Masamu 90 - Amazwi Yakwe Leza 2013

Vya uleza ni vya umuntu

¹ Mwene, wewe uli wikalo witu wakuzinamo, umu nkulo zyonsi.

² Lino imyamba itacili ipangwe ni nsi yonsi itacili iyeko, wemo we Leza akuno wali, nupya ulayelelela.

³ Wemo ukaswilizya umulawa uku lukungu uti nu kuti, “Swilila we, kuno wafumile!”

⁴ Pano imyaka izimbi lyonga, kuli wewe yaya wa wanda onga sile, kwati uwanda wa mutundo uwapisile, kwati insita yonga iya usiku.

⁵ Ukasenda antu wakwe mulamba, yasilengela, yene yakapita sile wa ciloto. Yene yali wa mulemvwe umu katondotondo,

⁶ wakuti iumela akatondo, lelo amanguzi iufoota nu kuuma ali myumile.

⁷ Naswe fwandi ali vino ukali wako ukatucita. Icacumi, icipyu cako cikatoofya wakwe cimwi.

⁸ Inkota zitu zyaya apa lwalala kunuli, na maifyo itu amu umfisolo nayo kwene ukayaleta apaswe.

⁹ Manda itu yano tungikala muno nsi, wemo ukuyacefya pamulandu sile ni cipyu cako. Umi witu ukauluka sile wa mupu.

¹⁰ Imyaka ya umi witu yapelela sile apa myaka amakumi cinimbali. Antu ya maka ayano yakafika uku myaka amakumi cinani. Nga lelo imyaka ya umi witu yonsi pano yapela ikatuletela sile amasakamiko na malanda. Ikapita sile zuwazuwa, naswe kwene ala ali mikukile.

¹¹ Aweni angamanya apangapelela ukali wako, nanti ukumanya apangapelela amaka yako ni cintinya cakusoka kwako?

¹² Acino tusambilizye tumanye uwipi wa manda itu, apakuti tukwate imyenzo yamano.

¹³ Ala, siwatala usuula kweneko, we Yawe! Nga fwandi ukali wako ungapelela pii? Sungala uyelele aomvi yako uluse!

¹⁴ Umu katondo uwatukwatila uluse lwako pee, ulwa muntaputuka apakuti twasansamuka nu kuzanga amanda pe.

¹⁵ Leka amanda itu akuzanga, yalingane na manda yano watuvunwike mwenemo, yavule wa manda yano twapisile umu ntazi.

¹⁶ Leka imilimo yako iloleke ku yaomvi yako, nu lulumbi lwako ulukulu luloleke ku ana yao.

¹⁷ We Mwene Leza witu, sungala uwatupolelela! Tupeele ukucimvya muli vyonsi vino tukacita. Icacumi sileka tuye nu longo muli vyonsi vino tukacita!