Mateo 26 - Amazwi Yakwe Leza 2013

Yapangana kukoma Yesu

¹ Lino Yesu wamala kuvwanga vintu vii anena alondezi yakwe ati,

² “Mwati mumanya vino kwasyala manda yaili kufika pa wanda wa kuzevya Cimulo ca Ucilo, nga nu Mwana wa Muntu alapeelwa kuti yamutane pa lupanda.”

³ Lyene yasimapepo akalamba nga na aikolo yakongana mu ng'anda yakwe Kayafa, Simapepo Mukulu.

⁴ Alino yumana kapi kuti yaleme Yesu mu nkama nu kumukoma.

⁵ Lelo yavwanga yati, “Tutalinzile kucita cii pa wanda wa kuzevya Cimulo ca Ucilo, pano antu yangacita mpanzela.”

Mwanaci mwi wapongolwela Yesu amafuta ku Betaniya

⁶ Yesu wali mu Betaniya mu ng'anda yakwe Simoni, wino uwalwile tembwe.

⁷ Lino walyanga, umwanaci umwi aiiza kunoli nu musazi uwazilemo amafuta acinunu cisuma nupya amutengo ukome, apongolwela pa mutwe wakwe Yesu.

⁸ Lino alondezi yalola cii, yasoka cuze. Alino yuzya yati, “Uzye pacani cino ononela amafuta vii?

⁹ Pano amafuta yaa acinunu cisuma yange yakaziwe pa mutengo ukome cuze, nga ni mpiya zipelwe ku apina.”

¹⁰ Lino Yesu wamanya cii, ayanena ati, “Uzye pacani mukusakamika umwanaci wii? Wene watacita cintu cisuma cuze kunondi.

¹¹ Apina mukaya nao pe, lelo nemo mutalaya nani pe.

¹² Umwanaci wii wali wapongolwela amafuta acinunu cisuma pa mwili wane kuti ateyanye kunzika.

¹³ Cumi, namunena vino, konsi kuno Ilandwe Lisuma lilakosolwa mu nsi yonsi, cii cino umwanaci wii wacita cilalandwa kuti antu yamwiusya.”

Yuda wazumila kukoopa Yesu

¹⁴ Lyene Yuda Iskalyoti, wenga uwamu alondezi ikumi na yaili, aya kuli yasimapepo akalamba,

¹⁵ ayauzya ati, “Uzye ndi namukoopela Yesu, mumampela cani?” Alino nao yamupeela impiya makumi yatatu zyakwe siluva.

¹⁶ Kufuma lilya kwene Yuda atandika kulonda inzila iya kukoopelamo Yesu kunoyali.

Yesu walya Cimulo ca Ucilo pamwi na alondezi yakwe

¹⁷ Pa wanda wakutandika kuzevya Cimulo ca Mukate usi na Citutumusi, alondezi iiza kuli Yesu yamuzya yati, “Uzye aukwi kuno ukulonda kuti tukakuteyanyizizye Cimulo ca Ucilo?”

¹⁸ Yesu nawe aasuka ati, “Yangini mu musumba, ku muntu umwi, mumunene muti, ‘Kasambilizya wati, nsita yane yati palama. Alondezi yane pamwi nani tumaiza tuliile Cimulo ca Ucilo mu ng'anda yako.’ ”

¹⁹ Caleka alondezi yacita vino wayanenyile, yaya yateyanya Cimulo ca Ucilo.

²⁰ Lyene lino kwaya manguzi, Yesu aikala nu kulya pa cipango pamwi na alondezi yakwe ikumi na yaili.

²¹ Walanga yacili yakulya, Yesu ayanena ati, “Wenga uwa munomuli amankoopa.”

²² Alondezi yasakamikwa cuze nga yatandika kumuuzya wenga wenga yati, “Mwene, uzye anene ukunena?”

²³ Yesu aasuka ati, “Wino amateela umukate pali pamwi nani mu lweso, aliwe amankoopa.

²⁴ Mwana wa Muntu alafwa wakwe vino calembwa pali aliwe, lelo kalanda ku muntu wino amakoopa Mwana wa Muntu! Cange cizipe umuntu wiyo ndi atavilwe.”

²⁵ Lyene Yuda wino uwamukoofile, amuuzya ati, “Kasambilizya, uzye anene?” Yesu amwaasuka ati, “Wavwanga wemwisikulu.”

Cimulo ca Mwene

²⁶ Walanga yacili yakulya, Yesu atoola mukate, ataizya Leza, aumokoola, alino aupela ku alondezi yakwe avwanga ati, “Tolini mulye, uu uli mwili wane.”

