Mateo 10 - Amazwi Yakwe Leza 2013

Atumwa yakwe Yesu ikumi na yaili

¹ Yesu aama alondezi yakwe ikumi na yaili, ayapeela amaka akufumya mipasi yankota nu kupozya indwala zya misango yonsi nga ni ndema.

² Yaa, ali mazina ya atumwa ikumi na yaili: Wakwe conga, Simoni, (wino izina lyakwe a Petulo), na Andeleya mwina wakwe. Yakobo mwana Zebedi na Yoane mwina wakwe.

³ Filipo na Batolomeo. Tomasi na Mateo uwali kasonkisya. Yakobo mwana Alufeo na Tandeo.

⁴ Simoni kalwisya wa untungwa, nga na Yuda Iskalyoti uwakoofile Yesu.

Yesu watuma atumwa yakwe ikumi na yaili

⁵ Lino Yesu watuma atumwa ikumi na yaili ayapeela amalamulo ati, “Mutaya ku Akulukuwa nanti ukwingila mu musumba uli onsi uwa ina Samaliya.

⁶ Lelo mutale muye ku ina Izlaeli, yao ali wa mfwele ziponge.

⁷ Lino mukupita, mwakosola ilandwe lii, muti, ‘Uwene wa mwiyulu wati upalama pipi.’

⁸ Pozyini alwale, tutululini afwe, pozyini yakwe tembwe, mufumye ni mipasi yankota. Mwapelwa amaka yakucita vii uwila, caleka namwe kwene kacitilini antu uwila.

⁹ Mutasenda impiya zya musango wakwe zaabu, siluva nanti zya mukuwa mu vikwama vinu.

¹⁰ Mutasenda mufuko wa kulengelamo vimwi pa lwendo lwinu, nanti cakuzwala na cuze, nanti ndyatu nanti intuwa. Pano muomvi camulinga kupelwa vilondwa vyakwe.

¹¹ “Mu musumba onsi nanti muzi uno mwingilamo, londini umuntu angamupokelela, mwikale mu ng'anda yakwe kufika na lino mulafumamo mu cifulo cico.

¹² Na lino mwingila mu ng'anda ilya mutale muti, ‘Mutende uye namwe.’

¹³ Ine ya ng'anda ndi yamuzengela, mutende winu ulaya panoyali, lelo ndi yakana kumuzengela, mutende winu ulamuwelela.

¹⁴ Umuntu ali wensi wino atalamuzengela, nanti kuvwa mazwi inu, muce mufume mu ng'anda nanti mu musumba uo, nu kukunta ulukungu lwaku ngazo zinu.

¹⁵ Cumi namunena vino pa wanda wa upinguzi Leza alaya na mizu kuli Sodoma na Gomola kuluta musumba uwo.

Alondezi yakwe Yesu yalazunyiwa

¹⁶ “Lolini namutuma wa mfwele pakasi ka mimbulu. Caleka mucenjele wa nzoka lelo mufuke wa nkunda.

¹⁷ Lelo mucenjele na antu, pano yalamutwala ku vilye vya milandu, nupya yalamuma ivikoti mu mang'anda ya mapepo.

¹⁸ Yalamulema nu kumutwala ku ntunguluzi na yakateeka pamulandu wane, kuti muye yakambone yane kunoyali nu ku Akulukuwa.

¹⁹ Lelo lino yalamulema, mutakalanguluke nkolelo pali vino mulavwanga nanti musango uno mulavwangilamo. Lino nsita iliza mulapelwa cino mulavwanga.

²⁰ Pano mazwi yano mulavwanga yatalaya mazwi inu, lelo yalafuma kuli Mupasi Wamuzilo.

²¹ Antu yalakoopa aina yao aonsi kuti yakomwe. Mu musango uli onga na yaisi yalakoopa ana yao. Ana yalakatukila akwasi yao nu kuyakomisya.

²² Onsi yalamupata pamulandu wane. Lelo wino wensi alaposya kufika nu ku mpelelekezyo, wene alatuulwa.

²³ Lelo lino antu amu musumba umwi yamucuzya, utukilini ku musumba uze uli pipi na kuko. Cumi namunena vino mutalamala kuomba milimo mu mizi yamu Izlaeli lino Mwana wa Muntu atali kuti aiize.

²⁴ “Kasambilila ataluta kasambilizya wakwe, nanti muomvi ataluta mwene wakwe.

²⁵ Calinga ukuti kasambilila alingane na kasambilizya wakwe, muomvi nawe alingane nu mwene wakwe. Mwine wa ng'anda ndi akaamwa ukuti a Belezebu, uzye yauze amu ng'anda yalaamwa uli?

Wino tungoopa

²⁶ “Caleka mutaoopa antu. Kusi cimwi icafisama icitalasokololwa paswe, nanti cimwi cino icafiswa icitalaumbulwa.

²⁷ Vintu vino namunena mu mfinzi, mulinzile kuvilanda paswe, na vyonsi vino muvwila mu kapopo, kakosolini mu misolo.

²⁸ Mutaoopa yano akakoma umwili, lelo yatangakoma mupasi. Lelo mwaoopa Leza, wino ali na maka akonona umwili nga nu mupasi kwene mu Gehena.

²⁹ Uzye utunyi twiili tusikalwa pi kowili lyonga? Lelo pasi akunyi konga kangapona pansi ukwaula kuti Leza ali So winu amanye.

³⁰ Nupya inyele zyonsi zyaku mitwe inu nazyo kwene wazipenda zyonsi.

³¹ Caleka mutaoopa, pano mwemwe yamutengo kuluta utunyi utwingi.

Kukaana Yesu pa manso ya antu

³² “Cumi, namunena nati, wino wensi walanda paswe ukuti uwakwane, nani ndamucitila cili conga pa manso yakwe Tata uwa mwiyulu.

³³ Lelo wensi alankana pa manso ya antu, nani ndamukana pa manso yakwe Tata uwa mwiyulu ukuti ntamumanyile.

Yalapusana pamulandu wakwe Yesu

³⁴ “Mutelenganya vino niiza ku kuleta mutende muno nsi. Ntiza leta mutende, lelo niiza leta nkondo.

³⁵ Pano niza pusanya umwana umonsi ni isi. Umwana kaci nanyina, nu mwana kaci na nyinavyala.

³⁶ Amu ng'anda ya muntu yalaya ali anisi yakwe aipisye.

³⁷ Wino wensi uwatemwa isi na nyina kuluta nene wene ataine kuya mulondezi wane. Na wino wensi uwatemwa umwana umonsi nanti kaci kuluta nene, wene ataine kuya mulondezi wane.

³⁸ Na wino wensi asisenda ulupanda lwakwe nu kundondela, wene ataine kuya mulondezi wane.

³⁹ Na wiyo akalonda kutuula umi wakwe, wene alaulovya. Lelo wino uwaponzya umi wakwe pamulandu wane, wene alauzana.

Kupelwa cilambu

⁴⁰ “Wino wensi uwamuzengela, ala wanzengela. Na wino wensi uwanzengela, ala wazengela wino uwantuma.

⁴¹ Wino wensi alazengela kasema pamulandu wakuti akasema, alapeelwa cilambu cakwe kasema. Na wino wensi alazengela umuntu umololoke pano wene akacita ivyawololoke pa manso yakwe Leza, alapeelwa cilambu ca muntu umololoke.

⁴² Na wino wensi alapeela lwako lwa manzi azuke kuli wenga uwamu alondezi yane, pamulandu wakuti wene mulondezi wane, cumi namunena vino Leza atalaposiwa kumulambula.”