Masamu 51 - Amazwi Yakwe Leza 2013

Ipepo lyakulenga ukwelelwa amaifyo

¹ Njeleko uluse we Leza pano wewe waluse uluvule. Mfumizye iviipe vyane vyonsi, pano wemo wakwatisya amizu.

² Mfumizye impulupulu zyane zyonsi pyu.

³ Nazumila ukuti naifizye, na vyonsi vino nacisile inkaviuzya.

⁴ Nemo naifya kunuli awewe sile wenga, awewe naifya, nu kucita ivintu iviipe kuli wewe. Icacumi walungika wakwe cimwi apakunkalipila, walungika apa kumpingula nu kumpela umulandu. Usifyenga umuntu mu upinguzi wako.

⁵ Kwene nemo navyalilwe umu luyembu. Lino mayo wanyomelile indilwa yane, nali umwipe.

⁶ Pamulandu wakuti watemwisya ulungi uwamu mwenzo, sokolola kunondi uwile wamano yako.

⁷ Umfule na manzi yako, inswepe, umfule nu mwenzo wane uswepe na mpee.

⁸ Sileka nuvwe nupya uluzango nu kusansamuka. Nu mu mafupa yane umuvungoke, ince nacina nupya ne mulanda.

⁹ Funtusya usyu wako kunondi, uku kulolekesya uku maifyo yane. Kumbula uyi wane onsi.

¹⁰ We Leza, mpeko umwenzo wa kuyela uwike munondi umwenzo upya uposye.

¹¹ Utafuntuka kunondi foo, utampoka umupasi wako uwamuzilo.

¹² Umbwezezye insansa zya ufyusi wako, umpeele umwenzo ukome nupya utontelele.

¹³ Alino ndalanga aipe inzila zyako, na yakacita ya viipe yalaweluluka kunuli.

¹⁴ Untuule uku mpanzela, Leza we katula wane. Alino nu lulimi lwane lumakulumbanyanga apa ulungi wako.

¹⁵ We Mwene, sapula imilomo yane, na kanwa kane kamatakolonga umuncinzi wako.

¹⁶ Ndi cakuti nakutula impolelwa, usipokelela, nanti sile impolelwa yakoca, nayo kwene isikuzanzya foo.

¹⁷ Ali cino fwandi nemo impolelwa yane, ukulapila kwa mu mwenzo, usisula umwenzo uwakutontelela mu kuzenzuka.

¹⁸ We Leza, uku luse lwako ungakomelezya Zioni, apakuti ilinga lyaku Yelusalemu, likulwe cipya cipya.

¹⁹ Ali lino lyene, ulapokelela nu luzango impolelwa zyampomvu, impolelwa zyakoca, na mawila ya vilyo kumwi na tucipambasi twa ng'ombe, utwakutuula apa kavuwa kako.