Mateo 24 - Amazwi Yakwe Leza 2013

Yesu wasowela komoolwa kwa Ng'anda ikulu yakwe Leza

¹ Yesu afuma mu Ng'anda ikulu yakwe Leza, nga lino akupita, alondezi yakwe yapalama kunoli, yamusontelela vikulwa vya Ng'anda ikulu yakwe Leza.

² Lelo Yesu ati, “Endi, mukulola vikulwa vii vyonsi. Cumi namunena, vino kutalaya iwe nanti lyonga ililasyala pi we lyuze. Yonsi kwene yalomoolwa.”

Yesu walanda pa macuzi nu kuzunyiwa

³ Lino Yesu watenzi pa Mwamba wa Olivi, alondezi iiza kunoli, yamuzya mu nkama yati, “Uzye alilaci lino cii cilacitika? Nupya icani cilaya cilangililo cakulanga ukwiza kwako nga ni mpelelekezyo ya nsi?”

⁴ Yesu nawe aasuka ati, “Cenjelini, mutaleka umuntu nanti wenga amuponzye.

⁵ Pano antu aingi yalizila mwi zina lyane nu kuti, ‘Nene ndi Katuula uwalavilwe!’ Yene yalaponzya antu aingi.

⁶ Muluvwa inkondo ni mpupilizi zya nkondo kutali, lelo mutakasakamale. Vintu vii vilinzile kucitika, lelo visikulanga ukuti mpelelekezyo yatifika.

⁷ Inko zilakatukilana, na mawene yalakatukilana. Kulaya vipowe ni vilundumusi mu ncende zimwizimwi.

⁸ Vintu vii uli utandiko wa macuzi akulu cuze.

⁹ “Lyene yalamulema, yalamuzunya nu kumukoma. Antu amu nko zyonsi yalamupata pamulandu wane.

¹⁰ Pa nsita ilya, aingi yalafutatila utailo, nupya yalakoopana nu kupatana.

¹¹ Na yakasema yaufi aingi yalaloleka nu kusomba antu aingi.

¹² Pamulandu wakuti antu yalaifya kuluta, kutemwa mu antu aingi kulacepa.

¹³ Lelo wino wensi alaposya kufika nu ku mpelelekezyo wene alatuulwa.

¹⁴ Ni Landwe Lisuma lii lya Wene lilakosolwa mu nsi yonsi kuya umboni ku antu amu nko zyonsi, alino mpelelekezyo iliiza.

Ca winyi ca ononyi

¹⁵ “Mulalola ‘Ca winyi ca ononyi’ cino kasema Danieli wavwanzile, cimilila mu Ng'anda ikulu yakwe Leza.” (Kawelenga ailuke vino ci cikusenula.)

¹⁶ “Lyene yonsi ali mu Yudeya yakuutukile ku myamba.

¹⁷ Wino ali pi paala lya ng'anda yakwe wene atakike nu kwingila mu ng'anda kuti atoole cimwi asende.

¹⁸ Wino ali mu calo atakaswilile ku ng'anda yakwe kuyatola cakuzwala.

¹⁹ Kalanda ku anaci alasenda indilwa na yano alaonsya mu manda yalya!

²⁰ Pepini kuli Leza kuti kuutuka kwinu kutakacitike pa mwela nanti pa Sabata.

²¹ Pano pa nsita ilya, kulaya macuzi aipisye kuluta, yano atatazile yayeko kufuma lino insi yaumvilwe kufika na ndakai nupya yatalatala yayeko.

²² Lelo Leza ndi atacefizye manda yalya, kusi nanti umwi angatuulwa. Na pamulandu wa asololwe yakwe, Leza alacefya manda yalya.

²³ “Lyene, umwi ndi wamunena wati, ‘Lolini, Klistu auwi kuno!’ Nanti, ‘Lolini Klistu awilya kuku!’ Mutakamutaile.

²⁴ Pano antu aufi yalaloleka, yano alailanda ukuti yene ali Klistu kwene, nupya ali yakasema. Yalacita vilangililo vikulu ni vizungusyo kuti yaponzye na asololwe kwene ndi cingaya.

²⁵ Uvwini! Nati munena cii lino nsita itali ifike.

²⁶ “Caleka antu ndi yaca yamunena yati, ‘Lolini, Klistu awilya kuku, mu lwanga!’ Mutakayeko. Nanti ndi yaca yamunena yati, ‘Klistu ali kuno, mu miputule ya mukasi ka ng'anda.’ Mutakayataile.

