Mateo 13 - Amazwi Yakwe Leza 2013

Mulumbe wakwe kata wa mbezu

¹ Wanda uwo kwene Yesu afuma mu ng'anda aya ku nkumba yakwe yemba.

² Maumba akulu cuze yakongine panoli cakuti apatama mu wato umwi, amuno aikala. Lelo iumba lyene limilila pa nkumba yakwe yemba.

³ Alino ayanena vintu vingi mu milumbe ati, “Uvwini! Kwali kata wa mbezu uwaile ku kuta imbezu.

⁴ Lyene lino akuta, imbezu zimwi ziponela mu nzila, ni vyunyi viiza vizikompa.

⁵ Zimwi ziponela pa lwala, apali musili unono, zimela zuwa, pano musili utavuzilepo.

⁶ Lyene lino ilanzi lyasanzama nu kuwala, ilyoca ivimelwa navyo vyuma, pano misisi itingile pansi.

⁷ Imbezu zimwi ziponela mu myunga. Lyene myunga ikula, izitotola, nazyo zitafukwile.

⁸ Lelo imbezu zimwi ziponela pa musili uvunde, nga lino zyamela, zikula nu kuseeka vizao vivule, zimwi umwanda onga, zimwi makumi mutanda, nga na zimwi makumi yatatu.”

⁹ Lyene Yesu ayanena ati, “Ali na matwi yakuuvwa, auvwe!”

Imilimo ya milumbe

¹⁰ Pacisila alondezi iiza yamuzya yati, “Pacani ukuvwanga ku antu mu milumbe?”

¹¹ Yesu nawe aasuka ati, “Mwemo mwapelwa amano ya kumanya nkama zya Wene wa mwiyulu, lelo yene yatapelwa.

¹² Pano wino wensi akweti wene alapeelwa navyuze, na wino wensi atakweti cimwi nawe alapokwa nu tunono tuno akwelenganya kuti akweti.

¹³ Pamulandu kwene uu, nkavwanga kunoyali mu milumbe, pano yangalolekesya lelo yatangalola ningo, nu kuvwa yanguvwa lelo yatangamanya.

¹⁴ Muli yaa usemo wakwe Ezaya wafikiliziwa, uno ukati, ‘Kuuvwa muluvwa, lelo mutalamanya ningo; nu kulola mulalola, lelo mutangamwiluke,

¹⁵ pano mano yao yakupwa, nga yacilika na matwi yao, na manso yao yazyata. Pano limwi manso yao yangalola, na matwi yao yanguvwa, nu kumanya yangamanya ningo, nu kuzenzuka yangazenzuka, nani ningayapozya.’

¹⁶ “Lelo mwemo muli nu longo! Pano manso inu yakalola na matwi inu yakauvwa.

¹⁷ Pano cumi namunena vino yakasema na antu aololoke aingi nao kwene yalondanga kulola vintu vino mukulola, lelo yataviweni, nupya yalondanga ukuuvwa vino mukuuvwa, lelo yatavyuvwile.

Yesu wilula mulumbe wakwe kata wa mbezu

¹⁸ “Caleka uvwini nu kusambilila vino mulumbe uu wakwe kata wa mbezu ukusenula.

¹⁹ Yao akauvwa mazwi yano yakalanda vya pa Wene wakwe Leza kwaula kuyamanyikisya, yakoline wa mbezu izyaponile umu mbali ya nzila. Lelo mwanisi wakwe Leza aiiza afumya mazwi yano atewa mu myenzo yao.

²⁰ Imbezu izyaponile pa lwala, ayao yano ndi yuvwa mazwi yakwe Leza yayapokelela nu luzango.

²¹ Lelo yasiingila nu kwika misisi mukasi ka myenzo yao, nupya yasyaikalilila. Caleka lino ucuzi nanti kuzunyiwa viiza pamulandu wa mazwi yakwe Leza lilyo kwene yanenuka.

