Mateo 18 - Amazwi Yakwe Leza 2013

Uzye mukulu aweni?

¹ Pa kasita kaka alondezi iiza kuli Yesu, yamuzya yati, “Uzye mukulu kuluta yonsi mu Wene wa mwiyulu aweni?”

² Lyene Yesu aama mwana munono, amwimika pa nkolelo yao,

³ Ayanena ati, “Cumi namunena, ndi mutasenwike nu kuicefya wa ana anono, mutalingila mu Wene wa mwiyulu.

⁴ Caleka wino wensi uwaicefya wa mwana munono wii, wene ali mukulu mu Wene wa mwiyulu.

⁵ Wino wensi akazengela mwana munono wakwe wii, pamulandu wane, ala wanzengela.

Intulo ya maifyo

⁶ “Muntu umwi ndi alalenga wenga uwamu ana anono uwantaila ukwifya, cazipila umuntu wiyo kumunyepelela iwe lyakusiila likulu mu nsingo nu kuleka amwele muli yemba, pi ziya.

⁷ Kalanda ku antu mu nsi pamulandu wa vintu vino vikalenga antu ukwifya. Pano ukwifya kumayangako lyonsi, lelo kalanda ku muntu wino akulenga kuti antu yaifya.

⁸ “Ikasa lyako nanti kulu lyako ndi lyakulenga ukwifya liputule, nu kulisumba. Cakuzipila ukwingila mu umi na makunkutu nanti ulema, kuluta ukuya na makasa yaili nanti amakulu yaili nu kusumbwa mu Gehena.

⁹ Ilinso lyako ndi lyakulenga ukwifya, litonkole nu kulisumba! Cakuzipila kwingila mu umi ni linso lyonga, kuluta ukuya na manso yaili nu kusumbwa mu moto uwamu Gehena.

Mulumbe wa mfwele iponge

¹⁰ “Cenjelini mutezya kuti musule wenga uwamu ana yaa anono. Pano nsita zyonsi angeli yao aakayalinda, yene yakaikala pipi na Tata wino ali mwiyulu. [

¹¹ Pano Mwana wa Muntu wizile kuti atuule aponge.]

¹² “Uzye mwemo mungelenganya uli pali vino umuntu akacita ndi wakweti mfwele mwanda, lyene yonga yaponga? Akasya zyonsi makumi fundimbali na fundimbali kuti apite ku kulonda yonga iyati ponga.

¹³ Lino waizana, cumi kwene aya ni nsansa cuze kuluta pa mfwele makumi fundimbali na fundimbali izitaponzile.

¹⁴ Mu musango uli onga kwene, So uwa mwiyulu asyalonda nanti wenga uwamu anono yaa, aponge.

Ivyakucita munyonko ndi wakwifya

¹⁵ “Munyonko ndi wakwifya, yanga kunoli umulange kuluvyanya kwakwe lino muli sile mweili. Ndi wakuuvwa, lyene ale mwawikizyanya wa ina.

¹⁶ Lelo ndi wakana kuvwa kunuli, senda umuntu wenga nanti yaili, pakuti mulandu onsi usininkiziwe na yakambone yaili nanti yatatu.

¹⁷ Ndi wakana kuvwa kunoyali, kanene iuvi. Ndi wakana kuvwa nu kwi uvi kwene, mumucite wa muntu atataila Leza nanti wakwe kasonkisya.

Kuzumilizya nanti kuinda

¹⁸ “Cumi namunena vino, consi cino mwainda muno nsi, cilaindwa nu mwiyulu kwene. Na consi cino mwazumilizya muno nsi, cilazumiliziwa nu mwiyulu kwene.

¹⁹ “Nupya namunena vino yaili munomuli ndi yazumilizyanya muno nsi cimwi nu kulenga mwi pepo, cino yalenga cilapelwa kunoyali na Tata uwa mwiyulu.

²⁰ Pano kuno antu yaili nanti yatatu yakongana mwi zina lyane, nani ndaya nao.”

Mulumbe wa muomvi asyaelela muze

²¹ Lyene Petulo aiiza kuli Yesu amuuzya ati, “Mwene uzye amaila yanga yano ningelela umwinane nga wanjifya? Uzye ningamwelela maila cinimbali?”

²² Yesu nawe aasuka ati, “Ntakukunena vino kufika pa maila cinimbali, lelo kufika pa makumi cinimbali maila cinimbali.

²³ Caleka Uwene wa mwiyulu wakolana nu mwene umwi uwakasi kupituluka muli vino vyalembwa pamulandu ni nkongole zino aomvi yakwe yakweti kunoli.

²⁴ Lino watandika kupituluka, yamuletela muomvi wenga uwakofile impiya mintapendwa.

²⁵ Pamulandu wakuti muomvi atakweti cakuti alipe, mwene apeela ilamulo kuti yamukazye. Alino yakazye umuci, ana nga na vyonsi vino wakwata pakuti alipe impiya zyonsi zino wakofile.

²⁶ Caleka muomvi afukama nkolelo ya mwene, amupapata ati, ‘Mwene, untekelele, nani ndakulipa vyonsi vino nakopa.’

²⁷ Lyene mwene amuyela luse, amwelela inkongole zyonsi zino wakweti, nga amuzumilizya kuti apite.

²⁸ “Lyene lino muomvi wafuma nu kupita, umu nzila azana muomvi muze wino wamukofile impiya madenali mwanda, amulema, amutitila pa nsingo ati, ‘Ndipa inkongole yane.’

²⁹ Lyene muomvi muze afukama pansi, amupapata ati, ‘Untekelele, nani ndakulipa.’

³⁰ Lelo wene akana, amutwala ku ng'anda yaminyololo kuti akayalilwe kufika na lino alalipa nkongole yakwe.

³¹ Lino aomvi yauze yalola vino wacita, yaya nu ulanda cuze, yaya yanena mwene wao vyonsi vyacitike.

³² Lyene mwene amwama, amunena ati, ‘Wewe muomvi mwipe! Nemo nali nakwelela inkongole zyonsi, pano wampapasile.

³³ Uzye nawe utali nu kuyela muomvi muzo luse nu kumwelela wakwe vino nemo nakwelela?’

³⁴ Alino mwene auvwa icipyu, amupeela ku angalizi ya ng'anda yaminyololo kuti yamusunge kufika lino alalipa inkongole zyonsi.”

³⁵ “Mu musango uli onga avino Tata uwa mwiyulu alamucitila ndi musyakwelela anyonko ni myenzo yonsi.”