Masamu 78 - Amazwi Yakwe Leza 2013

Leza na antu yakwe

¹ Mwe antu yane uvwini amasunde yane, teyini amatwi kuli vino namamunena.

² Nemo namamunena kuno ivyampiti vyalola, nu kumulondolwela intazi ino vyakwata,

³ apamulandu ni vintu vino sweyeneco twailolile na vino twayuvwilile, nga navino ivikolwe vitu vyatulandile kweneko.

⁴ Tutafisanga ana itu foo, tumanenanga kweneko na yano yamatulondelelapo, apamulandu na maka yakwe Leza, na pa vicitwa vyamaka, nga na pa vintu ivyakuzunguka vino wacita.

⁵ Ali wino wapiile aina Izlaeli amasunde, na yamwana Yakobo ivikomo. Ali wino wakonkomizye ivikolwe vitu ukusambilizya ana yao amasunde yakwe,

⁶ apakuti yano yamatulondelelanga penepo nayo yavimanye nga nayo yasambilizya ana yao,

⁷ pakuti yataila Leza, yatailila navino wacita, yace yatontela namasunde yakwe pee.

⁸ Yataca yakaye ivyali ivikolwe vyao, ivyasangukilanga Leza nu kumutalamila. Vyene vyatailanga Leza, citaile taile, ukwaula ukwika amano uku kumutontelela.

⁹ Aina Efulemu, alwanga uku kuomvya amalapwa ni nceto, yapuusile uwanda wa lwete.

¹⁰ Yatasunzile ningo upangano uno yapangine na Leza, yakanyile nu kulondela amasunde yakwe.

¹¹ Yilile na vyonsi vino wacisile, ni vizungusyo vino wayalanzile.

¹² Leza wacisile ivizungusyo apa manso ya vikolwe vyao, umu citungu caku Zoani, ica mpanga yaku Eguputo.

¹³ Wankinye yemba apakasi, apano ayapisya, aimika amanzi ungati ulung'umba.

¹⁴ Umu nsita ya kasanya, wayatungulwilanga ukwi kumbi, nu mu nsita ya usiku namo wayatungulwilanga umu cimbilimbili ca moto.

¹⁵ Walepwile amawe umu lwanga, apakuyatonsya uku myenzo na manzi aingi ungati amwi tenga.

¹⁶ Walesile akaluzi kakonkoloka ukufuma umwiwe, icakuti amanzi iyapita wa luzi.

¹⁷ Lelo yene yalondekinye ukwifya kuli Leza, nu kusangukila Leza Mukulu umu lwanga.

¹⁸ Yezyanga Leza umwene uku mufulo sile, apa kumulenga icakulya cino yakulonda.

¹⁹ Yainong'onyanga kuli Leza ala yakuti, “Uzye Leza angatupeela icakulya muno mu lwanga?

²⁰ Ukuya kwene wene uumile apa ciliwe, imufuma akaluzi. Uzye kwene ni cakulya naco angatupeela, atupeele ni cifwa, swe antu yakwe?”

²¹ Fwandi ali vino Leza nawe wasosile, apakuvwa imvwango zizyo, aletela nantu icimbilimbili camoto, alunkuma sile uku cipyu, icakusokela aina Izlaeli.

²² Pano yene yatazumilanga Leza, yatatailanga nu kuti Leza wakwata amaka akuyapususya.

²³ Leza nawe ali cino wanenyile iyulu ukuti liyule ivisasa,

²⁴ nu kufumfumula mana uwakuti yalye, ali usu wa kwiyulu.

²⁵ Fwandi antu nayo ali pakulya icakulya ca angeli. Leza wayapeela ivyakulya nyanya yamaikuta nu kwikuta

²⁶ Alino akatusya nu muza waku ufumondaka, nao umapunga, uku maka yakwe, waleta nu muza uwaku katutu.

²⁷ Nga nawo kwene waleta ivyunyi nyanya, kwati ulukungu ukukuvula. Navyo vyavulisya wa musensenga uwamu nkumba yakwe yemba.

²⁸ Viiza vyalimba mpanga yonsi umu nsakwe, ukuzinguluka insakwe zyao.

²⁹ Antu yao pasi pakulya yatemwa wakwe cimwi. Eee, Leza wayapiile vyonsi vino yalondanga.

³⁰ Nga lelo lino yatali yasazye umusu, apa nsita kwene ino yalyanga, lino yatali yamiile nu kumila cakulya cao,

³¹ Leza icipyu icimulema, ali pakukoma antu yavimaka, alumendo umu ina Izlaeli!

³² Nanti Leza wayacitilanga ivizungusyo vyonsi vivyo awe cumi, yene yatamuzumilanga foo. Yatwalilile sile ukwifya.

³³ Nawe fwandi ali pakufomolola umi wao wa mupu ni myaka yao ali pakuisinsola, uku mazyamo.

³⁴ Lino wakomilepo yamwi asile penepo, yamwi ali pakuwelulukila kunoli, iyazenzuka nu kuzenzuka nupya iyamupepa wakwe cimwi.

³⁵ Nga alino lyene iyaiusya ukuti fwandi a Leza awino yali nu kuzina kunoli, nu kuti fwandi, Leza Mukulu ali katuula wao.

³⁶ Lelo kwene amazwi yao yali aufi sile, ni mivwangile yao yali iya ndimi ziili.

³⁷ Yatamutontelanga foo, nanti ukusunga upangano uno yapangine nayo.