²² Imbezu izyaponile mu myunga, ayao akauvwa mazwi yakwe Leza. Lelo masakamiko ya wikazi uwamu nsi ii, kusombwa nu ukama, vikaingila nu kutotola mazwi, alino yasyaseeka vizao.

²³ Imbezu izyaponile pa musili uvunde ayao yano ndi yuvwa mazwi yakwe Leza, yuvwikisya nu kumanya. Yene yakaseeka vizao vivule, yamwi umwanda onga, yamwi makumi mutanda, nga na yamwi makumi yatatu.”

Mulumbe wakwe kalolo mu ngano

²⁴ Yesu ayanena mulumbe na uze ati, “Uwene wa mwiyulu ukoline ni cikacitika lino umuntu wata imbezu zisuma mu calo cakwe.

²⁵ Lelo lino antu yati yakasula, mwanisi wakwe aiiza ata kalolo mu ngano, nga apita.

²⁶ Lyene lino ingano zyamela, zikula nu kufukula, nga kalolo nawe aloleka.

²⁷ Alino aomvi yakwe iiza yamuzya yati, ‘Uzye utatile imbezu zisuma mu calo cako? Uzye lyene kalolo wafuma kwi?’

²⁸ Nawe ayaasuka ati, ‘Mwanisi uwatacita cii.’ Aomvi yamuzya yati, ‘Uzye ukulonda tuye tukipe kalolo?’

²⁹ Lelo nawe ayaasuka ati, ‘Awe, pano lino mukwipa kalolo mungipila kumwi ni ngano.

³⁰ Lekini vyonsi vikulile pamwi kufika ku uzombozi. Pa nsita ilya ndanena azombozi inti, mutandike kwipa kalolo, mumukolonganike nu kumunyepa mu myanzi, nu kooca mu moto. Alino lyene mukolonganike ingano nu kuzisezya mu nkoma.’ ”

Mulumbe wa lumbezu lwakwe musunta

³¹ Yesu ayanena mulumbe nauze ati, “Uwene wa mwiyulu ukoline wa lumbezu lwakwe musunta luno umuntu watile mu calo cakwe.

³² Nanti angala lwacepesya pa mbezu zyonsi, lelo ndi lwamela, lukulisya kuluta vilimwa vyonsi vyamu calo, nga lukula luya wa cimuti cakuti ni vyunyi viluka vinsanzo mu misambo yakweo.”

Mulumbe wa citutumusi

³³ Yesu ayanena mulumbe nauze ati, “Uwene wa mwiyulu ukoline wa citutumusi cino umwanaci watozile atikanya nu usu wa ngano uwingi kufika lino umunya watutumuka.”

Cino Yesu wavwangilanga mu milumbe

³⁴ Yesu wavwanzile vintu vii vyonsi ku maumba mu milumbe. Atayasambilizyanga cimwi kwaula kuomvya milumbe.

³⁵ Cii cacitike pakuti cifikiliziwe cino kasema wavwanzile ati, “Ndavwanga kunoyali mu milumbe, Ndasokolola vintu vino vyafiswa kufuma ku utandiko wa nsi.”

Yesu wilula mulumbe wakwe kalolo

³⁶ Lyene Yesu asya iumba, aingila mu ng'anda. Alondezi yakwe iiza kunoli yamunena yati, “Tunene vino mulumbe wakwe kalolo ukusenula.”

³⁷ Nawe ayanena ati, “Wino uwatile imbezu zisuma, Mwana wa Muntu.

³⁸ Calo cikwimilila insi. Imbezu zisuma zikwimilila antu amu Wene. Kalolo nawe akwimilila antu ya mwanisi wakwe Leza.

³⁹ Mwanisi wino watile kalolo akwimilila Ciwa. Uzombozi ukwimilila wanda wampelelekezyo ya nsi. Yakasinza nayo yakwimilila angeli.

