Masamu 56 - Amazwi Yakwe Leza 2013

Ipepo lyakutaila Leza

¹ Undole luse luse we Leza pano antu yati yankatukila, anisi yane yakuncuzya pee!

² Yano twapusana nayo yakunkatukila sile kasanya konsi!

³ Lino intete zyandema, awewe sile wenga we muno nkataila, Leza mukulu.

⁴ We Leza, nemo awewe sile wenga nataila, nkataizye nu ulayo wako. Awewe sile nataila, ni ntete nemo nsikuvwanga nanti panono. Fwandi icani cino umuntu silesile angancita?

⁵ Nemo yakancuzya sile muli vyonsi vino nkacita umusanya onsi. Cila nsita yakaelenganya sile apakumfyengelekezya?

⁶ Apa kukongana yakafisama, yakanteyamila muli vyonsi vino nkacita apakuti yankome.

⁷ We Leza, siyavunuke pa uyi wao. We Leza antu yanko zyuze yacimvye ukali ukali.

⁸ Wemo wamanya vino nkacula, ukaiusya na minsozi yane. Uzye kwene vitatantikwa umu lupapulo lwako?

⁹ Uwanda uno nemo ndapunda, “Tutulwe,” anisi yane yalapuuka. Cino nemo namanya sile icakuti, Leza waya nani!

¹⁰ A Leza awino nemo nataila, nkawanzya nu upangano wakwe. Nemo namawanzyanga ulayo wakwe Yawe.

¹¹ A Leza awino nemo nataila, ni ntete nemo intazikwata foo. Icani fwandi cino umuntu uwasilesile angancita?

¹² We Leza nemo namakupeela vyonsi vino nakulavile. Namakutula uwila wane uwakukutaizya,

¹³ pano watumpususya ku mfwa, utalesile kuti yancimvye foo. Ali cino fwandi nemo inkaipitila na pa manso yako, umu luswepo ulukakozezya aumi.