Masamu 66 - Amazwi Yakwe Leza 2013

Ulwimbo lwa kulumbanya nu kutaizya Leza

¹ Umilini tupundu kuli Leza, mwe antu yonsi apano nsi!

² Imbini ulwimbo lwakulumbanya izina lyakwe lya lulumbi. Mulumbanyini mu lulumbi lwakwe.

³ Vwangini muti, “Vino we Leza ukacita ivyakuzunguka! Amaka yako akulu wakwe cimwi. Anisi yako yakatunkana kunuli.

⁴ Aikalansi yonsi, awewe yakapepa. Awewe yakaimbila inyimbo zyaku kulumbanya, awewe yakalumbanya izina lyako umu nyimbo?

⁵ Izini mulole vino Leza wacita. Iye mwe, aliwe uwakoopa, pamulandu wa vintu vino wacitila antu!

⁶ Wasangwile yemba umusili uume ndi, ni vikolwe vitu ali pakulamba pansi ni ngazo. Ndanji tuzange ni nsansa pali cino Leza wacisile.

⁷ Aliwe akateeka pee na pee uku maka yakwe, aliwe akaceceta antu ya mitundu. Mutaleka fwandi yacisanguka yayuvwa kunoli.

⁸ Lumbanyini Leza witu, mwe mitundu ya antu yonsi, simungaleka amalumbo inu yauvwika.

⁹ Aliwe akatusunga nu kutupisya ulumi, nu kuleka ingazo zitu ukukana syetuka.

¹⁰ We Leza, ala watwezya, watusambula wakwe vino yakaengulula siluva umu moto.

¹¹ Awewe walesile ituponela umu uzya, nu kutwilikizya ivinyome.

¹² Wewe walesile na anisi itu yatulyatola apa mitwe. Swemo twapita umu manzi nu mu moto, wasuka pakusyalikizya watuleta mu cifulo ca vintu ivivule.

¹³ Nkukuletela uku ng'anda ukwako impolelwa zyakoca, nkukutuula vino nakulavile.

¹⁴ Nkukupeela vino natiile indakupeela, lino nali umu ucuzi.

¹⁵ Namakutuula imfwele iziine zyakukocela impolelwa apa kavuwa. Kumaya na kacinunu akanunkile, akakwe ya suuku. Namakutuula ni impolelwa yakwe yacipambasi ya ng'ombe na yasawe.”

¹⁶ Mwe! Mwemwe mwensi mwe muno mwakwatila Leza icoopo, ndanji muvwe, namamunena vino Leza wancitila.

¹⁷ Lino nemo napunzile nati, “Ntulwe!” Nalondanga kuti inamulumbanyizizya umu nyimbo.

¹⁸ Iciya icakuti nemo inkasansamukila umu viipe, awe cumi Umwene atange anguvwe.

¹⁹ Lelo ukuya kwene nemo Leza wanguvwile, akutika nu kwi pepo lyane.

²⁰ Nkutaizya Leza pano wene atasuzile ukwi pepo lyane, nu kuta atatiile ukunguvwila ukutemwa kwakwe ukwa pe.