Masamu 69 - Amazwi Yakwe Leza 2013

Ipepo lyakukuta tutuulwe

¹ We Leza ala ntuule! Nati namwela, amanzi yati yafika umu nsingo.

² Natinatuwila umu lutikiti uluzike wakwe cimwi. Pasi nanti pamwi apakulyata apa komile. Indi api ziya umucumi. Amayimbi nayo yali umupipi nu kwiza ntuwizya.

³ Natintonta wakwe cimwi muno nkulaizya inti, “Ntuulwe!” Uku nsingo nako kwatikuuma. Amanso nayo yati yasuka iyatumbuka muno nkukulolekesya kuti wize untuule.

⁴ Antu akantandika uku mpata, yati yaya anyanya. Yavulisya nu kuluta inyele zyakumutwe. Yakasomba yaufi, akansombezye ukwaula umulandu uno nacita, yakalonda sile umwakuti mfwile. Nkapatikiziwa ukulipa vino ntiya.

⁵ We Leza, ala uwelewele wane, waumanya wewe, nu uyi wane nawo kwene waumanya!

⁶ Utezya uleke naezya ukuzewanya antu akutaila we mwene. Iye mwe, Yawe Wamaka yonsi! Utaleka nene naletela antu akupata insonyi, we Leza wakwe Izlaeli?

⁷ Ala nemo, apali wewe, apano yansuulila, ni nsonyi zyandema.

⁸ Nemo uku inane lyene naya sile wa mwenyi. Naya wa mwinamasi ku ana yakwe mayo.

⁹ Pano umuzonda uno nakwata apa ng'anda yako umandya. Imisuula ino yakakusuula, yakailozya muli nene.

¹⁰ Nga naicuzya apa kukanalya, lyene kuli alino ale caya icakusombezya, icaku nsuulilapo.

¹¹ Lino nemo nazwala vyakuzwala vya ndosya, yene ale caya ukuntumfya.

¹² Lyene iyikalila nu kunjambilapo, apa mpongolo zya musumba. Na akolesi iyanjimba nu mu nyimbo.

¹³ Lelo kwene nemo panondi pano, awewe sile wenga wewe namapepanga, we Yawe. Uwanjasuka, apa nsita ino ukasi, we Leza apamulandu nu luse lwako ulutaikulila. Pano wemo umu cumi, usilaya ufi umuntu apa lwakumutuula.

¹⁴ Ntuule, utaleka ntotomele umu lutikiti, umpokolole uku anisi yane, nu kwi tenga kwene lii.

¹⁵ Utaleka mulamba antuwizye, utaleka ntuwile api tenga nanti nzikwe umwi lindi.

¹⁶ We Yawe, ule unjasuke. Pano wemo waya ni nkumbu izivule. Senukila kunondi, pano wemo wakwatisya uluse!

¹⁷ Utafisama ne muzya wako. Nemo indi umu ucuzi ukulu. Kalauka ukungasuka!

¹⁸ Ndanga kuno wize umpususye, untasye ku anisi yane!

¹⁹ Wemo wamanya vino nasuulwa, na vino nazewana nu kusalulwa. Anisi yane yonsi, wemo ukayalola.

²⁰ Intusi zyao, nemo zikundepola umwenzo, na kazwa nemo ntakwata. Nemo ntakwata. Nemo natailanga ukulola uwakundilila kweneko ulanda, awe cumi ntamuweni. Nanti uwakumyalalika umwenzo nawe kwene atalolike.

²¹ Lino inzala yandumile, yanjikile sumu umu vyakulya. Lino ulusala lwandumile, nalyo yamwesizye waini umusasalume.

²² Leka amalila yao yayalye. Na manda makulu yao, aluzango, yayaletelele!

²³ Yapeele akafinzi apa manso, apakuti yatalolekesya, yaongoloke ni misana apakuti yaipenukila sile!

²⁴ Yafookele ukali ukali, uleke icipyu cako ciyasambule imyenzo wa moto!

²⁵ Leka pano yikala paye itongwa, patasyala nanti wenga umu ng'anda!

²⁶ Pano yene yapampanya sile ukucuzya antu yano wacuzya mpiti. Yakatononka sile ivilonda vya ya antu yano wacisa mpiti.

²⁷ Fwandi uyapezye ukulingana ni mpulupulu zyao. Utuuvwila nanti wenga uluse.

²⁸ Uleke na mazina yao yafutwe umu lupapulo lwa umi, yatakezye ukuzanwa mumu umwalembwa amazina ya antu yako.

²⁹ Lelo kwene nemo nene mulanda, nupya inkucula. We Leza sinkatusye nupya untuule?

³⁰ Nemo namawanzizya Leza umu lwimbo. Namalumbilizya amaka yakwe apa kumutaizya.

³¹ Pano kwene cico icingazanzya Umwene, ukuluta ukumutuula ka cipambasi ka ng'ombe, ukuluta na pakumutuula cipambasi wiya kwene uwata nu kukula.

³² Mutaweni fwandi, mwe alanda sansamukangini. Namwe mwemuno mukalonda Leza, namwe komini sile penepo.

³³ Pano umwene, akauvwa alanda nupya asiilila nu ku antu yakwe, yayo aisumba umu milimo yakwe.

³⁴ Mwe mayulu, nawe we nsi, mwalumbanya Leza, pamwi nawe kwene we yemba, kumwi namwe viumbwa, mwe muno mwayamo mwensi!

³⁵ Pano aliwe amapususyanga Zioni nu kututulula imisumba yamu mpanga yakwe Yuda, ali muno mumaikalanga antu yakwe, nupya cimayanga ali mpanga yao.

³⁶ Na ana ya aomvi yakwe amayanga zili mpyanyi zya mwenemo, nga na yayo amutemwa yalikala mwenemo.