Masamu 96 - Amazwi Yakwe Leza 2013

Leza umusambazi mukulu

¹ Imbilini Yawe ulwimbo lupya! Imbilini Yawe, mwe ikazi yamu nsi yonsi!

² Imbilini Yawe, lumbanyini izina lyakwe! Cila wanda landini iviziipe vya ufyusi witu!

³ Mwayalazya umu inamasi umucinzi wakwe, ni vizungusyo vyakwe umu mitundu yonsi.

⁴ Pano Yawe umukulu, nupya uwakulumbanya wakwe cimwi, Wene uwakoopa ukuluta tuleza tonsi.

⁵ Pano tuleza utwa inamasi, utwaunkolanya sile. Lelo Yawe uwapanzile amayulu.

⁶ Ululumbi nu luswepo vyamulilizya, na maka nu kuyemba vyaya mu Ng'anda yakwe.

⁷ Lumbanyini Yawe, mwe antu amu mitundu yonsi, lumbanyini ululumbi na maka yakwe.

⁸ Lumbanyini Yawe Umwene, api zina lyakwe ilya lulumbi. Letini amawila, nga mumutwalile ukwakwe ukwisano.

⁹ Mufukamilini umu musolo wakwe, lino wamuzilo atacili afike. We nsi yonsi uwazakaza sile apa manso yakwe.

¹⁰ Mwalazye umu inamasi muti, “Yawe ali Mwene! Insi yonsi izyansya, itange itelengane foo. Wene alapingwila imitundu yonsi nu ulungi.”

¹¹ Insansa kaziye umwiyulu ni nsi kiya sansamuka! Yemba nawe kalukulunkuma kumwi na vyonsi ivyaya mwenemo!

¹² Insi ki yalukuzevya pamwi ni vizao vyonsi ivyaya mwenemo. Imiti umu mitengo nayo kwene kipunde yonsi nu luzango,

¹³ apa manso yakwe Yawe, pano wene wataiza uku kupingwila insi yonsi. Wene alapingula insi yonsi umu ololoke, nga na antu amitundu yonsi mu cisinka.