Mateo 21 - Amazwi Yakwe Leza 2013

Yesu wingila nu ucindami mu Yelusalemu

¹ Lino Yesu na alondezi yakwe yapalama ku Yelusalemu, iiza ku muzi wa Betifage, pa Mwamba wa Olivi. Yesu atuma alondezi yakwe yaili nkolelo.

² Ayanena ati, “Yangini ku muzi ulya uuli nkolelo inu, nga lilyo kwene lino mwafika, mumaya mukazane punda anyefilwe nga nu mwana aimi pa mbali. Muyasapule nu kuyaleta kunondi.

³ Muntu umwi ndi walanda cintu cili consi kunomuli, mumunene muti, ‘Mwene akuyalonda’, nga nawe amamuzumilizya kuyasenda.”

⁴ Vintu vii vyacitike kufikilizya vino kasema wavwanzile ati,

⁵ “Nenini antu amu musumba wa Zioni muti, ‘Lolini, Mwene winu akwiza kunomuli! Wene umufuke, nupya akwezile pali punda. Wene akwiza nupya akwezile pali mwana punda.’ ”

⁶ Alondezi yapita, yaya yacita vino Yesu wayanenyile.

⁷ Yaleta punda nu mwana. Yanzapo ni nsalu zyao, nga Yesu akwelapo.

⁸ Alino antu, iumba likulu cuze yaanza insalu zyao mu museo, nga yamwi nao yatema misambo ya miti iyali na mafwa yaanza mu museo.

⁹ Antu ali nkolelo nga na alondile cisila yonsi pamwi yasanzula mazwi yao yati, “Mucinzi upelwe ku Mwana wakwe Davidi! Walongo awiyo akwiza mwi zina lya Mwene! Mucinzi upelwe kuli Leza uwa papelapela!”

¹⁰ Lino Yesu wingila mu Yelusalemu, mu musumba onsi mukaya na see. Alino antu yaauzya yati, “Uzye wii aweni?”

¹¹ Antu amwi umba yaasuka yati, “Wi ali kasema, Yesu uwaku Nazaleti, ku Galile.”

Yesu wazinga aculuzi mu Ng'anda ikulu yakwe Leza

¹² Yesu aingila mu Ng'anda ikulu yakwe Leza, azinga aculuzi na akauzyanyanga vintu vyao. Lyene apenola vipango vyakwe yakakauzya ya mpiya ni vilimba vyakwe yano akazyanga inkunda.

¹³ Ayanena ati, “Calembwa mu malembelo cati, ‘Ing'anda yane ilaamwa ing'anda ya mapepo.’ Lelo mwemo mwaicita ininga ya iivi.”

¹⁴ Impafu ni vilema iiza kunoli, ku Ng'anda ikulu yakwe Leza, nga nawe ayapozya.

¹⁵ Lelo yasimapepo akalamba na yakasambilizya ya Masunde yasoka cuze pa kulola vintu vino wacisile vyakuzunguka, nga na vino ana anono yalaizyanga mu Ng'anda ikulu yakwe Leza, ala yakuti, “Mucinzi upelwe ku Mwana wakwe Davidi!”

¹⁶ Alino yuzya Yesu yati, “Uzye ukuuvwa vino ana yaa yakuvwanga?” Yesu nawe aasuka ati, “Ee. Uzye mutawelenga mu malembelo vino Leza wavwanga ati, ‘Watusambilizya ana anono nga nu tunya tukoonka kukulumbanya cifumaluke.’ ”

¹⁷ Alino Yesu afuma mu musumba, ayasya aya ku Betaniya akuno waile asendama.

Yesu watipwila musamvu

¹⁸ Katondo tondo uwanda uwalondelile, lino akuwela ku musumba auvwa inzala.

¹⁹ Lyene lino walola musamvu uwali umu mbali ya museo, ayako, lelo atazanyileko vizao, suka sile mafwa. Alino aunena ati, “Kufuma ndakai utakaseeke vizao nupya.” Lilyo kwene musamvu uma.

²⁰ Lino alondezi yalola cii, yazunguka cuze, nga yuzya yati, “Uzye musamvu uma zuwa uli?”

²¹ Yesu nawe aasuka ati, “Cumi namunena vino ndi mukweti utailo, ndi musyakutwisika, mulacita na cino nati ncita ku musamvu. Mulanena nu mwamba kwene uu, muti, ‘Katuka uisumbe muli yemba,’ nga cilacitika vivyo kwene.

²² Na consi cino mwalenga mwi pepo, ndi mwataila mulapokelela.”

Yesu yamuzya kuno wafumya maka

²³ Lino wingila mu Ng'anda ikulu yakwe Leza, yasimapepo akalamba na aikolo ali ntunguluzi zya antu iiza kunoli ala akusambilizya, yamuzya yati, “Uzye maka cii yano ukweti akucita vintu vii? Uzye aweni uwakupeela maka kwene yaa?”