³⁸ Nga lelo Leza wene wayayelelanga uluse. Wene wafutanga uyi wao nga atayalovizye foo. Amaila sile aingi, wasokolokanga nu kuwezya umwenzo.

³⁹ Wiiusyanga ukuti, yaa antu sile, yaya wa muza ukapungana ni mipitile ala ali mpitile.

⁴⁰ Pasi pa maila nu wingi lino yasangukilanga Leza umu lwanga nupya pasi pa maila nu wingi, lino yamusakamikanga!

⁴¹ Lili lili yamusonsombanga nu kuleka Wamuzilo wa ina Izlaeli asoke.

⁴² Antu yilile amaka yakwe ataikulila, iyilila kumwi ni nsita ya ukuluzi wao uku anisi yao nu kuvinjelengwe vyacizungusyo

⁴³ vino wacisile umu Eguputo uku citungu caku Zoani.

⁴⁴ Amanzi umu nguzi wayasangwile uwazi utuputupu apakuti aina Eguputo yatamwa amanzi umu nguzi zyao.

⁴⁵ Wayatumile nu tuzyembele apakuti tuyalumole nga na yacula kwene apakuti yonone ivyalo vyao.

⁴⁶ Wayatumile ivikwe ivyakuyalila ivyakulya na makanta uwononyile ivyalo vyao

⁴⁷ Aonona imitingi yao uku mvula yamawe, nga ni miti yamasamvu nayo ipya kuli cuma.

⁴⁸ Akomola ni viteekwa vyao uku mpungo na maufyo yaviteekwa iyafwa uku nkuwa.

⁴⁹ Ayafulumila sile ukali ukali alunkuma sile wa moto uku cipyu. Ayasokela wakwe cimwi ayaletela nu ucuzi. Ica cumi vyali ali angeli yakwe akuyalovya.

⁵⁰ Atawezizye umwenzo nanti ukuyatezela foo, asuka ayalovya uku mpungo.

⁵¹ Akomela kumwi na ana yao amaeli aonsi, yonsi umu nko zyonsi zyamu Eguputo. Ukuli kuti ana yano yavyalilwe umu nsakwe zyakwe Hamu, lino yacili sile na maka ya ulumendo.

⁵² Nga alino Leza wafumizye antu yakwe wakwe kacema nga ayatungulula nu kuyapisya ulumi umu lwanga.

⁵³ Ayasenda sile ningo ningo, nayo ukwaula ukuvwa intete foo. Lelo yemba wene atuwizya anisi yao.

⁵⁴ Asuka ayafisya mu mpanga yakwe yamuzilo, impanga ya nsansa ino umweneco wacimvizye.

⁵⁵ Azinga aikalangamo, lino antu yakwe yakuya mwenemo, nga aankanya ni nko zya ina Izlaeli impanga nu kuleka ukuti amuno yaikala.

⁵⁶ Nga nalyo kwene yasangukile Leza Mukulu yamamusonsomba sile. Iyakana nu kutontela amasunde yakwe.

⁵⁷ Yamusangukila, yata nu kumutontela, vivya kwene ndi vino ivikolwe vyao vyacitanga. Iyaya sile cuze cuze, yatalama wa ulapwa uvyongane.

⁵⁸ Yamusonsombanga umu vifulo vyao ivyapapela ivyaku pepelapo, yamufisya nu ku mwenzo uku tuluwi twao.

⁵⁹ Leza pasi pakusoka apakulola ivyamusango uo, nu kuyasuula nawe ayasuula.

⁶⁰ Ali pakusya ni cifulo cakwe ica ku Syilo, papo pano wikalanga ala ali apakasi ka antu.

⁶¹ Waleka na anisi yiza yazanza amaka yakwe, imbokosi ya upangano, yaisenda nu mu uzya.

⁶² Ali pakusokela antu yakwe wakwe cimwi, waleka na anisi yao yiza yayakomola.

⁶³ Alumendo yao nayo umoto wiza wayoca. Kutasile uwakuti angatwala yakaci yao.

⁶⁴ Yasimapepo yao nayo kwene yakomolwa uku lupanga. Yamama yao, yamukamfwilwa yaposiwa nu kuyalosya.

⁶⁵ Nga alino Yawe wazyuka umutulo, kwati umusambazi wino wasantamuka umu tulo, uwala kolike waini.

⁶⁶ Wazinganya anisi yao yaswilila mwenemo. Ali pakucimba vivyo kwene, ni nsonyi zyayalema.

⁶⁷ Wasuula ana yakwe Yosefu, wakana ukusolola amu luko lwakwe Efulemu

⁶⁸ Aluko lwakwe Yuda ayano wene wasolola, nga nu mwamba Zioni ali uno watemilwe wakwe cimwi.

⁶⁹ Ali pano waya wakuula ni ng'anda yakwe. Nayo waicita kwati sile ali yulu kwene ukukutalimpa. Waikuula ikoma ndi wa musili, apakuti iyelelele pee.

⁷⁰ Nga alino wasolola Davidi umuomvi wakwe, wamufumya uku mulimo wakwe uwakucema imfwele,

⁷¹ nu kuwaka utwana twa mfwele. Wamucita umwene wa ina Izlaeli, ali pakuya kacema wa antu yakwe Leza.

⁷² Davidi nawe, avino wasumvile amano yakwe uku kusunga antu, nupya nu kuyatungulula usaka sana.