Masamu 7 - Amazwi Yakwe Leza 2013

Ipepo lyakulenga ulungi

¹ Yawe Mwene Leza wane, nazina kunuli. Ntuule kuli yonsi yano yanzunya, umpususye,

² pano limwi yangiza yantakoole wakwe cisama, nu kundepola ukwaula nu wakuti antuule kweneko.

³ We Yawe Leza wane, ndi cakuti natazile ncita cii, cakufyenga umuntu umumi,

⁴ ukuletelela cuza wane, nanti ukulandula kuli umwi uwamfyenzile,

⁵ lyene nkuti kayanzinganye yandeme, yamfwante nu kundyatola pansi yankome, yavumvunye na mala yane umu masenga.

⁶ Katuka, we Yawe, ni cipyu cako. Nkuti katuka we Leza wane! Lwisya ukali wa anisi yane, pano wemo ulungi auno ukalonda kuti yacite.

⁷ Leka imitundu yonsi iya antu ikongane panuli, ikulizizye, nga nawe wikale apapela uwayateeka.

⁸ We Yawe, awewe ukaputwila antu yonsi imilandu. Lyene umvwangile nani, we Yawe, pano nene wakaele nu wa miyele isuma, we Leza wapapelapela.

⁹ Mala ivicitwa vya ukakasi vya antu aipe. Lelo antu akacita ivisuma uyalambule. Pano wewe Leza wino akapima amelenganyo ni myenzo kwene. Antu ukayaputwila imilandu ukulingana navino yakalonda, nga na vino yakaelenganya.

¹⁰ Leza ali kavwangila wane, akapususya yao akamutontelela.

¹¹ Leza wene akapingula umololoke, wene akapeela nu mulandu kuli yakaluvyanya.

¹² Ndi yakana ukuzenzuka, Leza akanyola ulupanga lwakwe, akaakana ulapwa wakwe, nu kuzuta ulusinga.

¹³ Angateyanya ivyanzo vyakwe ivyakuyalovezya. Anganyepelela ni vyakwasizya umoto uku nceto.

¹⁴ Umuntu mwipe wene akaelenganya sile iviipe. Akapanga ukuleta ivyongo nu kwikalila sile ukutumpoka.

¹⁵ Akayimbila sile umweneco iviwina vitali, umwakuti aponela wenga kwene.

¹⁶ Ali cino fwandi uyi wakwe umweneco ali uno ukamulya. Ukuzekemwa kwakwe, ali kuno kukamuletelela.

¹⁷ Endi nemo namalumbanyanga Yawe pamulandu wa ulungi wakwe. Namaimbililanga Yawe Wapapelapela, inyimbo zyakumulumbanya.