Masamu 60 - Amazwi Yakwe Leza 2013

Ipepo lyakulenga kukululwa

¹ We Leza, watutazyela, nu kutusya apa lwalala. Watutusokela, awe cumi ungala uwele kunotuli!

² Watutensya insi, watuipandula apakasi, sungala usilile muno vyativilepoka, pano kwasyala sile kwempe kuti imokoke!

³ Watulenga antu yako uku cululuka wakwe cimwi. Watutumwesya waini umukalipisye, tukupempezyoka sile.

⁴ Antu yako yano yakukwatila icoopo, wemo watuyakatusizya uluunga, lyene yatiyapuuka inceto zya anisi yao.

⁵ Tutaasye fwandi uku maka yako, uuvwe ipepo litu apakuti antu yako, yano watemwisya, yakululwe.

⁶ Umwi sano lyako ilyamuzilo, ali muno we Leza wavwanzile uti, “Apa nsita ya ucimvyo wane indankanya Syekemu nu kupima Cifoloma ca Sukoti.

⁷ Gileadi wene uwakwane, na Manase kwene nawe uwakwane. Efulemu nawe ali cimpompo cane. Yuda nawe ali nsonzo yane iya wene.

⁸ Moabu wene alaya wakwe muyeza wa kufulalilamo. Edomu nawe alaya wa lusapato lwane, icimanyililo cakuti uwakwane. Lyene aina Filisti yangatumba inkansi uli, nu kuyuvwa kunondi apa mpanga zino nacimvya?”

⁹ We Leza, aweni fwandi alantwala ku musumba wi linga? Alantwala uku Edomu aweni?

¹⁰ Uzye kwene umolimo Leza watututazyela? Uzye kwene usikwiza uye naswe ni vita vitu?

¹¹ Sungala utwazwilizye ukulwisya anisi itu, pano amaka ya antu asile sile!

¹² We Leza, ndi cakuti waya uku lusansa lwitu, lyene tumacimvya. Awewe umalovya nu kulyatilila anisi itu.