Mateo 12 - Amazwi Yakwe Leza 2013

Iuzyo lya pamulandu wi Sabata

¹ Uwanda umwi pa Sabata, Yesu wapitanga asalala mu vyalo vya ngano. Na alondezi yakwe yali nawe, nga lino yakupita mu vyalo vya ngano, yuvwa inzala yatandika kutinkula misakinta ya ngano yalya.

² Lino Afaliseo yalola cii, yamunena yati, “Lola, alondezi yako yakucita cii citalingine na masunde itu pa Sabata.”

³ Yesu nawe aasuka ati, “Uzye mutawelenga cino Davidi wacisile lino wene na antu yano wali nao yuvwile inzala?

⁴ Davidi wingile mu ng'anda yakwe Leza, nga aliwe pamwi na yao ali nawe yalile mikate iyaziliziwe kuli Leza, ino umuntu sile atalinzile kulya suka sile yasimapepo?

⁵ Nanti uzye mutali muwelenge mu Masunde vino cila Sabata yasimapepo yakavuna sunde li Sabata mu Ng'anda ikulu yakwe Leza ukwaula kuvunukwa?

⁶ Namunena nati, mukulu kuluta Ing'anda ikulu yakwe Leza ali pano.

⁷ Lelo ndi cakuti mwamanyile vino mazwi yaa yakusenula akuti, ‘Nkulonda kuti mwalanga uluse ku antu yauzo kuluta kundetela impolelwa,’ lyene mutangavunuka yano asi na mulandu.

⁸ Pano Mwana wa Muntu wakwata maka akupingula vya kucita pa Sabata.”

Yesu wapozya umuntu uwali ni cizanza cilemale

⁹ Lino Yesu wafuma kweneko, aingila mu ng'anda ya mapepo,

¹⁰ umwali umuntu uwali ni cizanza cilemale. Lyene antu yamwi ali penepo yalondelezyanga mulandu wakupeela Yesu, nga yamuzya yati, “Uzye ciine na masunde kupozya mulwale pa Sabata?”

¹¹ Nawe ayauzya ati, “Umwi uwa munomuli ndi akweti mfwele yonga, nga nayo yaponela mu ciwina pa Sabata, uzye atangailema nu kuifumya?

¹² Uzye umuntu atalusile mfwele? Caleka masunde itu yazumilizya kwazwa pa Sabata.”

¹³ Lyene anena umuntu ati, “Ololola cizanza cako.” Nawe aololola, nga ciya icipuma nupya, wakwe vino cuze cali.

¹⁴ Afaliseo yafuma yaya yumana kapi kuti yamukome.

Yesu muomvi uwasololwa na Leza

¹⁵ Lino Yesu uvwa vino yati yumana kapi, afuma ku cifulo cici, na antu aingi yamulondela. Alino apozya alwale yao onsi,

¹⁶ ayapeela ilamulo kuti yatanena umuntu nanti umwi.

¹⁷ Vintu vii vyonsi vyacitike kuti cifikiliziwe cino Mwene wavwanzile kupitila muli kasema Ezaya ati,

¹⁸ “Lolini muomvi wino nati nsolola. Mukundwe wane, wino mwenzo wane ukazanga munoli. Namamwikila Mupasi wane, Nawe amakosolanga ivyawololoke vyakwe Leza ku antu amu nko zyuze.

¹⁹ Atalacita vikanza nanti kulaizya, nanti kusanzula izwi mu misolo.

²⁰ Atalavuna itete lifwampe, atalazimya nyali ikuzimantukila kufika lino alalenga kuti wololoke wakwe Leza ucimvye.

²¹ Munoli antu amu nko zyonsi yalapaalila.”

Yesu na Belezebu

²² Lyene yamuletela umuntu wino wali nu mupasi wankota, uwamucisile mpafu na uciulu, nawe Yesu amupozya, umuntu nawe avwanga, nga aalola.

²³ Alino antu yonsi yazunguka yati, “Uzye wii angaya Mwana wakwe Davidi?”

²⁴ Lelo lino Afaliseo yuvwa cii, yavwanga yati, Awe! “Kupitila sile muli Belezebu, mwanangwa wa mipasi yankota, amuno akafumizya mipasi yankota.”

²⁵ Lelo Yesu lino wamanya vino yakwelenganya ayanena ati, “Antu amu wene uli onsi ndi yakatukilana aisikulu nu kuilwisya, lyene uwene uwo ulawa. Na amu musumba uli onsi nanti amu ng'anda ndi yakatukilana aisikulu nu kuilwisya, yene yalapaatukana.

²⁶ Ndi amu wene wakwe Ciwa yakulwisyanya aisikulu, ale yakuipaatula. Uzye lyene uwene wakwe ungakoma uli?

²⁷ Ndi nkafumya mipasi yankota mu maka yakwe Belezebu, uzye antu inu yakaifumya mu maka yakwe weni? Caleka nda vino cili antu inu kwene yalamupingula ukuti mwaponga.

