Masamu 89 - Amazwi Yakwe Leza 2013

Ulwimbo lwa kwimba umu ntazi

¹ Namaimbilanga ukutemwa kwakwe Yawe pee na pee, ni izwi lyane limapundanga ukutailwa kwako uku nkulo zyonsi.

² Namalandanga ukuti ukutemwa kwako ukwa muntaputuka nu kuti ukwakwikalilila umuyayaya, nu kutailwa kwako kwasimpa sika wi yulu.

³ Wemo wavwanzile uti, “Napangana upangano nu musololwe wane, nalapa uku muomvi wane Davidi inti,

⁴ ‘Ndalasika amu mupanda wako apa cilimba ca wene umuyayaya. Nu wene wako ndaukomya umu nkulo zyonsi.’”

⁵ Amwiyulu yakalumbanya ivizungusyo vyako, we Yawe, yene yakalumbanya na ucumi wako, umu ukongano wakwe yayo amuzilo.

⁶ Uzye aweni umu lwelele wino angakolana nawe we Yawe? Uzye aweni umwiyulu angaya wakwe wewe?

⁷ Leza awino yakaoopa wakwe cimwi mu ukongano wakwe yayo amuzilo. Wene uwakoopa sana ukuluta yonsi amuzinguluka.

⁸ We Yawe Leza Wamaka yonsi, uzye aweni uwaya na maka wakwe wewe, wemuno watailwa muli vyonsi?

⁹ Awewe ukatonsya yemba nga watumbalala, awewe ukamyalalika amaimbi yakwe.

¹⁰ Awewe waputwile Laabu paili wa cala, upasa na anisi yako, uku maka yako sile.

¹¹ Iyulu ilyakwako ni mpanga iyako. Awewe wapanzile Insi yonsi kumwi na vyonsi ivyaya mwenemo.

¹² Wapanzile intunga yaku katutu upanga ni yaku kayeya. Mwamba wa Tabo nu wa Helimoni vikakuumilila utupundu ni nsansa.

¹³ Wewe wakwata amaka yonsi. Ikasa lyako lyakoma wakwe cimwi, ikasa lyako ililunji lyatumpuka.

¹⁴ Uololoke nu ulungi wako ali mufula wa wene wako. Ukalanga ukutemwa nu ufumacumi wako muli vyonsi vino ukacita.

¹⁵ Alongo antu yano wasambilizya uku kuumilila utupundu yayo akaapita umu lukundo lwako, we Yawe.

¹⁶ Yene yakakuzangila umusanya onsi, yakalumbanya uololoke wako.

¹⁷ Pano yene yasintilila mu lulumbi na maka yako. Mu luse lwako ukatupela ucimvyo.

¹⁸ Cumi kwene awewe kwene watusolwela kacingilila witu, awewe watupeela umwene, we Wamuzilo wa ina Izlaeli.

Ulayo wakwe Leza kuli Davidi

¹⁹ Mpiti wavwanzile umu cilolwa ku antu yako acumi, uti, “Nemo natinzwika umuntu umuzwangane icilongwe. Natincindamika wenga wino nemo natinsolola apa antu.

²⁰ Ninzana umuomvi wane Davidi, wino nasolola apa kumupongolwela amafuta yamuzilo.

²¹ Amaka yane yamamusunganga pee na pee ulamba wane umamukomyanga umuyayaya.

²² Anisi yakwe yatalalola apa kumucenjezezya nanti aipe yatalamucimvya foo.

²³ Nene ndasyunola anisi yakwe apa manso yakwe, nu kukoma yonsi yano yakamulwisya.

²⁴ Nemo namamutemwanga nu kuya uwacumi kunoli nupya ndaleka kuti acimvya.

²⁵ Nemo ndalundulula uwene wakwe ukutandikila kuli yemba wa Mediteleniani mpaka ukafike nu ku luzi lwa Yufulate.