²⁴ Yesu nawe aasuka ati, “Nani kwene namamuzya iuzyo lyonga sile. Namwe ndi mwasuka namamunena uwampela maka akucita vintu vii.

²⁵ Uzye Yoane wafumizye kwi maka akuwatizya? Uzye akuli Leza nanti ku antu?” Nao yatandika kupazyanya aisikulu yati, “Uzye tumati uli? Ndi twati, ‘Wafumizye kuli Leza,’ nawe amati, ‘Uzye lyene, pacani mutataile Yoane?’

²⁶ Nupya tutangati, ‘Wafumizye ku antu!’ Swemo tukoopa antu pamulandu wakuti yene yasininkizya vino Yoane wali akasema.”

²⁷ Acino yaasuka Yesu yati, “Tutamanyile.” Lyene Yesu nawe ayanena ati, “Nani kwene ntakumunena uwampela maka akucita vintu vii.

Mulumbe wa ana yaili aonsi

²⁸ “Alino Yesu avwanga ati, namamunena mulumbe wa muntu uwakweti ana yaili aonsi. Lyene namwe mumanena vino mukwelenganya. Umuntu wii waile ku mwana uwali silenzi wa muze, amunena ati, ‘Mwana we, ilelo yanga kaombe mu calo ca matingi.’

²⁹ Lelo mwana aasuka ati, ‘Awe, ntakuya nkaombe.’ Pacisila apinduluka, aya aomba.

³⁰ Lyene aya na kuli wakwe ciili, amunena cili conga kwene. Nawe aasuka ati, ‘Mukwai namaya nkaombe.’ Lelo pacisila ataile akaombe.

³¹ Uzye pali yaa yaili, aweni wacisile cino isi walondanga?” Nao yaasuka yati, “A silenzi wa muze.” Yesu nawe ayanena ati, “Cumi namunena vino yakasonkesya nga na yacizelele yalamukolelela kwingila mu Wene wakwe Leza.

³² Pano Yoane wizile kunomuli nu kumulanga vino mungalondela nzila ya wololoke wakwe Leza, lelo mutamutaile. Yakasonkisya na yacizelele yene yamutaile. Lelo mwemo nanti angala mwaweni cii, mutazenzwike nu kumutaila.”

Mulumbe wa alimi ya calo ca matingi

³³ Yesu ayanena ati, “Uvwini mulumbe nauze. Kwali umuntu umwi uwa kweti impanga, muno walimile calo ca matingi apindila ni cimpinda. Lyene aimbamo ni ciwina ca kufenelamo matingi, nga akuula nu lupungu. Alino apanzisya icalo cakwe ku alimi, nga apita ku mpanga ya kutali.

³⁴ Lino nsita yakuzombola yafisile, atuma aomvi yakwe ku alimi kuti yakatole mulingo wakwe uwa vizao vya matingi.

³⁵ Alimi yalema aomvi yakwe, yuma wenga, yakoma muze, nga wakwe citatu wene yamutama na mawe.

³⁶ Nupya aca atuma aomvi yauze aingi. Lelo nao kwene yayacita cili conga.

³⁷ Lyene pacisila atuma mwana wakwe umonsi kuno yali, avwanga ati, ‘Umwanane wene yalamucindika.’

³⁸ Lelo lino alimi yalola mwana, yalanda yati, ‘Wii, ali mwana wakwe aalatoola icuma. Tuini tumukome nga tutoole icalo.’

³⁹ Caleka yalemile mwana, yamusumbila kunzi ya calo ca matingi, nga yamukoma.

⁴⁰ “Lyene lino mwine wa calo ca matingi aliza, uzye wene alacita uli ku alimi yaa?

⁴¹ “Nao yaasuka yati, alakoma alimi yaa mu musango umwi uwipisye, nu kupanzisya calo ca matingi ku alimi yauze, yano alamupeela mulingo wa vizao vino alatola pa nsita ya kuzombola.”

⁴² Lyene Yesu ayauzya ati, “Uzye mutatala mwawelenga mu malembelo yano akati, ‘Iwe lino yakakuula yakanyile, lyene lyacisilwe iwe lya pitungi lya ng'anda. Mwene uwacita vii, uzye catuzungusya uli mu manso itu?’

⁴³ “Caleka namunena vino isyuko lya kuya mu Wene wakwe Leza lilapokwa kufuma kunomuli nu kupelwa ku antu yauze, yano alacita milimo ino akalonda.” [

⁴⁴ Wino wensi alaponela piwe lili wene alavuneka, lelo wino wensi wino iwe lili lilaponela wene alavungolwa.]

⁴⁵ Lino yasimapepo akalamba na Afaliseo yuvwa milumbe yakwe Yesu, yamanya vino akulanda pamulandu na alio.

⁴⁶ Lyene yalonda nzila yakumulemelamo, lelo yoopa iumba pano antu yataile vino Yesu akasema.