²⁷ Lyene atoola ulwako, ataizya Leza, ayapeela nga avwanga ati, “Mwinimo mwensi kwene.

²⁸ Uu uwazi wane, uno Leza watama insimbi pa upangano, uno wapongololwa pamulandu wa antu aingi, kuti maifyo yao yelelwe.

²⁹ Namunena vino, ntalamwa nupya vifenwa vya vizao vya matingi kufika ku wanda uno ndamwa ivipya pali pamwi namwe mu Wene wakwe Tata.”

³⁰ Lyene lino iimba ulwimbo lwa kulumbanya Leza, yafuma yaya ku Mwamba wa Olivi.

Yesu wasowela vino Petulo amamukana

³¹ Lyene Yesu nawe ayanena ati, “Usiku kwene uu, mwensi kwene mumamfutatila nu kunsya nenga, pano calembwa cati, ‘Ndakoma kacema nu ufyo wa mfwele ulasalangana.

³² Lelo lino ndazyukuka, ndamukolelela ku Galile.’ ”

³³ Alino Petulo avwanga ati, “Nanti yonsi yalakufutatila pamulandu wakwe vino vilakucitikila, nemo ntalacicita.”

³⁴ Yesu anena Petulo ati, “Cumi nakunena vino usiku kwene uu, lino mukolwe atacili alamule, wemo umankana maila yatatu ale ukuvwanga vino utamanyile.”

³⁵ Alino Petulo avwanga ati, “Nemo nanti cingaya cakuti imfwe pamwi nawe, ntangankukane inti ntakumanyile.” Na alondezi yonsi yavwanga cili conga.

Yesu wapepa mu Getesemani

³⁶ Lyene Yesu na alondezi yakwe yaya ku cifulo cino camwangwa Getesemani, alino anena alondezi yakwe ati, “Ikalini paa lino nkuya pa nkolelo ku kupepa.”

³⁷ Alino asenda Petulo na ana yakwe Zebedi yaili, nga atandika kunyunguluka nu kusakamikwa,

³⁸ alino ayanena ati, “Mwenzo wane wanyomelwa nu ulanda pipi ni mfwa. Syalini pano nu kupempula.”

³⁹ Apita katalamukila panono, afukama pansi ainime, nga apepa ati, “Tata ndi cingaya, leka ulwako luu lwa ucuzi lusisiwe kunondi. Kusi kulonda kwane, lelo kulonda kwako kucitike.”

⁴⁰ Lyene awela azana alondezi yatatu yakaswile. Anena Petulo ati, “Uzye mwemo musi na maka akupempula pali pamwi nani nanti kasita kanono?

⁴¹ Pempulini nu kupepa kuti mutaponela mu matunko. Umwenzo ukulondesya, lelo umwili uutonte.”

⁴² Nupya aswilila iila lyakwe ciili, apepa ati, “Tata, ndi citangaya kuti lwako luu lwa ucuzi lusisiwe kunondi suka nkamwemo, leka kulonda kwako kucitike.”

⁴³ Lyene lino wawela ku alondezi nupya kwene azana yakaswile, pano manso yao ala yati yanyoma nu tulo.

⁴⁴ Caleka nupya ayasya apita ku kupepa iila lyakwe citatu, ala akuvwanga mazwi ali yamwi kwene.

⁴⁵ Lyene awela ku alondezi, ayanena ati, “Uzye mucili mukaswile nu kupuza? Lolini! Kasita kati kafika nu Mwana wa Muntu akupelwa mu makasa yakwe yakaifya.

⁴⁶ Katukini, tuini twapita. Lolini, umuntu amankoopa wapalama.”

Kulemwa kwakwe Yesu

⁴⁷ Walanga lino Yesu acili vwanga, Yuda, wenga uwamu alondezi ikumi na yaili, afika. Wali ni iumba likulu ilyasenzile mpanga ni zya ntuwa, ala yatumilwe na yasimapepo akalamba na aikolo amu Ayuda.

⁴⁸ Kakoopa wapile iumba cimanyililo ati, “Muntu wino namatonsola ale ali wiyo kwene wino mukulonda. Mumuleme.”

⁴⁹ Lyene Yuda aya kuli Yesu amunena ati, “Kwaita Kasambilizya!” Lyene amutonsola.

⁵⁰ Yesu avwanga ati, “Cuza wane, cita cino wizile. Alino iiza nkolelo yalema Yesu.”

⁵¹ Lyene wenga wamuli yao ali pamwi na Yesu asomola lupanga lwakwe, asempa ikutwi lya muzya wakwe Simapepo Mukulu.

⁵² Yesu nawe amunena ati, “Swilizya lupanga lwako mu cipata caluko, pano yano yonsi akalema lupanga yene yalafwila ku lupanga.