²⁶ Amangamanga ati, ‘Wewe uli Tata, nupya wewe uli Leza wane, Ciliwe icikantuula.’

²⁷ Wene ali yeli lyane, umukulu pali yamwene yonsi apano nsi.

²⁸ Nani namamukwatilanga uluse lyonsi, nu upangano wane na aliwe umayelelelanga pee.

²⁹ Ana yakwe ali yano yamatwalililanga ukuya apa wene pee, nu wene wao ulayelelela pee na ndi, wi yulu.

³⁰ Lelo ndi cakuti ana yakwe yaca yafutatila amasunde yane, nu kukana ukulondela amalamulo yane,

³¹ ndi yaca yasuula amalamulo yane, yata nu kuwaka amasambilizyo yane,

³² lyene nemo ale ndayapolola ni ntuwa apamulandu nu uyi wao. Ndayanyambola ni mikota pa kuluvyanya kwao.

³³ Lelo Davidi wene ntalata ukumutemwa, nanti ukuposiwa ukufikilizya ulayo wane kunoli.

³⁴ Nemo ntalatala nonone upangano wane nawe, nanti ukusenuka muli vino ndavwanga.

³⁵ Nemo nala nalaya umwi zina lyane lyamuzilo, ntalatumpoka Davidi foo.

³⁶ Navwanga ukuti wene alakwata amu mupanda mpaka umuyayaya, ni cilimba cakwe ica wene cilayelelela pee, ndi vino ilanzi likalilila pee apa manso yane.

³⁷ Uwene wakwe ulaya uwakuyelelela umuyayaya wa mwezi, kambone wane uwacumi umwiyulu.”

Impooma yakulila umwene umucimbe

³⁸ Lelo we Leza wasokela umwene umusololwe wako, wamutazyela nu kumufutatila.

³⁹ Wakana apaswe upangano uno wapangine nu muonvi wako, watusumba ni cilongwe cakwe ica wene umu lukungu.

⁴⁰ Watuwisya amalinga yonsi amusumba wakwe. Watuongolola ni misumba yakwe ya malinga.

⁴¹ Yonsi yano yakupita mwenemo, lyene yakusampa ivyuma vya mwenemo. Yano yapalamana nayo lyene yakuyaseka.

⁴² Watukomelezya yayo akayalwisya nu kusansamusya anisi yao.

⁴³ Watutunya amalupanga yao, nu kuta ukuyazwa umu nkondo.

⁴⁴ Watumupoka insonzo yakwe iya wene, nu kupenula icilimba cakwe ica wene.

⁴⁵ Watuleka ukuti Umwene akote zuwa nu kuti lyene azewane wakwe cimwi,

Ipepo lyakulenga ukukululwa

⁴⁶ Uzye ukufika lilaci, we Yawe? Uzye ulamfisama mpaka umuyayaya? Uzye ukali wako umalunkuma wa moto ukufika lilaci?

⁴⁷ We Mwene ala iusya ukuti umi wa muntu utatantalilila foo! Iusya ukuti antu yonsi yano wemo waumba aina kufwa!

⁴⁸ Nga aweni fwandi alayelelela ukwaula ukufwa? Uzye aweni angaituula uku maka ya mfwa?

⁴⁹ We Yawe, uzye visininkizizyo vya kutemwa kwako lyene vili kwi? Vivyo vino walavile Davidi ukuti ulaya uwakutailwa?

⁵⁰ Iusya intusi zino yantukolanga ne muonvi wako, we Mwene, navino nani nkazizimizya, uku misuula ya ikala nsi yonsi.

⁵¹ We Yawe ala lola vino anisi yako yakunsoweka nene nemuno wasolola ukuya kateeka. Konsi sile kuno nati kampitile awe pasi pakunsuula.

⁵² Endi, katule twalukulumbanya Yawe pee. Ciye vivyo kwene! Ciye vivyo kwene!