Masamu 57 - Amazwi Yakwe Leza 2013Ipepo lyakulenga uwazwilizyo ( 1Sam 22:1 ; 24:3 ) 1 Undole luse luse we Leza, undole luse luse, pano niza nazina kunuli. Umu cisao ca mapa yako, amuno nkuuwa, ukufika sile na lino uzanzo wane ulasililikila. 2 Awewe Leza, we Leza Mukulu, wewe nkulaizya inti, “Ntuulwe!” Awewe Leza, umpeele vyonsi vino nkulonda. 3 Ungasukile ukwiyulu kwene, untuule nu kuntuula. Umacimvya na yayo kwene akamvungatila. We Leza, umandanga ukutemwa kwako ukwa pe na ucumi. 4 Nemo indi pakasi ka vilyanyi ivikateyamila antu. Amino ya viko yaya wa masumo ni nceto. 5 We Leza, ale ilange kuko kuno wikala ukwiyulu. Leka ucindami wako uloleke pano nsi ponsi! 6 Anisi yane yatiyateya isumbo ilyakuti indemye, lelo nemo natimfumfuma mwenemo. Yatiyanjimbila ucinga umu nzila, lelo aliwo kwene yatiyawela iyaponela mwenemo. 7 We Leza, nemo umwenzo wane watiuiteyanya. Nemo namakwimbilanga inyimbo izya kukulumbanya! 8 Kulukunta we mwenzo wane! Zumbika we ngoma yane ni cinanda cane! Namakatuka pa macaca! 9 Namakutaizyanga uku mitundu ya antu, we Mwene! Namakulumbanyanga uku inamasi yonsi! 10 Ukutemwa kwako uku sisila kwafika nu mwiyulu, icumi cako cafika nu mu makumbi. 11 We Leza, ilange kuko kuno waya ukwiyulu. Leka nu ucindami wako uloleke pano nsi ponsi. |
Mambwe-Lungu Bible © The Bible Society of Zambia, 2013
Bible Society of Zambia