Masamu 79 - Amazwi Yakwe Leza 2013

Ipepo lya kukulula antu

¹ Iye mwe Leza! Ainamasi yawililila impanga ya antu yako! Yatiyakowezya ni ng'anda yako iya muzilo, yatiyaongolola nu musumba wa Yelusalemu.

² Ivyala vya antu yako vyativipelwa uku vyunyi kuti vilye. Ivyala vya antu yako avino vyapeelwa uku nyama zya mpanga kuti zilye.

³ Uwazi wa antu yako yati yaupongolola wa manzi. Uwazi uku konkoloka umu Yelusalemu wakwe mulamba. Kutasile nanti wenga uwakuzika ivyala vya yauze.

⁴ Antu ya mitundu yano twapalamana nayo pasi pakutusoweka. Yene yakutuseka nu kutuwela penepo.

⁵ We Yawe, uzye ukutusokela kwene kuu, kulasila lilaci? Si namanye ukwa muyayaya? Uzye cumi avino umalunkumanga wa moto vivyo kwene uku ukali?

⁶ Sungala usokele antu ya mitundu yuze, yayo asikupepa, na yano yakana uku kuyela,

⁷ na yano yakafyekola antu itu, nu konona impanga itu.

⁸ Utatuvunuka apa uyi uno vikolwe vitu vyacisile. Ale swemo, utuyelele sile uluse, pano swemo amano yati yatupela.

⁹ Ndu tutuule, we Leza katuula witu, pano wemo wewe mucindami. Ali cino fwandi ndanga utwazwilizye, ukumbule na maifyo itu, alino antu yamakulumbanya.

¹⁰ Kuno icani cino ainamasi yangatuzizya iyati, “Uzye Leza winu alikwi?” Fwandi leka tulole kuno ukupezya ainamasi, pali ucikoma uno yakomozile antu.

¹¹ Uvwa vino antu umu uzya yakukuuta! Uku maka yako, si ule utuule antu yano wapingwila ukufwa.

¹² We Mwene, ala apa misuula yonsi ino ainamasi yakusuula, wemo uyawezezye amaila cinimbali.

¹³ Lyene ale naswe swe antu yako, swe mfwele zyako, tumakuwanzyanya pee, nu kukulumbanya imyaka yonsi ilalondelelapo.