Masamu 62 - Amazwi Yakwe Leza 2013

Kutaila mu ucingililo wakwe Leza

¹ Umwenzo wane wazana ukupuza muli Leza mutupu. Ufyusi wane wafuma sile kunoli.

² Wenga sile, aliwe akampokolola, nupya ali cilwala wane nu ufyusi wane. Ali muno nkazina, fwandi nemo, ntalatala intelengane.

³ Uzye mwemwe mwensi, cingamusumbila insita uli, apa kuzanza umuntu nu kumucisa? Uzye kwene mwensi mungafwanta pansi, wiyo ayendime wa mulungu umokoke, nanti ali wi linga iliongoloke?

⁴ Kwene mwemo, ala mwimilile sile apa kumuseka, nu kumufumya apa ukama wakwe. Ala mwimilile sile apa kumutumpwila ufi nu kulanda amazwi kwati akumupolelela, lelo umu myenzo inu ala mukumutipwila sile.

⁵ Nemo a Leza sile wenga, ali wino nikalilila, nupya ali wino nataila.

⁶ Wenga mpo, ali ciliwe cane nu ufyusi wane. Ali muno nkazina, intalatala ntelengane.

⁷ Ufyusi wane nu ucindami wane, vyasintilila muli Leza. Ali ciliwe cino nkazina mwenemo, ali muno nkauwa.

⁸ Mwe antu yane, lyonsi sile mwataila muli Leza! Mwamutula amacuzi inu lyonsi, pano ali muno tukapusukilamo.

⁹ Antu yonsi kwene yaya wa muza. Akama nayo yaya wa ufi, ndi cakuti kwali ukuyapima pali sikelo, yatange yanyome nanti panono, yali sile wa muza.

¹⁰ Mutataila umu vyaukakasi, mutazangila umu vyuma vyamu wivi. Nanti sile ivyuma vinu kwene nga cakuti vyavulisya, mutaviika kweneko amano!

¹¹ Kwaya sile icintu conga cino Leza akakonkowezya penepo, cino nani namasambilila mwenemo ivintu viili. Acico icakuti, wewe Leza uli mweneco wa maka,

¹² alino ni cakuti we Leza, uluse lwako ulwamuntaputuka. Icacumi, we Mwene, ala ukapeela icilambu uku muntu ukulingana ni vicitwa vyakwe.