²⁷ Pano ukwiza kwa Mwana wa Muntu kulakolana wa nkuwa ino ikamyansya kucilinganya ulwelele lonsi kufuma ku ufumondaka nu kufika ku uwondaka.

²⁸ “Konsi kuno icala cili, akuno na makozi yakakongana.”

Ukwiza kwa Mwana wa Muntu

²⁹ “Lelo zuwazuwa pacisila ca ucuzi uwamu manda yalya, ilanzi lilafita, umwezi utalawala, intanda zilapona kufuma mwiyulu, na maka amu lwelele yalatenta.

³⁰ Pa nsita ilya, cilangililo ca Mwana wa Muntu cilaloleka mwiyulu. Na antu amu nko zyonsi mu nsi yalalosya lino yalalola Mwana wa Muntu akwiza mu makumbi na maka nu lulumbi lukulu.

³¹ Izwi likulu lya ntandala liluvwika nga nawe alatuma angeli yakwe kukukonganika asololwe yakwe kufuma ku mpela yonga ya nsi kufika nu ku yuze kwene.

Isambililo lya pa musamvu

³² “Sambililini pa musamvu. Lino misambo yakweo yatandika kulemba na mafwa yalelema mukamanya vino cisiku capalama.

³³ Mu musango uli onga, lino mulalola vintu vii vyonsi vikucitika, mulamanya vino Mwana wa muntu ali pipi lwa pa mulyango kwene.

³⁴ Cumi, namunena vino, vintu vii vyonsi vilacitika lino antu amu mukulo uu onsi yatali yafwe.

³⁵ Iyulu ni nsi vitalikalilila manda pe, lelo mazwi yane yene yalikalilila manda pe.

Kusi wamanya kwiza kwa wanda ulya nanti kasita

³⁶ “Kusi nanti wenga wamanya kwiza kwa wanda ulya nanti kasita. Angeli ya mwiyulu nanti Mwana kwene yatamanya, suka sile Tata.

³⁷ Vino cali mu manda yakwe Nowa, avino cilaya pa kwiza kwa Mwana wa Muntu.

³⁸ Pano mu manda yalya, lino mulamba atali aiize, antu yalyanga nu kumwa, yatwalanga nu kutwalwa, kufika na pa wanda uno Nowa wingile mu cange.

³⁹ Lelo yatamanyile icali nu kucitika kufika lino mulamba wizile asenda yonsi kwene. Mu musango uli onga avino cilaya pa kwiza kwa Mwana wa Muntu.

⁴⁰ Pa nsita ilya antu yaili yalaomba mu calo. Wenga yalamusenda, nu muze yalamusya.

⁴¹ Anaci yaili yalaasya pa mawe. Wenga yalamusenda, nu muze yalamusya.

⁴² “Caleka pempulini, pano mutamanyile wanda uno Mwene winu aliza.

⁴³ Nupya manyini ukuti mwine ng'anda ndi amanyile insita ino aivi yakwiza, atangakasula nupya atangaleke yatame ng'anda yakwe.

⁴⁴ Caleka namwe kwene mulinzile muiteyanye, pano Mwana wa Muntu aliza pa nsita ino mutenekile.

Muomvi mutailwe na asi mutailwe

⁴⁵ “Uzye lyene, muomvi mutailwe nu wamano aweni? Awiyo wino mwene wakwe wamucita kangalila uwakulolela aomvi amu ng'anda yakwe, nu kuyapela vyakulya vyao pa nsita ilinge.

⁴⁶ Walongo umuomvi wiyo wino mwene wakwe alazana akucita wakwe vii lino aliza.

⁴⁷ Cumi, namunena vino mwene alamucita kangalila wa vintu vyonsi vino akweti.

⁴⁸ Lelo muomvi wiyo ndu mwipe wene alelenganya mu mwenzo wakwe ati, ‘Mwene wane walengela kwiza,’

⁴⁹ lyene atandika kuuma aomvi yauze, aalya nu kumwa pamwi na akolesi,

⁵⁰ lyene mwene wa muomvi aliza pa wanda uno asikwenekela, na pa kasita kano atamanyile.

⁵¹ Wene alamuvunuka cuze nupya alamusumbila ukunzi ku cifulo ca asomvi kuko kuno alalila nu kulumanya ncecete.