Masamu 91 - Amazwi Yakwe Leza 2013

Leza ali kacingilila witu

¹ Wiyo uwaya ku kuzina kuli Leza wapapelapela, umu mapa ya cisao cakwe Umweneco Wamaka yonsi,

² alanena Yawe ati, “Wewe uli cele lyane, muno nkauwa! Wewe Leza wane wino nataila.”

³ Ale lyene Leza aliwe amakutuulanga uku uzanzo wa anisi yako uno utenekile, alino nu ku vinkunka vyonsi iviipisye.

⁴ Amakuvimbanga na mapa yakwe, nu kuwa amuno umauwanga, ni cisinka cakwe, ni cumi cakwe, acino umasolelanga nu kuicingilila kweneko.

⁵ Usiku, kusi nanti cimwi cino umaopanga, nanti kusi ivyakukupumikizya umukasanya.

⁶ Nanti cimwi icinkunka icingiza usiku nanti uononyi uuli onsi ungiza umusanya.

⁷ Limwi antu izimbi lyonga yangakuwililila, nanti amazimbi ikumi yakulilizye, kusi nanti cimwi icingakukumya kweneko.

⁸ Vyonsi vivyo wemo ulavilolekesya sile, nu kulola kuno antu aipe yakupeziwa.

⁹ Wemo Umwene aliwe akakupususya, a Leza mukulu ali wino wemo ukazina mwenemo.

¹⁰ Fwandi kutangaya nanti cimwi icingakuponela, ni syamo nalyo kwene litange lipalamile kunuli.

¹¹ Pano Leza alapeela ilamulo ku angeli yakwe kuti yakuwake nu kukusunga konsi sile kuno ulaya.

¹² Yalakwanka umu makasa yao, kuti utacinta ulwazo lwako api we.

¹³ Ulalyatola yacisama na yamufi, ulalyatola yacisama akalipisye ni nondo kwene.

¹⁴ Leza akuti, “Nemo namatulanyanga yao antemwa, nu kutaasya yayo amanya.

¹⁵ Lino yene yalandaizya nemo ndayasuka, lino yaponelwa namalanda nemo namayanga nayo. Namayataasyanga nu kuyacindamika.

¹⁶ Nemo namatantalizyanga na manda yao akwikala muno nsi nu kuyapususya.”