Masamu 76 - Amazwi Yakwe Leza 2013

Leza ali kacimvya wa anisi

¹ Leza wamanyika wakwe cimwi umu mpanga yakwe Yuda. Izina lyakwe ilikulu umu mpanga ya ina Izlaeli.

² Itaalu lyakwe walisimpa mu Yelusalemu, Wikalo wakwe uli kuko kwene ku Zioni.

³ Kuku kwene akuno wakontozile inceto zya anisi yakwe, ivisyangu nga na malupanga, ni vyanzo vyuze ivyasyala.

⁴ Iye Mwene vino wemo ukusokolola ucindami wako ukulu, nu usambazi wako, apakufuma ku mwamba ku kucimvya anisi yako!

⁵ Ivita ivizwangane, yavipokolwile ivyuma vyao, ali pakulalilila utulo twa mfwa, nupya patasyala nanti wenga uwa mbezu, uwakuti aomvya ivyanzo vyao.

⁶ Walanga sile lino wayoofya, we Leza wakwe Yakobo, awe mukwai imfwalasi zyao kumwi nayano yakwezilepo iyafwa.

⁷ Wemo, ala antu pasi pakoopa wewe, yakakoopa wakwe cimwi! Aweni fwandi angazyansya kunuli ndi cakuti wakalipa?

⁸ Lino imipingwile yako yuvwikike ukufuma ukwiyulu, impanga yazakize, yazuka na cele,

⁹ lilyo lino we Leza wimilile uku kupingula antu, kuti upususye yayo yonsi akazunyiwa pano nsi.

¹⁰ Cumi kwene, ukali wako apa antu ukalenga kuti yakulumbanye, Yao akapusuka uku zya nkondo yalatwalilila ukwiusya amanda akulu akwako.

¹¹ Mwatuula Yawe vino mukamulaya, mwamuletela ivya mawila mwemwe mwensi, mwe mitundu iyapalamila. Leza akalenga antu ukuti yamoopa.

¹² Pano wene akatembola intunguluzi zya vilumba, nupya yamwene nayo yakamoopa.