²⁸ Lelo ndi cakuti nkafumya mipasi yankota mu maka ya Mupasi wakwe Leza, ale lyene Uwene wakwe Leza wati wiza panomuli.

²⁹ “Kusi umuntu umwi angazanza ing'anda ya muntu wa maka nu kusenda vino wakwata suka inkolelo wanyepa umuntu wa maka, alino lyene angazanza ing'anda yakwe.

³⁰ “Wino wensi aakumpazya ala asi nani. Na wino wensi asingazwa kukolonganika ala akusalanganya.

³¹ Caleka namunena vino, maifyo ya antu na mazwi yao a misuli kuli Leza yonsi yangelelwa. Lelo wino wensi alavwanga mazwi ya misuli pali Mupasi Wamuzilo wene atalelelwa.

³² Wino wensi alavwanga mazwi aipe pa Mwana wa Muntu angelelwa. Lelo wino wensi alavwanga mazwi aipe pali Mupasi Wamuzilo wene atalelelwa, ndakai ni nsita ikwiza.

Umuti ni vizao vyauko

³³ “Ndi mwavwanga mwati, umuti uu usuma, kuli kuti ni vizao vyauko ivisuma. Lelo ndi mwati umuti uu uwipe ala ni vizao vyauko iviipe. Pano umuti onsi ukamanyika ku vizao vino ukaseeka.

³⁴ Mwe ana ya nzoka mwe! Uzye mungavwanga uli vintu visuma lino mwemwe yaipe? Pano mulomo ukavwanga vintu vizile mu mwenzo.

³⁵ Muntu musuma akafumya vintu visuma mu visuma vino wasunga mu mwenzo wakwe. Nu muntu mwipe akafumya viipe mu viipe vino wasunga mu mwenzo wakwe.

³⁶ “Lyene namunena nati, pa wanda wa upinguzi cila muntu alalondolola mulandu uno wavwanzile mazwi auwelewele.

³⁷ Pano Leza alaomvya mazwi yako kuti asininkizye ndi wewe wakaele nanti uwa mulandu.”

Antu yalonda cilangililo ca cinjelengwe

³⁸ Lyene Afaliseo na yakasambilizya ya Masunde yamwi yamunena yati, “Kasambilizya, tukulonda kulola cilangililo ca cinjelengwe kufuma kunuli.”

³⁹ Yesu avwanga ati, “Antu amu mukulo uu aipe nupya asi na utailo yakalonda cilangililo ca cinjelengwe! Lelo kusi cilangililo ca cinjelengwe icilapelwa kunoyali suka cilangililo cakwe kasema Yona.

⁴⁰ Pano wakwe vino Yona waizi munda ya ciswi amanda yatatu musanya nu usiku, avino nu Mwana wa Muntu alalala mu musili amanda yatatu musanya nu usiku.

⁴¹ Pa wanda wa upinguzi, antu amu Ninive yalimilila pamwi na antu amu mukulo uu nu kuyasinila, pano yene yazenzwike lino Yona wakosozile kuno yali. Lola, umwi mukulu kuluta Yona ali pano.

⁴² Pa wanda wa upinguzi namwene uwaku kaeya alimilila pamwi na antu amu mukulo uu nu kuyasinila, pano wapisile mpanga itali cuze kuya ku mwene Solomoni ku kuvwa mazwi ya mano kunoli. Lola, umwi mukulu kuluta Solomoni ali pano.

Mupasi wankota ukaswilila mu muntu

⁴³ “Lino mupasi wankota wafuma mu muntu, ukapitana mu lwanga ala ukulonda cifulo apa kupuza. Lelo ndi utazanyile pamwi,

⁴⁴ lyene ukati, ‘Namaswilila ku ng'anda yane ino nafumilemo.’ Lino waswilila, iuzana ing'anda musi cimwi, ipyele ningo na vyonsi iviseziwa.

⁴⁵ Lyene iufuma iuya uleta mipasi yuze cinimbali iipisye ukuuluta, nga iiza ikalamo. Lyene miyele ya muntu wiyo, iipisya kuluta vino yali pa kutandika. Avino cilaya ku antu aipe amu mukulo uu.”

Nyina na ina yakwe Yesu

⁴⁶ Lino Yesu acili vwanga kwi umba, nyina na ina yakwe yafika iimilila panzi, ala yakulonda kuti yavwange nawe.

⁴⁷ Alino umuntu umwi anena Yesu ati, “Ala nyoko na anyonko yaimi panzi yakulonda kuvwanga nawe.”

⁴⁸ Yesu amuuzya ati, “Uzye mayo aweni, nupya aina yane aaweni?”

⁴⁹ Alino lyene asonta pa alondezi yakwe, avwanga ati, “Lolini, yaa, ali yamayo, nupya ali ina yane.

⁵⁰ Pano wino wensi akacita kulonda kwakwe Tata uwa mwiyulu, wene ali mwina wane, na kaci wane na mayo.”