⁴⁰ Caleka vino antu yakaipa yakolonganika kalolo nu kumoca mu moto, mu musango uli onga kwene avino cilaya pa wanda wampelelekezyo ya nsi ino.

⁴¹ Mwana wa Muntu alatuma angeli yakwe mu wene wakwe, nao yalakonganika nu kufumyamo antu yonsi akalenga auze kwifya nga na antu yonsi akacita viipe.

⁴² Lyene pacisila alayasumbila mwi lungu lya moto, muno yalalila nu kulumanya ncecete.

⁴³ Lyene antu akacita ivyawololoke yene yalaengesa wi lanzi mu Wene wakwe Isi. Ali na matwi yakuuvwa, auvwe!

Mulumbe wa cuma camutengo icafiswa mu calo

⁴⁴ “Uwene wa mwiyulu ukoline na cino cikacitika lino umwi wazana cuma camutengo cino umuntu wafisa mu musili mu calo. Lino wiza wacizana, nawe acifisa nupya, nga mu luzango apita, aya akazya vyonsi vino akweti, nga aiiza akala calo kwene cico.

Mulumbe wa mbela yamutengo

⁴⁵ “Nupya Uwene wa mwiyulu ukoline na cino cikacitika lino mulonsi akulondalonda mbela yamutengo.

⁴⁶ Lyene lino wazana mbela yamutengo ukulu cuze apita aya akazya vyonsi vino wakweti, nga aiiza aikala.

Mulumbe wi sumbo

⁴⁷ “Nupya kwene Uwene wa mwiyulu ukoline na cino cikacitika lino yamwi yasumba isumbo pali yemba, nga nu kulema inswi zya misango yonsi.

⁴⁸ Lyene lino lyazula, alondo yalikulila ku cituntu. Alino iikala pansi, nga yasololamo zisuma, yaziika mu mise. Lelo ziipe zyene yazisumba.

⁴⁹ Mu musango uli onga avino cilaya pa wanda wa mpelelekezyo ya nsi. Angeli yalafuma kwiyulu, nu kupaatula antu aipe ku antu aololoke,

⁵⁰ nga yasumbe aipe mwi lungu lya moto, mumo muno yalalila nu kulumanya ncecete.

Kasambilizya wa Masunde uwaya mulondezi

⁵¹ “Lyene Yesu auzya alondezi yakwe ndi cakuti yati yamanya vintu vii vyonsi.” Nao yaasuka yati, “Endi, Mwene.”

⁵² Alino ayanena ati, “Caleka kasambilizya wa Masunde wensi wino uwaya mulondezi wa Wene wa mwiyulu wene akoline nu mwine ng'anda, wino akafumya vyuma vyakwe vipya ni vikote mu nkoma yakwe.”

Yesu yamukana ku Nazaleti

⁵³ Lino Yesu wamala kuyanena milumbe ii yonsi, afuma kweneko,

⁵⁴ aya ku musumba uwa kumwao. Alino atandika kusambilizya antu mu ng'anda ya mapepo. Lyene onsi yazunguka cuze yuzyanya yati, “Uzye aukwi kuno umuntu wii wafumya amano yaa, nga na maka yakucita vinjelengwe?

⁵⁵ Uzye wii asi mwana wakwe kawaza wa mbao? Uzye nyina asi Maliya? Uzye aina yakwe yasi a Yakobo na Yose na Simoni na Yuda?

⁵⁶ Uzye yakaci yakwe yonsi yasiikala kuno mwitu? Uzye lyene aukwi kuno umonsi wii wafumya vintu vii vyonsi?”

⁵⁷ Alino yamukana. Yesu ayanena ati, “Kasema asyacindikwa ku mpanga ya kumwao nu ku amu ng'anda yakwe, suka kusi kumwao.”

⁵⁸ Lelo atacisile vinjelengwe vingi kuku, pano antu yatakweti utailo munoli.