Mateo 22 - Amazwi Yakwe Leza 2013

Mulumbe wa cimulo ca winga

¹ Nupya Yesu avwanga kunoyali mu milumbe ati,

² “Uwene wa mwiyulu wakolana ni cacitike lino mwene umwi wacitile mwana wakwe cimulo ca winga.

³ Alino atuma aomvi yakwe kuli yano amilwe, ku kuyanena kuti iize ku cimulo ca winga. Lelo nao yakana kwiza.

⁴ Nupya atuma aomvi yauze ayanena ati, ‘Pitini, kanenini yao amilwe ukuti nati nteyanya cimulo. Nati nkoma tucipambasi twine nupya tunone. Vintu vyonsi vyati viteyanyiziwa. Izini ku cimulo ca winga.’

⁵ Lelo yao amilwe yatiisileko mano. Yamwi yaya ku vyalo vyao nga na yamwi yaya ku milimo yuze ya uculuzi.

⁶ Asyala nao yalema aomvi yakwe, yayacuzya nu kuyakoma.

⁷ Lelo Mwene asoka cuze, nga atuma asilika yakwe kuya koma inkomi zizyo nu kooca misumba yao iikulu.

⁸ Alino anena aomvi yakwe ati, ‘Cimulo ca winga cati citeyanyiziwa, lelo yao amilwe yatasakamile ukwiza.

⁹ Yangini mu miseo mukaame ali wensi wino mumazana, aiize ku cimulo ca winga.’

¹⁰ Caleka aomvi yapita yaya mu miseo, yakonganika antu yonsi aipe na asuma yano yazanyile, nu muputule usuka ucepa.

¹¹ “Lelo lino mwene wingilamo kukulola yano amilwe, alola umuntu umwi mwenemo, wino atazwite vizwalo vya pa winga.

¹² Alino amuuzya ati, ‘Cuza, uzye wali wingila uli muno kwaula kuzwala vizwalo vya pa winga?’ Lelo umuntu atakweti cakuvwanga.

¹³ Alino mwene anena aomvi yano alipo ati, ‘Munyepini makasa nga ni ngazo alino mumusumbile kunzi mu mfinzi, muno alalila nu kulumanya ncecete.’ ”

¹⁴ “Pano aamwa aingi lelo asololwa anono.”

Iuzyo lya pa musonko

¹⁵ Lyene Afaliseo yapita, yapangana vya kumuteya mu mauzyo.

¹⁶ Yatuma alondezi yao nga na antu yakwe Helodi kuli Yesu yamuzya yati, “Kasambilizya twamanya vino ukavwanga icumi. Lelo ukasambilizya Masunde yano Leza akalonda kuti antu yayela. Wemo usioopa umuntu nupya utaya na kasoozi.

¹⁷ Lyene tunene vino ukwelenganya. Uzye ciine na Masunde yakwe Leza kuti twasonka kuli Kesa nanti foo?”

¹⁸ Lelo lino Yesu wamanya mapange yao aipe, avwanga ati, “Mwe yasomvi mwe, uzye pacani mukungezya?

¹⁹ Ndangizyini lupiya longa lukaomviwa ku kulipa musonko.” Nao yamuletela lupiya longa,

²⁰ nga nawe ayauzya ati, “Uzye usyu uu, uwakwe weni? Uzye izina lii, ilyakwe weni?”

²¹ Nao yamwasuka yati, “Ivyakwe Kesa.” Alino nawe ayanena ati, “Caleka pelini Kesa vyakwakwe, Leza nawe mumupele vyakwakwe.”

²² Lino yuvwa cii, yazunguka cuze. Caleka yamusya yapita.

Iuzyo lya pamulandu wa kuzyukuka kufuma ku afwe

²³ Pa wanda uwo kwene Asaduki (yano akati antu yatalazyukuka kufuma ku afwe), iiza kuli Yesu yamunena yati,

²⁴ “Kasambilizya, Mose wavwanzile ati, ‘Muntu ndi wafwa nu kusya umuci, lelo ukwaula ana, umwina wakwe alinzile kupyana silenzi kuti amuvyalile ana.’

²⁵ Kwali aina cinimbali aikalanga naswe. Uwakutandika watwite mama, nga afwa kwaula kusya nanti umwana. Alino umwina wakwe ciili, apyana silenzi.

²⁶ Cali cili conga na kuli wakwe ciili na wakwe citatu, nga kufika na kuli wakwe cinimbali kwene.

²⁷ Lyene umwanaci uwasyalikizye ukufwa.

²⁸ Uzye lyene, pa wanda wa kuzyukuka wene alaya muci wakwe weni? Pano yonsi kwene yamutwite.”

²⁹ Yesu nawe aasuka ati, “Mwaponga, pano mutamanya malembelo, nanti maka yakwe Leza.

³⁰ Pano lino afwe yalazyukuka, yatalatwala nanti kutwalwa, lelo yalakolana wa angeli ya mwiyulu.

³¹ Pamulandu wa kuzyukuka kwa afwe, uzye mutawelenga vino Leza wavwanga kunomuli?

³² ‘Wene watile nene Leza wakwe Abulaamu, na wakwe Isaki na Yakobo.’ Wene asi Leza wa afwe, lelo a Leza wa antu aumi.”

³³ Lino maumba yuvwa cii, yazunguka cuze pa usambilizyo wakwe.

Isunde likulu kuluta

³⁴ Lelo lino Afaliseo yuvwa vino Yesu watamyalalika Asaduki, yakongana pali pamwi.

³⁵ Na wenga uwa munoyali, uwali nkonkotela ya Masunde, amuuzya iuzyo kuti amwezye, ati,

³⁶ “Kasambilizya, pa masunde yakwe Leza onsi, uzye isunde cii likulu kuluta?”

³⁷ Yesu nawe aasuka ati, “ ‘Uwatemwa Mwene Leza wako nu mwenzo wako onsi, nu umi wako onsi, na mano yako yonsi.’

³⁸ Lii lili sunde likulu nupya ilya cindama kuluta Masunde onsi.

³⁹ Na lyakwe ciili likoline na lii, nalyo likati, ‘Uwatemwa umuzo ndi vino waitemwa.’

⁴⁰ Masunde alembwa mu mpapulo zyakwe Mose nga nu mu mpapulo zyakwe yakasema yonsi kwene yemelela pa Masunde yaa, oili.”

Iuzyo lya pali Katuula Uwalavilwe?

⁴¹ Lino Afaliseo yakongana pali pamwi, Yesu ayauzya ati,

⁴² “Uzye mukwelenganya uli pali Katuula uwalavilwe? Uzye wene amwana weni?” Nao yaasuka yati, “Umwana wakwe Davidi.”

⁴³ Alino Yesu ayauzya ati, “Uzye lyene pacani Mupasi Wamuzilo walenzile kuti Davidi amwame ati, ‘Mwene?’ Davidi wavwanzile ati,

⁴⁴ ‘Mwene wanenyile Mwene wane ati, Ikala kwi kasa lilunji lyane kufika lino ndakucimvizya anisi yako.’

⁴⁵ Davidi ndi wamwamile ati, ‘Mwene,’ Uzye Katuula uwalavilwe angaya uli umwana wakwe Davidi?”

⁴⁶ Kutali umuntu nanti wenga wakuti amwasuke. Nupya kufuma pa wanda kwene ulya kutali umuntu nanti wenga wezizye kumuuzya iuzyo na lyuze.