Masamu 65 - Amazwi Yakwe Leza 2013

Ukulumbanya nu kutaizya Leza

¹ We Leza ica insambu ukuti antu yakulumbanyizizya umu Zioni, nu kukupelela mwenemo vyonsi vino yakulaya.

² Pano wemo ukauvwa amapepo, antu yonsi yamaizanga kuli wewe.

³ Apa mulandu wa kwifya kwitu nanti tungifya uli, wemo ukatwelela apa kuluvyanya kwitu.

⁴ Alongo antu yano wemo wasolola, apakuti yangaikala umwi sano lyako ilyamuzilo! Tumasekelanga apa vintu ivizipe ivyaya umwako, apa upolelelo uwaya mung'anda yako yamuzilo!

⁵ Ukaatwasuka we Leza, we katuula witu. Apa kututuula, wemo ukacita ivintu ivyakuzunguka. Antu yonsi apano nsi kumwi na yano yaya ukumbalama yakwe yemba, munuli amuno yataila.

⁶ Awewe wakatwisye imyamba uku maka yako, pano amaka yako yakula.

⁷ Wewe ukamyalalika imiza pali yayemba kumwi na maimbi ni mpokoma zya antu.

⁸ Antu ya pano nsi yaya ni ntete, pamulandu wa vintu ivikulu vino ukacita. Vino wacita kwene ivyalenga nu kuti antu yaumila utupundu, ukutandika akatondo mpaka amanguzi.

⁹ Pano nsi, awewe ukasunga impanga nu kuiletela imvula. Ukalenga ukuti iye ikankala nupya iya muvundo. Ukalenga inguzi zizule amanzi apakuti antu yakontelela imbezu zyao. Vyonsi vii, awewe ukateyanya.

¹⁰ Ivyalo ivilimwe, awewe ukaviletela imvula, nu kuleka ukuti intumba zitumpulwe ningo. Ukazitontekela kuli tusume apakuti ivyakulya vikule ningo.

¹¹ Iye mwe! We vilyo nu wingi! Wewe ukuleka tutuuke cila mwaka! Konsi kuno we Leza wapolelela, ali kuno ni vilyo vikavulisya!

¹² Ku mulemvwe nako ukukaya amaufyo ya viteekwa. Umu myamba namo pasi pakuteka kwa vintu! Maufyo ya viteekwa yatiyalimba uku milemvwe, izyanyika nazyo ivyakulya vitupu. Awe cumi pasi pakupunda nu kwimba ni nsansa!

¹³ Mu nyika muli imfwele nyanya, ivifoloma vizilemo ingano. Ivintu vyonsi vikulaizya nu kwimbila ni nsansa.