Mateo 11 - Amazwi Yakwe Leza 2013

Yoane Kawatizya watuma inkombe kuli Yesu

¹ Pacisila lino Yesu wamala kusunda alondezi yakwe ikumi na yaili, afumako ku cifulo cici, aya ku kusambilizya nu kukosola mu misumba yuze iyaya mu Galile.

² Lino Yoane kawatizya wali mu ng'anda yaminyololo uvwile ivya milimo yakwe Klistu. Alino atuma alondezi yakwe kuya uzya yati,

³ “Uzye wewe uli wino Yoane walanzile ukuti akwiza, nanti tumalolelanga muze?”

⁴ Yesu ayanena ati, “Pitini mukanene Yoane vintu vino mukuuvwa nu kulola.

⁵ Impafu zikulola, vilema vikupita, yakwe tembwe yakupoziwa, yacipuuli yakuuvwa. Afwe yakututululwa, ni Landwe Lisuma likukosolwa ku apina.

⁶ Alongo ayao asikuntwisika.”

⁷ Lino alondezi yakwe Yoane yaswililangamo, atandika kunena maumba vya pali Yoane ati, “Uzye mwaile ku lwanga kukulola cani? Uzye mwaile kukulola umuntu muzakantike wa mafwa akupungaila nu muza? Awe!

⁸ Ndi cisi vivyo uzye mwaile kukulola cani? Uzye umuntu uwazwite insalu ziyembe? Awe! Antu akazwala wakwe vivyo ayao akazanwa mu masano.

⁹ Lyene nenini, uzye mwaile kukulola cani? Uzye akasema? Endi, namunena mwaweni alusile kasema.

¹⁰ Pano Yoane awino calembwa mu malembelo pali aliwe cati, Leza wavwanzile ati, ‘Ndatuma inkombe yane, ikukolelele kuti ikateyanye inzila yako.’

¹¹ Cumi namunena vino, mu antu yonsi avyalwa mu nsi ii kusi umuntu wino alusile Yoane Kawatizya. Lelo wino ali munono mu Wene wa mwiyulu, wene ali mukulu kuluta Yoane.

¹² Kufuma mu manda yakwe Yoane Kawatizya kufika na ndakai, antu yakalwisyanya nu Wene wa mwiyulu, na antu ya maka alio yakuupoka.

¹³ Ivyalembwa mu mpapulo zyakwe Mose na zyakwe yakasema vyakosozilwe kufika mu manda yakwe Yoane Kawatizya.

¹⁴ Lyene ndi mukasi kutaila mazwi yano alembwamo, Yoane ali Eliya kwene, wino ukwiza kwakwe kwasowilwe.

¹⁵ Ali na matwi yakuuvwa auvwe!

¹⁶ “Uzye ningakolanya antu amu mukulo uu kuli cani? Yakolana wa ana atenzi mwi sokoni, ala yakulaizya yakuti,

¹⁷ ‘Twamulizizye vingwengwe vya pa winga, lelo mutacinyile! Twalaezile ni mpoma zya ndosya, lelo mutalosizye!’

¹⁸ Pano Yoane wizile, aizilizya ukulya nu kumwa waini, nga nao yati, ‘Ali nu mupasi wankota.’

¹⁹ Mwana wa Muntu wiza, akalya nu kumwa, namwe mukuti, ‘Lolini umuntu wii! Wene wapunuka nupya umukolesi. Wene acuza wakwe yakasonkesya na yakaifya.’ Lelo antu yalalola ukuti amano yakwe Leza alungame ndi yalola milimo yakweyo.”

Kalanda ku antu amu misumba asi na utailo

²⁰ Lyene Yesu atandika kupeela mulandu ku antu amu misumba muno wacisile vinjelengwe vingi, pano antu ali mwenemo yatazenzwike. Lyene avwanga ati,

²¹ “Kalanda ku antu amu Kolazini! Kalanda ku antu amu Betisaida! Ndi cakuti vinjelengwe ivyacisilwe munomuli vyacisilwe nu ku Tuli na Sidoni, antu ya kuku yange yazwale masaaka nu kuiswela itwi kuti yalange vino yati yazenzuka.

²² Lelo namunena nati, pa wanda wa upinguzi, mwemo mulavunukwa kuluta antu amu Tuli na Sidoni.

²³ Mwe antu amu Kapenaumu uzye mukwelenganya vino mungakweziwa kwiyulu kupela? Awe! Mulasumbwa pansi kuzimo! Pano ndi vinjelengwe ivyacisilwe munomuli ivyacisilwe mu Sodoma, Sodoma nga acilipo ni lelo.

²⁴ Cumi namunena nati, pa wanda wa upinguzi Leza alaya na mizu cuze pa kuvunuka antu amu Sodoma kuluta mwemwe.”

Yesu ali upuzo

²⁵ Pa kasita kaka Yesu avwanga ati, “Tata, Mwene wi yulu ni nsi! Nakutaizya pano watusokolola ku antu atasambilila cino wafisa ku antu yamano na asambilile.

²⁶ Endi Tata, cii acino walondanga kuti cicitike.

²⁷ “Tata wampeela vintu vyonsi. Pasi nanti wenga uwamanya Mwana suka sile Tata, nupya pasi nanti wenga uwamanya Tata suka sile Mwana, nga na yao yonsi yano Mwana wasola kuti amusokolole kunoyali.

²⁸ “Izini kunondi, mwensi mwe yatonte nupya anyomelwa, nani namamupeela upuzo.

²⁹ Zwalini ikoli lyane, musambilile kunondi, pano nene wa mutembo, nupya nkaicefya mu mwenzo, nga mumazana upuzo mu myenzo inu.

³⁰ Pano ikoli lyane lino nkazwika ilyangupale, ni cisendo cino nkatwika citanyooma.”