Masamu 72 - Amazwi Yakwe Leza 2013

Ipepo lyakupepela Umwene

¹ We Leza, ungapela umwene witu amano akupingula wakwe wewe. Umwana wa mwene wi, leka akwata amano ya usuma wako.

² Leka alungika lino akuteeka antu yako, nu kuvwangila alanda.

³ Imyamba ni milundu vingaleka ukuti antu yako yaikala umutende ni syuko nu usuma penepo.

⁴ Ungaleka kuti acita ulungi apakupingwila alanda avwa kweneko na apina nu kucimvya yayo akayacuzya!

⁵ Antu yako yangakupepa ndi muno wacela, ndi vino umwezi ukapeela uluswepo, umu nkulo zyonsi iziliza.

⁶ Leka umwene acita ndi vino imvula ikacita umu vyalo. Umwene umutupu angaya wakwe tuswelele utukusansa apa mpanga.

⁷ Leka usuma uvulisye apa nsita ino Mwene ali pano nsi, ni syuko lya antu likayeko insita yonsi, ukufika na pano umwezi ulata ukuya penepo.

⁸ Uwene wakwe wandatile ukufuma kuli yemba wenga ukusinta nu kumuze. Ukufuma ukuluzi Yufulate ukusinta nu kwapelela insi.

⁹ Antu aikala umu lwanga yafukankila kunoli, anisi yakwe nayo yakunkuluka umu lukungu.

¹⁰ Yamwene aku Tasyisyi, na yaya aikala lwa mu vilila yalukuleta amawila kunoli. Yamwene aku Syeba na aku Seba nayo yalukuleta ivya mawila kunoli.

¹¹ Yamwene yonsi sile yalukufukankila kunoli, na antu yonsi amu mitundu yalukumuombela!

¹² Ali wino amapokololanga antu aulilwa akupunda iyati, “Tutuulwe!” Ukwika penepo na alanda, atakwata akuyasunga.

¹³ Imbulwa maka, na yayo atakwata akuyavwangila, aliwe amayakwatilanga uluse. Apususya na antu akulonda ukupusuka.

¹⁴ Amayapokololanga kuli yayo akuyacuzya nu kumpanzela, pano imipasi yao, nayo kwene yaya icindame kunoli.

¹⁵ Umwene wa pano nsi kalukupita ulumi! Kaatuulwa zaabu uwaku Alabya, kayalu kumupeela insita zyonsi, na Leza kalu kumupolelela pee!

¹⁶ Kamwalukuvula ivyakulya umu mpanga yakwe ni viseekwa vile vivule nu mu myamba kwene. Vyalukuseeka ungati ivyamu Lebanoni. Umu misumba namo antu kayavule, yazuule wisote lya mpanga.

¹⁷ Antu yangala yateezya yamwilila, nu lulumbi lwakwe lwalu kuyelelela wi lanzi. Antu ya mitundu nayo kayalumba umwene wa mpanga yao, yapapata na Leza ukuti ayapolelele, ndi vino wapolelile umwene wa mpanga yao.

¹⁸ Mwalumbanya Yawe, Leza wakwe Izlaeli, kacita wa vintu vyonsi vii ivyakuzunguka wenga sile!

¹⁹ Mwamulumbanya pee pano wacindamisya nu ucindami wakwe, kawalukulimba impanga yonsi! Endita kaciye vivyo kwene! Endita kaciye vivyo kwene!

²⁰ Paa, apapelela amalumbo yakwe Davidi mwana Yese.