Masamu 80 - Amazwi Yakwe Leza 2013

Ipepo lya kulenga Leza ukuswilizya antu ukumwao

¹ Uvwa kuno wemuno ukacema aina Izlaeli, we muno ukatungulula antu yako wa ufyo wa mfwele. Wemuno wikala apapela yakwe ya kelubi.

² Ndu isokolole uku luko lwakwe Efulemu, lwakwe Benjamini nga nu lwakwe Manase! Langizya amaka yako, ndu tutulanye!

³ Sungatuswilizya we Leza! Tulole luse luse pakuti tupusuke!

⁴ We Yawe Leza Wamaka yonsi, uzye kwene icipyu ica kukana nu kuvwa uku mapepo ya antu yako cilapelela?

⁵ Lyene ucuzi ali cakulya cino watupeela kuti twalya, nga nu lwako umuziile aminsozi, ali luno watupeela kuti twamwa mwenemo.

⁶ Watuleka na antu ya mitundu ino twapalamana nayo yatiyatandika nu kulemanila apa mpanga itu. Na anisi itu nayo yakutuseka.

⁷ Ungala utuswilizye mwenemo, we Leza wa maka yonsi! Ungatulolekesya luse luse apakuti tupusuke!

⁸ Awewe walemwile umutingi umu Eguputo wiza wazinga imitundu umu mpanga yao, amuno wiza waulema.

⁹ Umauselelela umu mbali apakuti wakula ningo. Imisisi yakweo yasuka yaya pansi ningo sana. Nao ali pakuvunda, walimba impanga yonsi.

¹⁰ Icisao cakweo cimavimba na pa myamba, ni misambo yakweo imavimbilikizya na pa miti itali sana, imikelide.

¹¹ Icacumi, imisambo yakweo yalimba konsi ukufika na kuli yemba wa Mediteleniani, suka nu ku luzi Yufulate.

¹² Icani fwandi cino wawisizya icimpinda ca mitingi? Utaweni! Lyene yonsi apita nzila yakwiya iviseekwa.

¹³ Na yakapoli yakuupwazola, ni nyama zya mpanga nazyo zikulya kweneko.

¹⁴ Seleukila kunotuli, we Leza Wamaka yonsi! Kuko kuno waya ukwiyulu, sungamila pano nsi pano tuli. Ndu pususye umutingi wako!

¹⁵ Iza sile ndu pususye umutingi uno we mweneco walemile. Akateeta ka mutingi uno wasya aka maka wakwe cimwi!

¹⁶ Anisi itu yatiyaoca uku moto, nu kuuwisya. Yalolekesye fwandi cipyu cipyu uleke yalowe!

¹⁷ Uwacingilila nu kuwakilila wiyo wino we mweneco wasolola. Wino wemwisikulu wakuzya, apakuti akuombela!

¹⁸ Swemo tutalatala tukusangukile foo nupya. Utupususye, utupuputule nga naswe tumakulumbanyanga.

¹⁹ Sungatuswilizya mwenemo, we Yawe Leza Wamaka yonsi! Tulolekesye luse luse apakuti tupusuke!