Masamu 74 - Amazwi Yakwe Leza 2013

Ipepo lya kulengela impanga ukuluzi

¹ We Leza, icani cino watutazyelela vii? Uzye kwene antu yako we mweneco, ali yano ungakwatila icipyu vii, lyonsi?

² Si iusya antu yako yano we mweneco waisololwile mpiti, yene ali antu yano wakulwile apakuti yaye umutundu wako. Iusya nu Mwamba wa Zioni, uno wikalanga mwenemo!

³ Ndutante apa vitotela, ala mwine anisi itu yatiyonona ivintu vyonsi umwi sano lyako!

⁴ Anisi yako yakucina nu kutampoka ni nsansa zya kucimvya umwi Taalu lyako. Yati yasimpa ni mendela yao wacilangililo ca kucimvya kwao.

⁵ Yakuloleka sile wa antu akutema imiti mu mpanga uku mpasa zyao.

⁶ Yakonona imbao izya kuviumba uku mpasa nga nu ku zya nondo.

⁷ Ng'anda yako ikulu yati yayoca uku moto. Yatiyakowezya incende ino tukakuwanzizyamo.

⁸ Yatiyapanga nu kutulovya swensi pyu pyu pyu, nu koca incende zyonsi izyamuzilo umu mpanga.

⁹ Intambi zitu zyonsi izyamuzilo zyatizisila. Yakasema kusi nanti wenga asile, alino kusi nanti wenga angamanya kuno icintu cii cilapelela.

¹⁰ Leza we, uzye alilaci fwandi lino anisi itu yalata ukutusausya? Uzye yamatutukolanga lyonsi pee?

¹¹ Icani fwandi cino ukukanila ukutupokolola? Wanyongela ni nsingo kuze!

¹² Lelo wemo, we Leza, wewe uli Mwene wane. Ukutandikila sile uku mpiti, wewe ukaombesya apa kutupususya apa mpanga ya pano pansi.

¹³ Uku maka yako sile akuno walepwilile yemba paili, nu kusyunola imitwe ya vilyanyi vyamuli yemba.

¹⁴ Awewe kwene wasyunozile ni mitwe ya cilyanyi, ci Leviatani nu kupeela ivinyama vyamu lwanga kuti vicilye.

¹⁵ Awewe watulwile tufukoka nu tunguzi kuti vyakonkoloka. Awewe wumike ni nguzi izikalamba izisitala zipwa.

¹⁶ Awewe walenga kuti kwaya umusanya nu usiku, wewe wika ilanzi nu mwezi mu ncende zino vyayela mwenemo.

¹⁷ Awewe wika yanande yonsi pano nsi, ukaleta icisanya ni cisiku.

¹⁸ Waiusya, we Yawe, ukuti anisi yako yakukuseka, nga ni viwelewele vikukusausya.

¹⁹ Utatazyela antu yako, ati yapelelwa utayasumbila uku anisi yao alukang'ansi. Waiusya yao yano yakucululuka!

²⁰ Sungala uwiusye upangano wako, uno wapangine naswe. Pano konsikonsi muno nsi muli ivyongo!

²¹ Utaleka yano yakufyengelekeziwa yazewane. Leka sile ukuti apina na yayo aulilwa yakulumbanya.

²² Katuka we Leza, uipokolole we mweneco! Wiusye nu kuti iviwelewele vikakusausya umusanya onsi.

²³ Iusya vino anisi yakuwawata, vino icongo cakwe yayo akakukatusizya impanzela cikukulilako lyonsi sile.