Mateo 15 - Amazwi Yakwe Leza 2013

Intambi zya vikolwe vya Ayuda

¹ Uwanda umwi Afaliseo na yakasambilizya ya Masunde yamwi afumile ku Yelusalemu iiza kuli Yesu. Alino yamuzya yati,

² “Uzye pacani alondezi yako yasyayela intambi zino vikolwe vitu vyatusilile? Pano yene yakalya ni minwe ya mifitalila kwaula kufulala ku minwe kulingana nu lutambi lwa vikolwe vitu.”

³ Yesu aasuka ati, “Uzye pacani cino mwemo pakwemelela ku ntambi zinu musyayela masunde yakwe Leza?

⁴ Pano Leza wakonkomizye ati, ‘Cindika so na nyoko. Wino wensi asicindika isi nanti nyina alinzile ukufwa.’

⁵ Lelo mwemo mukasambilizya ukuti umuntu ndi akweti cimwi cino angapeela kwazwa isi nanti nyina, lelo ndi wati, ‘Uu, uwila kuli Leza,’ wene atangapeelwa mulandu pa kuntazwa isi nanti nyina.

⁶ Mu nzila ii mukalenga antu kusula masunde yakwe Leza pamulandu wa ntambi zinu.

⁷ Mwe yasomvi mwe! Ezaya wali ningo lino wasemile pali mwemwe, ati,

⁸ ‘Antu yaa yakancindika sile mu mazwi yao. Lelo melenganyo yao yali kutali kufuma kunondi.

⁹ Nanti yakumpepa icasilesile, pano yakasambilizya masunde ya untunze kwati ali masunde yane!’ ”

Ivintu ivikakowezya umuntu

¹⁰ Lyene Yesu aama iumba kunoli alinena ati, “Uvwini kunondi mwensi, nu kumanya.

¹¹ Pasi cimwi cino cikaingila mu mulomo wa muntu cingamukowezya, lelo cino cikafuma mu mulomo wa muntu cene cingamukowezya.”

¹² Lyene alondezi iiza kunoli yamuzya yati, “Uzye watumanya vino Afaliseo yafwitoka pali vino walanda?”

¹³ Ayanena ati, “Muti onsi uno Tata wa mwiyulu atalemile ulipulwa kumwi ni misisi.

¹⁴ Lekini yaye. Yene intunguluzi mpafu. Impafu ndi yatungulula impafu yuze, ale zyoili kwene zingaponela mu ciwina.”

¹⁵ Petulo avwanga ati, “Tunene vino mulumbe uu ukusenula.”

¹⁶ Yesu ayauzya ati, “Uzye namwe kwene mutilwike?

¹⁷ Uzye mutamanyile vino consi icikaingila mu mulomo cikaya munda nga cifumila kunzi?

¹⁸ Lelo vintu vino vikafuma mu mulomo vyene vikafuma mu mwenzo nupya vikakowezya umuntu.

¹⁹ Pano mu mwenzo mukafuma amelenganyo yankota akamutungulula ku kukoma, kulongozya, nu kucita vintu vya winyi, uwivi, umboni waufi, kutumpwila.

²⁰ Vintu vii vyene vikakowezya umuntu. Lelo kulya ni minwe ya mifitalila kutangakowezya muntu.”

Utailo wa mwanaci umwina Kenani

²¹ Lyene Yesu afuma ku cifulo cici aya ku mpanga ya mupipi ni misumba ya Tuli na Sidoni.

²² Lyene umwanaci umwina Kenani uwikalanga pipi nu ku cifulo cii aiiza alaizya ati, “Mwene, we mwana wakwe Davidi, ya na mizu kunondi! Mwanane kaci akacuziwa cuze nu mupasi wankota.”

²³ Lelo Yesu atavwanzile nanti izwi. Alino alondezi iiza yamupapata yati, “Muzinge pano akutwanoola.”

²⁴ Lelo wene avwanga ati, “Natumwa sile ku ina Izlaeli, yao ali wa mfwele ziponge.”

²⁵ Lyene umwanaci aiiza amufukamila ati, “Mwene ungazwe!”

²⁶ Yesu amunena ati, “Cisi cisuma kutoola vyakulya vya ana nu kusumbila yasimbwa.”

²⁷ Lelo umwanaci avwanga ati, “Endi, Mwene na yasimbwa kwene yakalya vilakasi vya vyakulya vya ana vino vikapona pa cipango cakwe wino uwayateeka.”

²⁸ Alino Yesu nawe amunena ati, “Mwanaci we, utailo wako ukulu cuze! Umacitilwa cino ukulonda.” Lyene mwana wakwe kaci apoziwa pa kasita kwene kako.

Yesu wapozya antu aingi

²⁹ Alino Yesu afuma kuku, apita mu nkumba yakwe yemba wa Galile. Lyene akwela umwamba aikala.

³⁰ Lyene maumba akulu cuze iiza kunoli, ala yasenzile vilema, impafu, vite, yaciulu nga nayauze aingi a ndema zipusanepusane. Alino yayateka inkolelo yakwe Yesu, nawe ayapozya.

³¹ Caleka antu yonsi yazunguka lino yalola vino yaciulu yakuvwanga, vilema vyapoziwa, vite navyo vikupita, nga na vino impafu zyatandika kulola. Alino yalumbanya Leza wa Izlaeli.

Yesu wimula antu kuluta pa mazimbi yani

³² Yesu aama alondezi yakwe kunoli ayanena ati, “Naya na mizu pa antu yaa, pano yali nani manda yatatu lelo yatakweti cakuti yalye. Ntakasi kuti yapite kumwao kwaula kulya cimwi, pano yamaongoka mu nzila.”

³³ Alondezi yakwe nao yamuzya yati, “Uzye aukwi mu lwanga kwene muu kuno tungazana vyakulya vya kwimula iumba likulu ndi lii?”

³⁴ Yesu ayauzya ati, “Uzye mukweti mikate inga?” Nao yaasuka yati, “Tukweti mikate cinimbali, nga nu tuswi tunono.”

³⁵ Alino Yesu apeela ilamulo kwi umba kuti likale pansi.

³⁶ Lyene atoola mikate cinimbali nu tuswi, nga pacisila ca kutaizya kuli Leza, aimokoola, apeela alondezi yakwe, nao yapela kwi iumba.

³⁷ Antu yonsi yalya iikuta. Lyene pacisila alondezi yasola imvungwa izyasile, yazuzya imise cinimbali.

³⁸ Na pa antu yano alile pali aonsi mazimbi yani, kwaula kupenda anaci na ana.

³⁹ Alino Yesu yapakasyanya na antu, nga apatama mu wato, aya ku mpanga yali pipi nu ku Magadani.