Masamu 58 - Amazwi Yakwe Leza 2013

Ipepo lyakupapata Leza ilyakuti afulule antu aipe

¹ Mwe yakateeka uzye kwene imipingwile inu iyaulungi? Uzye mukapingwila antu umu musango ulungamane?

² Awe! Umu myenzo inu mukacita ulufyengo. Nupya amwemwe kwene mukasansanta ni mpanzela pano nsi.

³ Antu aipe yikalila sile ukuluvyanya. Yakasomba ufi ukutandikila sile pano yavyalilwe.

⁴ Yakwatisya usungu ungati uwanzoka. Umu matwi yao yasililamo ipula, kwati inondo iyafundika amatwi,

⁵ iyo isiuvwa izwi lya muntu wiyo ali wensi wacenjela uli uku kwama inzoka, umu kuomvya ivingila vyakwe.

⁶ Yakwikole amino we Leza, utamole ni vifulo vyakwe yacisama akali yayo, we Yawe!

⁷ Leka yakonkoloke sile wakwe mulamba, yalyatolwe wi sote lya mwikula.

⁸ Leka yaye wa nyonga ikasya itelende muno ipisile. Leka yaye sile wa kapopo akasilola luswepo.

⁹ Leka yaputulwe wa cipupa apa nsita yino yatenekile, ciye yacili aisi nanti ayume. Leka sile aipe yululwe, yapyelwe lino yacili apuma.

¹⁰ Asuma yene yalatemwa wakwe cimwi apa kulola kuno aipe yakupeziwa. Yene yalafula ingazo zyao umu wazi wakwe yakaifya.

¹¹ Yakaifya yene yalati, “Ee kwene icacumi asuma yalambulwa, mu cumi, kwaya Leza wenga akapingwila insi.”