Mateo 14 - Amazwi Yakwe Leza 2013

Imfwa yakwe Yoane Kawatizya

¹ Mu manda yalya, Helodi kateeka uwamu Galile uvwile mpwelo ya pali Yesu.

² Alino anena nkombe zyakwe ati, “Cumi kwene wii a Yoane Kawatizya uwatazyukuka kufuma ku afwe.” Acino akwatile na maka akucita vinjelengwe.

³ Pano nkolelo Helodi wapile ilamulo kuti yaleme Yoane, yamunyepe nu kumuyalila mu ng'anda yaminyololo. Wacisile cii pamulandu wakwe Helodia muci wakwe Filipo mwina wakwe.

⁴ Pano Yoane wanenanga mwene Helodi ati, “Citaine ni sunde kutwala Helodia!”

⁵ Helodi walondanga kukoma Yoane, lelo oofile Ayuda pano yene yataile vino Yoane akasema.

⁶ Pa wanda wa kuzangila kuvyalwa kwakwe Helodi, kwali cimulo. Alino umwana umwanaci wakwe Helodia wizile acina inkolelo yakwe yao amilwe ku cimulo. Helodi nawe camuzanzizye cuze,

⁷ cakuti amulaya nu mulapo ati, “Nalaya nu mulapo ukuti namakupeela consi cino umalenga!”

⁸ Lyene nyina anena mwana ati, “Yanga kamulenge uti, ‘Umpeele ndakai kwene umutwe wakwe Yoane Kawatizya pa mbale.’ ”

⁹ Cii, calenzile mwene kuya nu ulanda cuze. Lelo pamulandu wa mulapo wakwe uno wacisile pa manso yakwe yao amilwe ku cimulo, apeela ilamulo ku yaomvi yakwe kuti yapeele mwana cino akulonda,

¹⁰ nga yaya mu ng'anda yaminyololo, yaputula umutwe wakwe Yoane.

¹¹ Lyene yaleta umutwe pa mbale, yaupeela ku mukazyana, nawe autwala kuli nyina.

¹² Na alondezi yakwe Yoane iiza yasenda icala cakwe yaya yazika, nga yapita yaya yanena Yesu.

Yesu wimula antu kuluta pa mazimbi yasano

¹³ Lino Yesu uvwa icaticicitika, apaatuka apita mu wato, aya ku cifulo cili cele. Lino maumba yuvwa ukuti watapita, yafuma mu misumba yapita ni ngazo, yamulondela.

¹⁴ Lino Yesu wapatuka mu wato, alola iumba likulu cuze, nga aya na mizu, apozya yao ali alwale.

¹⁵ Insita ya manguzi, alondezi yakwe yapalama kunoli, yamunena yati, “Kuno uku lwanga, nupya ilanzi lyatemba. Nena antu yapite, kuti yaye mu mizi yakaikalile vyakulya.”

¹⁶ Yesu aasuka ati, “Cisyakulondekwa kuti yapite. Mwemwe kwene yapelini vyakuti yalye.”

¹⁷ Nao yamunena yati, “Kuno tukweti sile mikate isano nga ni nswi ziili.”

¹⁸ Nawe ayanena ati, “Letini kunondi.”

¹⁹ Alino apeela ilamulo ku antu kuti ikale pa masote. Alino Yesu atoola mikate isano ni nswi ziili, alingamila kwiyulu, ataizya kuli Leza. Lyene amokoola mikate, nga apeela alondezi yakwe nga nao yapela antu.

²⁰ Onsi yalile iikuta. Lyene alondezi yasola imvungwa izyasile, yazuzya imise ikumi na iili.

²¹ Na pali yao alile pali manye aonsi mazimbi yasano, kwaula kupenda anaci na ana.

Yesu wapita pa manzi

²² Manguzi kwene yalya Yesu anena alondezi yakwe kuti yapatame mu wato yamukolelele ku mbalama yuze yakwe yemba. Lelo wene asyala akunena antu kuti yapite kumwao.

²³ Pacisila lino waleka maumba yapita, apita aya akwela mwamba ku kupepa wenga. Lino kakuku katola wali wenga sile kweneko.

²⁴ Lelo uwato wene wali patali ni cituntu, ala ukupumwa na maimbi, pano cipupu cafumanga kuno uwato wayanga.

²⁵ Lyene pa macaca Yesu aiiza kunoyali ala akupita pa manzi.

²⁶ Lelo lino alondezi yamulola akupita pa manzi, yuvwa intete. Alino yapunda yati, “Umuyeye!”

²⁷ Lyene lilyo kwene Yesu nawe avwanga kunoyali ati, “Posyini! Anene! Mutoopa!”

²⁸ Lyene Petulo amunena ati, “Mwene nda wewe, unene kuti nize kunuli pa manzi.” Yesu nawe amunena ati, “Iza.”

²⁹ Alino Petulo afuma mu wato, apita pa manzi, alungama kuli Yesu.

³⁰ Lelo lino walola vino kwaya cipupu, auvwa intete, atandika kutuwila, nga akuta ati, “Mwene, ntuule.”

³¹ Lilyo kwene Yesu atambika ikasa amulema. Alino amunena ati, “We wa utailo unono, uzye pacani watwisika?”

³² Lyene oili yapatama mu wato, nga cipupu cilala.

³³ Alino alondezi yano ali mu wato, yamufukamila, yavwanga yati, “Cumi, wewe Mwana wakwe Leza.”

Yesu wapozya alwale ku Genesaleti

³⁴ Lyene lino yalamba mbalama yuze, yakooka pa Genesaleti.

³⁵ Lino antu amu mpanga ilya yalooka ukuti a Yesu, yamanyisya antu konsi konsi, vino wene wataiza nga nao yaleta alwale kunoli.

³⁶ Alino yaletela Yesu alwale yao onsi, nga yamulenga kuti aleke alwale yaleme nanti kwi sempele lya cizwalo cakwe. Na yano onsi alemileko yapoziwe.