⁵³ Uzye ukwelenganya vino nemo ntangandenge kuli Tata, kuti ndakai kwene antumile maumba akulu ikumi na yaili avita vya angeli?

⁵⁴ Lelo malembelo asowela kuti cilinzile cicitike ndi cikwene, yangafikiliziwa uli?”

⁵⁵ Pa kasita kaka, Yesu anena iumba ati, “Uzye mwizile kuli nene ni mpaanga ni zya ntuwa pa kundema, ungati nene cipondo? Manda aingi nazanwanga mu Ng'anda ikulu yakwe Leza, ala nkusambilizya, nga namwe mutandemile.

⁵⁶ Lelo vyonsi vii vyati vicitika pakuti vino yakasema yalemvile vifikiliziwe.” Alino alondezi yonsi kwene yutuka yamusya wenga.

Yesu mwi Tengo lya Ayuda

⁵⁷ Yao alemile Yesu yamusenda ku ng'anda yakwe Kayafa Simapepo Mukulu, kuno yakasambilizya ya Masunde pali pamwi na aikolo yakongine.

⁵⁸ Lelo Petulo wene amulondela katalamukila nga afika nu mu musolo kwene wa ng'anda yakwe Simapepo Mukulu, nga aikala na yakalinda amu Ng'anda ikulu yakwe Leza kuti alole icimacitika.

⁵⁹ Yasimapepo akalamba ni nkombe zyonsi zya mwi Tengo yezya kulonda umboni waufi pali Yesu kuti yamukome.

⁶⁰ Lelo yatazanyile nanti umwi, nanti angala yakambone aufi aingi yaile inkolelo

⁶¹ ku kumulongwela. Mukusyalikizya, antu yaili yaile inkolelo yavwanga yati, “Muntu wii wavwanzile ati, ‘Ningomoola Ng'anda ikulu yakwe Leza nu kuikuula mu manda yatatu.’ ”

⁶² Lyene Simapepo Mukulu aimilila, auzya Yesu ati, “Uzye usi na cakuvwanga pali vino yakukulongwela?”

⁶³ Lelo Yesu aya cele. Alino Simapepo Mukulu amunena ati, “Nakunena, Lapa pa manso yakwe Leza umumi, utunene ndi wewe uli Katuula uwalavilwe, Mwana wakwe Leza.”

⁶⁴ Yesu aasuka ati, “Watuvwanga. Lelo nkunena mwensi kwene vino mulalola Mwana wa Muntu atenzi kwi kasa lilunji lyakwe Leza Wamaka yonsi nu kwiza mu makumbi.”

⁶⁵ Lyene Simapepo Mukulu alepula mwingila wakwe, avwanga ati, “Watuvwanga mazwi ya misuli apali Leza. Tusikulonda umboni nauze! Ndakai mwati muvwa mazwi ya misuli apali Leza.

⁶⁶ Uzye mukwelenganya uli?” Yaasuka yati, “Alinzile ukufwa.”

⁶⁷ Lyene yamuswila mati pa manso nu kumuma. Yamwi nao yamuma impi.

⁶⁸ Yavwanga yati, “Sema tuvwe, we Katuula! Ale tunganya uzye aweni uwakuma?”

Petulo wakana Yesu

⁶⁹ Lyene Petulo watenzi mukasi ka musolo wi Tengo, nga umukazyana wenga uwamu yaomvi yakwe Simapepo Mukulu aiiza panoli amunena ati, “Nawe kwene wali pamwi na Yesu uwaku Galile.”

⁷⁰ Lelo Petulo akana pa manso yakwe yonsi ati, “Nemo ntamanyile cino ukuvwanga.”

⁷¹ Alino afumapo aya ku mulyango, nga lino umukazyana muomvi namuze wamulola, anena yano aimi pipi ati, “Muntu wii, nawe kwene wali na Yesu uwaku Nazaleti.”

⁷² Petulo akana nupya nu mulapo ati, “Ntamanyile umuntu wii.”

⁷³ Lino papita kasita kanono yano aimi pipi yapalama kuli Petulo, yamunena yati, “Cumi nawe kwene wewe uwa munoyali, pano milandile yako ikukusinila.”

⁷⁴ Alino Petulo alapa avwanga ati, “Ntamanyile umuntu wino mukulandapo! Ndi nkutumpoka, Leza andye.” Lilyo kwene mukolwe alamula.

⁷⁵ Lyene Petulo aiusya vino Yesu wamunenyile ati, “Lino mukolwe atacili alamule, wemo umankana maila yatatu ale ukuvwanga vino utamanyile.” Alino Petulo afumila panzi nga alila minsozi nu ulanda ukulu cuze.