Masamu 83 - Amazwi Yakwe Leza 2013

Ipepo lyakuti Leza acimvye anisi ya ina Izlaeli

¹ We Leza, ala utamyalala cele, utakutumala sile, we Leza utikala sika foo!

² Lola anisi yako vino yati yazwangana, yao akusoka vino yati yatongomalika insingo.

³ Yene yakupanga umu umfisolo ivyakucitila antu yako. Yatiyumana akapi apa kupingila antu yano wemo.

⁴ Yene yakuvwanga yati, “Katwapita tuye tukalovye umutundu wao onsi, apakuti izina lya ina Izlaeli likililikwe.”

⁵ Yatiyapangana nupya yatiyuvwana ukwiza uku kulwisya.

⁶ Aina Edomu na ina Isumeli, aina Moabu na ina Hagili,

⁷ aina Gebali, aina Amoni na ina Amaleke, aina Filisti kumwi na ina Tuli.

⁸ Aina Asilya nayo kwene yatiyaitela mwenemo, wa antu ya vimaka kuti yazwilizye amu mupanda wakwe Loti.

⁹ Ule ucite kunoyali vino wacisile ku ina Midyani, kuli Sisela pamwi na Yabini uku luzi lwa Kisyoni.

¹⁰ Wayacimvisye uku Endoli, ni vyala vyao apano vyatikite wakwe citindi.

¹¹ Yamusika yao uyacite ndi vino wacisile Olebu na Zeebu, ucimvye na yakateeka yao ndivino wacimvizye Zeeba na Zalemuna,

¹² yano yayuvwanga ala yakuti, “Impanga yakwe Leza tumaipoka iye iyakwitu.”

¹³ Iye mwe Leza wane, si yasalanganye wa mapelele akasendwa na nkungulupya.

¹⁴ Ndi vino umoto ukaoca umutengo, wa lupya ulukaoca imyamba,

¹⁵ ali vino nawe uyazingile ukutali kuli nkungulupya wako nu kuyatinya ukucipunga cako ica cimuza.

¹⁶ Uleke insonyi ziyaleme apa manso yao, suka sile yalonde izina lyako, we Yawe Leza.

¹⁷ Sileka yaye acimviwe ni ntete wakwe cimwi lyonsi, nu muzewanya pe nga ni mfwa apapela.

¹⁸ Yangala yamanye nu kuti awewe sile wenga ukaamwa Yawe, nupya wenga mpo, wewe uli Leza Wapapelapela umu nsi yonsi!