene ni vipondo ivyatanyilwe pamwi nawe, navyo kwene vimusausya.

Imfwa yakwe Yesu

⁴⁵ Lino ilanzi lyafika umutwe papela (12 koloko), impanga yonsi inyepwa ni mfinzi kufika na pano ilanzi lyatemba (3 koloko).

⁴⁶ Ukulingana na lino ilanzi lyatemba (3 koloko), Yesu alaizya ni zwi likulu ati, “Eli, Eli, lama sabakatani?” Cikusenula ukuti, “Leza wane, Leza wane, pacani wantazyela.”

⁴⁷ Lino yamwi aimi pipi yuvwa cii yati, “Muntu wii akwama Eliya!”

⁴⁸ Lilyo kwene wenga uwa munoyali asimula aya atoola umwepu, auombeka muli waini musasalume. Alino autunga ku kamuti, amutambikila pa mulomo kuti amwe.

⁴⁹ Asyala yonsi nao yati, “Tekelini, tulole ndi Eliya amaiza amutuule.”

⁵⁰ Lyene Yesu alaizya ni zwi likulu, nga afwa.

⁵¹ Lilyo kwene cisalu camu Ng'anda ikulu yakwe Leza cilepuka pakasi kufuma papela kufika na pansi. Insi nayo isunkana kuya cilundumusi, nga nu lwala nalo lulepoka.

⁵² Malindi nayo yayulika, nga na antu yakwe Leza aingi, yao afwile mpiti, yazyukuka yaya nu umi.

⁵³ Antu yalya yasya malindi, nga pacisila ca kuzyukuka kwakwe Yesu kufuma ku mfwa iingila mu Yelusalemu Musumba Wamuzilo nu kuloleka ku antu aingi.

⁵⁴ Musika wa mpuka ya vita na yano wali nao, alindanga Yesu, yuvwa cilundumusi nu kulola vyonsi vyacitike. Alino yuvwa intete nga yavwanga yati, “Cumi, wene wali Mwana wakwe Leza!”

⁵⁵ Anaci aingi yali katalamukila, ala yakulola, yano alondile Yesu kufuma ku Galile, nu kumutumikila.

⁵⁶ Pali yaa, pali Maliya uwaku Magadala, Maliya nyina wakwe Yakobo na Yosefu, nga nu muci wakwe Zebedi.

Kuzikwa kwakwe Yesu

⁵⁷ Manguzi, kwiza mukama umwi uwaku Alimatiya, izina lyakwe a Yosefu, nawe kwene wali mulondezi wakwe Yesu.

⁵⁸ Wene aya kuli Pilato kuya lenga icala cakwe Yesu. Lyene Pilato apeela ilamulo kuti icala cipelwe kunoli.

⁵⁹ Alino Yosefu atoola icala, acipomba mu nsalu itiswe yamutengo,

⁶⁰ aya aciika mwi lindi ilyakwakwe, lino umwine wafukwile mwi we. Lyene akunkulusizyapo iwe likulu pa mulyango wi lindi nga apita.

⁶¹ Maliya uwaku Magadala na Maliya muze yatenzi pipi ulunga ni lindi.

Yika Yakalinda kwi Lindi lyakwe Yesu

⁶² Pa wanda walondelile, pa Sabata, yasimapepo akalamba na Afaliseo yakongana kwakwe Pilato.

⁶³ Yamunena yati, “Musambazi, tukwiusya vino musomvi wilya wavwanzile, lino atali kuti afwe ati, ‘Pacisila ca manda yatatu ndazyukuka nupya.’

⁶⁴ Acino pela ilamulo ukuti ilindi lilindwe kufika pa manda yatatu. Pano ndu tacisile vivyo, ale limwi alondezi yakwe yangiza iiye icala cakwe Yesu nu kunena antu yati watazyukuka. Kusomba ku kwakusyalikizya kwene kulaya ukwipisye kuluta kwankolelo.”

⁶⁵ Pilato nawe ayanena ati, “Nga vino asilika muli nayo, yasendini pitini nao mukaalinda ilindi ningo ndi vino mwavwanga.”

⁶⁶ Caleka yapita yaya yalinda ilindi ningo. Yika cimanyililo piwe lya pa mulyango, cakumanyila umwi ndi walikunkulusya, kulifumyapo. Alino yasyapo na yakalinda akuti yalindapo.