Masamu 92 - Amazwi Yakwe Leza 2013

Ulwimbo lwakulumbanya Leza

¹ Cazipa ukukulumbanya wewe we Yawe, nu kukwimbila inyimbo zyakulumbanya izina lyako, We Leza wapapelapela.

² Cazipa ukwalazya katondo tondo uluse lwako nu usiku nalyo ukulumbanya ucumi wako wamuntaputuka,

³ ukukulumbanya umu nsale, nu muviunda vya ngoma.

⁴ Pano ivicitwa vyako ivya lulumbi, nupya pasi pakukuzanzya we Yawe. Apamulandu kwene wa vintu vino wemo ukacita, icaleka nemo namaimbilanga nu luzango.

⁵ Yemwe! Ivintu nu ukulu vino wemo ukacita, we Yawe! Ukwelenganya kwako kwazika wakwe cimwi!

⁶ Icintu cimwi cino iciwelewele caposiwa ukwiluka aeci,

⁷ icakuti antu aipe nanti yangavula uli wi sote, ni ntalanganyi nazyo nanti zingasyuka uli, awe yene yonsi yalalowelela pyu.

⁸ Pano we Yawe, wewe mukulu kuluta vyonsi mpaka umuyayaya.

⁹ Pano anisi yako, we Yawe, yalalowelela, na yakaifya yonsi nayo yalapaswa.

¹⁰ Lelo nemo awewe wankomya, naya sile wa mbo. Wampolelela nu luzango.

¹¹ Nemo natinjilolela kuno anisi yane yakucimba, natinjuvwila kuno intalanganyi zikuililila.

¹² Asuma yene yamalelemanga wa tuncindu, yamaikalanga wa miti italimpisye, imikelide iya ku Lebanoni.

¹³ Kwati imiti ino yalema umu ng'anda yakwe Yawe, ino ikakula ningo mu misolo ya Ng'anda ikulu yakwe Leza witu.

¹⁴ Ino ikaseeka iviseekwa nalino yatikota kwene, nu kuya sile ileleme nupya iyamaka.

¹⁵ Yene ilalanga ukuti Yawe wakwata ulungi. Wene lili cele lyane nupya munoli mutaya ui.